Read Iloko Numbers 22 Bible Online

Numbers 22 - Iloko bible

Numbers 22

¹Intuloy dagiti Israelita ti panagdaliasatda ket nagkampoda kadagiti tantanap ti Moab iti daya ti Jordan iti ballasiw ti Jerico.

²Nadamag ni Ari Balak nga anak ni Sefor ti inaramid dagiti Israelita kadagiti Amorreo.

³Nagbuteng ti ari ken dagiti amin a tattaona gapu iti kaadu dagiti Israelita.

⁴Kinuna dagiti Moabita kadagiti pangulo dagiti Midianita, “Iti mabiit, ibusen daytoy a bunggoy ti amin nga adda iti lawlawtayo, kas iti panangibus ti baka iti ruot iti pagaraban.” Iti kasta,

⁵nangibaon ni Ari Balak kadagiti tattao a mapan mangayab ken ni Balaam nga anak ni Beor idiay Petor iti asideg ti Karayan Eufrates iti daga ti Amaw. Pinaibagana: “Adda sibubukel a nasion a naggapu idiay Egipto; nagsaknap dagiti tattaona iti amin a lugar ket kayatda a sakupen ti daga nga iturayak.

⁶Ad-aduda ngem dakami, isu nga umaymo koma ilunod ida, barbareng maparmekmi ida ket mapagtalawmi ida iti daga. Ammok a no mangbendisionka, mabendisionan dagiti tattao, ket no mangilunodka, mailunodda.”

⁷Intugot dagiti panglakayen ti Moab ken dagiti pangulo ti Midian ti pagbayad iti panagilunod ni Balaam. Imbagada ken ni Balaam ti pinaibaga ni Balak.

⁸Kinuna ni Balaam kadakuada, “Maturogkayo ditoy ita a rabii ket inton bigat, ibagak kadakayo ti aniaman nga ibaga ti Apo.” Immian ngarud dagiti pangulo ti Moab iti balay ni Balaam.

⁹Iti dayta a rabii, nagparang ti Dios ken ni Balaam ket kinunana, “Siasino dagitoy sangailim?”

¹⁰Insungbat ni Balaam, “Imbaon ida ni Balak nga ari ti Moab; imbagada kaniak

¹¹nga adda tattao a naggapu idiay Egipto ket nagsaknapda iti daga. Kayatna nga ilunodko ida tapno kabaelanna a sarangten ken paksiaten ida.”

¹²Kinuna ti Dios ken ni Balaam, “Dika sumurot kadagitoy a tattao ken dimo ilunod dagiti Israelita gapu ta binendisionak ida.”

¹³Kabigatanna, napan imbaga ni Balaam kadagiti imbaon ni Balak, “Agawidkayon; dinak palubosan ti Apo a kumuyog kadakayo.”

¹⁴Iti kasta, nagsublida ken ni Balak ket imbagada kenkuana a madi ni Balaam a kumuyog kadakuada.

¹⁵Nangibaon manen ni Balak iti ad-adu a panglakayen nga ad-adda a mararaem ngem dagiti immuna.

¹⁶Napanda ken ni Balaam ket impakaammoda ti imbaga ni Balak: “Pangngaasim ta dimo ipalubos nga adda makalapped iti yaaymo kaniak!

¹⁷Gunggonaanka iti adu ket aramidek ti aniaman nga ibagam. Umaymo koma ilunod dagitoy a tattao.”

¹⁸Ngem insungbat ni Balaam, “Uray no ited kaniak ni Balak ti amin a pirak ken balitok iti palasiona, diak mabalin a sukiren ti bilin ti Apo a Diosko iti uray kabassitan a banag.

¹⁹Nupay kasta, umiankayo met ditoy ita a rabii tapno maammoak no adda pay ibaga ti Apo kaniak.”

²⁰Iti dayta a rabii, napan ti Dios ken ni Balaam ket kinunana, “No umaydaka ayaban dagitoy a tattao, kumuyogka kadakuada ngem ti laeng ibagak kenka ti aramidem.”

