Read Iloko Numbers 19 Bible Online

Numbers 19 - Iloko bible

Numbers 19

¹Binilin ni Yahweh da Moises ken Aaron

²nga itedda kadagiti Israelita dagitoy nga alagaden. Ipanyo kada Moises ken Aaron ti maysa a kabaian a nalabaga a baka nga awan depektona ken di pay naipako.

³Maipan met laeng daytoy nga animal ken ni Eleazar a padi tapno maparti iti ruar ti kampo iti imatangna.

⁴Mangala ni Eleazar iti dara, isawsawna ti ramayna, sumango iti Tolda ket warsianna iti mamimpito.

⁵Masapul a mapuoran ti sibubukel a baka iti imatang ti padi, agraman ti lalat, lasag, dara ken bagbagisna.

⁶Mangala ti padi iti sumagmamano a kayo ti sedro, saringit ti hisopo ken nalabaga a lupot sana ipurruak dagitoy iti apuy.

⁷Kalpasanna, labaanna ti pagan-anayna ken buyatanna ti bagina iti danum sakbay nga agsubli iti kampo; nupay kasta, agtalinaed a narugit iti imatang ti linteg agingga iti rabii.

⁸Masapul met a labaan ti tao a nangpuor iti baka ti pagan-anayna sana buyatan ti bagina iti danum ngem agtalinaed met a narugit iti imatang ti linteg agingga iti rabii.

⁹Kalpasanna, maummong dagiti dapu ti napuoran a baka sa maikabil iti lugar a maibilang a nadalus iti ruar ti kampo. Annongen daytoy ti tao a maibilang a nadalus. Aramaten dagiti Israelita ti dapu a pangisagana iti danum iti seremonia ti panangikkat iti kinarugit, gapu ta naidaton ti baka a maipaay iti basol.

¹⁰Ti tao a nangummong iti dapu masapul a labaanna ti pagan-anayna ngem agtalinaed a narugit agingga iti rabii. Agtalinaed iti agnanayon daytoy nga alagaden kadagiti Israelita ken dagiti ganggannaet a makipagnaed kadakuada.

¹¹Maibilang a narugit iti pito nga aldaw ti siasinoman a mangsagid iti maysa a bangkay.

¹²Iti maikatlo ken maikapito nga aldaw, masapul a dalusanna ti bagina babaen iti danum a maar-aramat iti seremonia ti pannakadalus ket kalpasanna maibilangen a nadalus. Ngem no dina dalusan ti bagina iti maikatlo ken maikapito nga aldaw, saan a nadalus iti imatang ti linteg.

¹³Agtalinaed a narugit ti mangsagid iti maysa a bangkay a dina dalusan ti bagina agsipud ta saan a nabuyatan iti danum a maaramat iti seremonia ti pannakadalus. Tulawanna ti Tolda ti Dios ket mailaksid kadagiti tattao ti Dios.

¹⁴No adda matay iti uneg ti maysa a tolda, maibilang a narugit iti las-ud ti pito nga aldaw ti siasinoman nga adda iti uneg wenno sumrek sadiay iti tiempo nga ipapatayna.

¹⁵Agbalin met a narugit iti imatang ti linteg ti amin a karamba wenno banga nga awan kalubna.

¹⁶Maibilang met a narugit iti las-ud ti pito nga aldaw ti siasinoman a mangsagid iti bangkay ti tao a napapatay wenno natay iti ruar wenno ti siasinoman a mangsagid iti tulang ti tao wenno iti tanem.

¹⁷Tapno maikkat ti kinarugit, masapul ti dapu ti baka a napuoran a pangikkat iti basol; ikabil iti banga a nakargaan iti kasaksakdo a danum.

¹⁸Mangala ti siasinoman a maibilang a nadalus iti saringit ti hisopo, itanebna iti danum sana warsian ti tolda, dagiti amin nga alikamen iti unegna ken dagiti tattao nga adda sadiay. Kasta met a tao a nadalus iti imatang ti linteg ti mangwarsi iti tao a nangsagid iti tulang ti tao wenno tanem wenno bangkay.

¹⁹Iti maikatlo ken maikapito nga aldaw, warsian ti tao a nadalus iti imatang ti linteg ti siasinoman a maibilang a saan a nadalus. Iti maikapito nga aldaw, dalusan ti tao a narugit iti imatang ti linteg ti pagan-anayna sana buyatan ti bagina iti danum. Kalpasanna, ti tao a maibilang a nadalus ti mangannong iti seremonia ti pannakadalusna, ket maibilangen a nadalus iti sumipnget.

²⁰Agtalinaed a saan a nadalus ti tao a nagbalin a narugit iti imatang ti linteg no dina annongen ti pannakadalusna, agsipud ta saan a naibuyat kenkuana ti danum ti pannakadalus. Tulawanna ti Tolda ti Dios ket saanen a maibilang a maysa kadagiti tattao ti Dios.

²¹Agtalinaed iti agnanayon daytoy nga alagaden. Masapul a labaan met ti tao a mangiwarsi iti danum ti pannakadalus ti pagan-anayna; agtalinaed a narugit agingga iti rabii ti siasinoman a mangsagid iti danum.

²²Maibilang a narugit ti aniaman a sagiden ti tao a maibilang a saan a nadalus ket agtalinaed a saan a nadalus agingga iti rabii ti siasinoman a mangsagid iti daytoy.