Read Iloko Numbers 20 Bible Online

Numbers 20 - Iloko bible

Numbers 20

¹Iti umuna a bulan, dimteng ti sibubukel a gimong dagiti Israelita iti let-ang ti Zin ket nagkampoda idiay Kades. Sadiay ti nakatayan ken nakaitabonan ni Miriam.

²Awan danum iti nagkampoanda, isut' gapuna a naguummong dagiti tattao iti sangoanan da Moises ken Aaron

³ket nagreklamoda. “Naim-imbag la koman no nairamankami kadagiti padami nga Israelita a napapatay iti sangoanan ti Tolda ti Dios.

⁴Apay nga inyegnakami iti daytoy a let-ang? Tapno mataykami ditoy, agraman dagiti animalmi?

⁵Apay nga impanawnakam idiay Egipto ket inyegnakam iti daytoy nakapangpanglaw a lugar a pulos nga awan ti agtubo a mula? Awan ti trigo, igos, ubas, ken granada; awan pay danum nga inumen!”

⁶Pimmanaw da Moises ken Aaron ket napanda nagpakleb iti daga iti ruangan ti Tolda ti Dios. Nagparang kadakuada ti makapurar a lawag ti dayag ni Yahweh.

⁷Kinuna ni Yahweh ken ni Moises,

⁸“Alaem ti sarukod iti sango ti Lakasa ti Tulag ket kalpasanna, ayabanyo ken ni Aaron ti entero a gimong. Iti imatangda amin, agsaoka iti dayta a bato ket pumsuak ti danum nga agpaay kadakuada ken dagiti animalda.”

⁹Napan innala ni Moises ti sarukod kas imbilin ni Yahweh kenkuana.

¹⁰Inummongda ken ni Aaron ti entero a gimong iti sango ti bato ket kinuna ni Moises, “Dumngegkayo, dakayo a nasukir! Masapul kadi a mangalakam iti danum iti daytoy a bato nga agpaay kadakayo?”

¹¹Ingngato ni Moises ti sarukod sana impang-or iti namindua ket pimsuak ti aglablabonan a danum. Ket imminum dagiti tattao ken dagiti animalda.

¹²Ngem inungtan ni Yahweh da Moises ken Aaron, “Gapu ta nakapsut ti pammatiyo a mangipakaammo iti nasantoan a pannakabalinko iti imatang dagiti Israelita, saanyonto a maidanon ida iti daga nga inkarik nga ited kadakuada.”

¹³Napasamak daytoy idiay Meriba, ti lugar a nagreklamoan dagiti Israelita iti maibusor ken ni Yahweh; ditoy a naiparang ti kinasantona.

¹⁴Manipud Kades, nangibaon ni Moises kadagiti mapan iti ari ti Edom. Kinunada: “Naggapu daytoy a pakaammo kadagiti kakabagiam, dagiti tribu ti Israel. Ammom amin a rigat a sinagabami,

¹⁵no kasano ti ipapan dagiti kapuonanmi idiay Egipto, ket nagyankami sadiay iti adu a tawen. Pinarparigat dagiti Egipcio dagidi kapuonanmi ken uray dakami.

¹⁶Gapu iti daytoy, immawagkami iti Apo iti tulong. Nangngegna ti asugmi ket nangibaon iti anghel a nangiruar kadakami idiay Egipto. Ita, addakami ditoy Kades, maysa nga ili iti beddeng ti dagam.

¹⁷Pangngaasim ta palubosannakami a lumasat iti dagam. Magnakami iti kangrunaan a kalsada; agingga a makaruarkami iti sakupmo. Saankami a sumiasi wenno sumrek kadagiti talonyo wenno kaubasanyo ket dikam met uminum kadagiti bubonyo.”

¹⁸Ngem insungbat dagiti Edomita, “Saankayo a lumasatkayo iti sakupmi. No padasenyo, rummuarkami a manggubat kadakayo.”

¹⁹Kinuna dagiti Israelita, “Itinto laeng dakkel a kalsada ti pagnaanmi. Ket no uminumkami wenno dagiti animalmi iti danumyo, bayadanminto. Daytoy laeng ti dawatenmi: papagnaendakami.”

²⁰Inulit dagiti Edomita, “Saan a mabalin.” Ket nabukel ti nabileg nga armadada a mangdarup kadagiti Israelita.

²¹Gapu ta iparit dagiti Edomita a magnada iti sakupda, nagna dagiti Israelita iti sabali a dalan.

²²Manipud Kades, nagdaliasat ti entero a gimong ti Israel agingga a nakadanonda iti Bantay Hor

²³iti beddeng ti Edom. Sadiay, kinuna ni Yahweh kada Moises ken Aaron,

²⁴“Saan a sumrek ni Aaron iti daga nga inkarik nga ited iti Israel; matay ni Aaron gapu ta sinukiryo a dua ti bilinko idiay Meriba.

²⁵Alaem ni Aaron ken ni Eleazar nga anakna ket sumang-atkayo iti Bantay Hor.

²⁶Inton dumanonkayo sadiay, uksobem ti pagan-anayna a kas padi samo ikawes ken ni Eleazar. Ket sadiayen ti pakatayan ni Aaron.”

²⁷Tinungpal ni Moises ti bilin ni Yahweh. Nakita ti sibubukel a gimong ti isasang-atda iti Bantay.

²⁸Idi dumtengda iti tapaw ti bantay, inuksob ni Moises ti pagan-anay ni Aaron ket inkawesna ken ni Eleazar. Sadiay a natay ni Aaron ket simmalog da Moises ken Eleazar.

²⁹Idi maammoan ti amin a gimong a natay ni Aaron, tallopulo nga aldaw a dinungdung-awanda.