²¹Iti sumuno a bigat, sinilyaan ni Balaam ti asnona ket kimmuyog kadagiti pangulo a taga-Moab.

²²Nakapungtot ti Dios gapu iti ipapan ni Balaam. Idi adda iti dalan a sisasakay iti asnona ken kinuyog ti dua nga adipenna, nagtakder ti anghel ni Yahweh iti kalsada tapno lapdanna.

²³Nakita ti asno ti agtaktakder nga anghel a nakaiggem iti kampilan ket simmina iti dalan sa nagturong iti taltalon. Inablatan ni Balaam ti asno tapno agsubli iti dalan.

²⁴Nagtakder ti anghel iti dana iti nagbaetan ti dua a kaubasan; nailet dayta a paset ti kalsada nga adda bakud iti agsumbangir.

²⁵Idi makita ti asno ti anghel, immampir iti bakud ket nalipit ti saka ni Balaam. Inablatan manen ni Balaam ti asno.

²⁶Binangenan manen ti anghel ti pagnaan; nagtakder iti disso a pulos nga awan makapagna iti agsumbangir.

²⁷Ita, nagidda ti asno apaman a nakitana ti anghel. Nakapungtot ni Balaam ket rinugianna nga ablatan ti asno.

²⁸Inikkan ni Yahweh ti asno iti pannakabalin nga agsao ket kinunana ken ni Balaam, “Ania aya ti nakabasolak kenka? Namitlon nga inablatannak.”

²⁹Insungbat ni Balaam, “Gapu ta pagbalbalinennak a maag! No adda la kampilanko, pinatayka koman.”

³⁰Kinuna ti asno, “Asnonak, saan kadi? Nabayagen a nagsaksakayannak. Napuotamon aya a sinukirka?” “Saan pay,” insungbat ni Balaam.

³¹Impalubos ni Yahweh a makita ni Balaam ti agtatakder nga anghel a nakaiggem iti kampilan. Nagpakleb ni Balaam iti daga.

³²Kinuna ti anghel kenkuana, “Apay a kasta ti inaramidmo iti asnom? Namitlon nga inablatam! Umayko lapdan ti ipapanmo gapu ta saan a rumbeng a mapanka.

³³Ngem nakitanak ti asnom, ket naglisi iti namitlo. No saan a naglisi, pinatayka koma ket naispal ti asno.”

³⁴Kinuna ni Balaam, “Nagbasolak. Diak ammo a nakatakderka iti kalsada tapno lapdannak. Agawidakon no saan a rumbeng a mapanak.”

³⁵Ngem kinuna ti anghel, “Kumuyogka kadagitoy a tattao, ngem ti laeng ibagak ti sawem.” Ket simmurot ni Balaam kadagiti imbaon ni Balak.

³⁶Idi madamag ni Balak a sumangpet ni Balaam, napanna sinabat idiay Ar, maysa a siudad iti igid ti Karayan Arnon iti beddeng ti Moab.

³⁷Kinuna ni Balak ken ni Balaam, “Apay a dika immay idi damo a pinaayabanka? Impagarupmo kadi nga awan umdas a panggunggonak kenka?”

³⁸Insungbat ni Balaam, “Uray ket addaakon. Ngem awan bukodko a pannakabalin nga agsao. Ti laeng sawen kaniak ti Dios ti mabalinko nga ibaga.”

³⁹Simmurot ni Balaam ken ni Balak iti ili ti Husot.

⁴⁰Idi dumtengda sadiay, nagparti ni Balak iti baka ken karnero ket inikkanna iti karne ni Balaam ken dagiti pangulo a kinakuyogna.

⁴¹Kabigatanna, simmang-at da Balak ken Balaam idiay Bamot Baal. Manipud iti ayanda, matannawagan ni Balaam ti dadduma a kampo dagiti Israelita.