Read Iloko Numbers 23 Bible Online

Numbers 23 - Iloko bible

Numbers 23

¹Kinunana ken ni Balak, “Ibangonannak ditoy iti pito nga altar saka mangyeg iti pito a toro a baka ken pito a kalakian a karnero.”

²Nagtungpal ni Balak, ket kaduana ni Balaam a nangidaton iti toro a baka ken kalakian a karnero iti tunggal altar.

³Kinuna ni Balaam ken ni Balak, “Agbatika ditoy abay ti datonmo a mapuoran, ta innak kitaen no umaynak kasao ti Apo. Ibagakto kenka ti aniaman a maipaltiing kaniak.” Napan ni Balaam iti kalbo a turod

⁴ket nagparang ti Dios kenkuana. Kinuna ni Balaam kenkuana, “Nangbangonak iti pito nga altar ket nangidatonak iti baka ken karnero iti tunggal altar.”

⁵Kinuna ni Yahweh, “Agsublika ken ni Balak ket ibagam kenkuana ti saok.”

⁶Nagsubli ngarud ni Balaam iti ayan ni Balak. Nadanonna ni Balak ken dagiti amin a pangulo ti Moab; agtatakderda pay laeng iti ayan ti datonna a mapuoran.

⁷Inyebkas ni Balaam daytoy a padto: “Pinaalanak ni Balak nga ari ti Moab idiay Syria, iti kabambantayan ti daya. Inawisnak a mangilunod kadagiti Israelita.

⁸Apay nga ilunodko ti di inlunod ti Dios? Kasano nga isaok ti dakes a pagbanaganda idinto a saan nga inyebkas ti Apo ti kasta?

⁹Manipud nangato a kabatoan, makitak ida, manipud katurturodan, maimatangak ida maysa a nasion nga agbiag nga agmaymaysa, naiduma a pagilian, naisalsalumina.

¹⁰Kasla tapok ti kaadu dagiti kaputotan ti Israel— di mabilang ti umariwekwek a kaaduda. Ti ipapatayko kas koma ti ipapatay dagiti tattao ti Dios; pumusayak koma a natalna a kas kadagiti nalinteg.”

¹¹Kinuna ni Balak ken ni Balaam, “Ania daytoy nga inaramidmo kaniak? Inyegka ditoy tapno ilunodmo dagiti kabusorko, ngem binendisionam ketdi ida.”

¹²Insungbatna, “Ti laeng ibaga kaniak ti Apo ti mabalinko nga ibaga.”

¹³Kinuna ni Balak ken ni Balaam, “Inta iti sabali a lugar a pakatannawagam kadagiti dadduma nga Israelita. Sadiay, ilunodmo ida.”

¹⁴Napanda iti tapaw ti Bantay Pisga. Iti talon ti Zofim, nangbangon manen ni Balak iti pito nga altar ket nangidatag iti toro a baka ken kalakian a karnero iti tunggal altar.

¹⁵Kinuna ni Balaam ken ni Balak, “Agbatika ditoy iti abay ti datonmo a mapuoran ta innak makiuman iti Dios sadiay.”

¹⁶Nakiuman ni Yahweh ken ni Balaam. Imbaga ni Yahweh ti sawenna sana pinagsubli tapno ibagana ken ni Balak ti saona.

¹⁷Nagsubli iti ayan ni Balak a sitatakder pay laeng iti abay ti datonna a mapuoran a kaduana dagiti papangulo ti Moab. Sinaludsod ni Balak no ania ti imbaga ni Yahweh.

¹⁸Kastoy ti padto nga inyebkas ni Balaam: “Balak nga anak ni Sefor, dumngegka; denggem ti innak ibaga kenka.

¹⁹Saan a tao ti Dios tapno agulbod; saan nga agbalbaliw ti panunotna. Aramidenna ti aniaman nga ikarina.

²⁰Naibilin a mangbendisionak; no mangbendision ti Dios, diak mabaliwan.

²¹Iti Israel awan makitak a didigra, awan kinadaksanggasat iti masakbayanna. Adda kadakuada ti Apo a Diosda ket ipakaammoda nga isu ti arida.

²²Inruar ida ti Dios idiay Egipto; makiranget gapu kadakuada a kasla atap a baka.

²³Awan buyon wenno padles a maaramat a maibusor iti Israel. Ita, kuna dagiti tattao maipapan iti Israel: ‘Kitaenyo ti inaramid ti Dios!’

²⁴Kasla nabileg a leon ti Israel. Di agtalna no dina mapisangpisang ti kabusorna, di agsardeng no dina mainum ti darana.”

²⁵Kinuna ni Balak ken ni Balaam, “No dimo kayat nga ilunod dagiti Israelita, dimo koma ngarud bendisionan ida!”

²⁶Insungbat ni Balaam, “Diak aya imbaga kenka a masapul nga aramidek amin a sawen ti Apo?”

²⁷Kinuna ni Balak, “Sumurotka ket ipanka iti sabali a lugar. Nalabit a palubosannaka ti Dios a mangilunod kadakuada manipud sadiay.”

²⁸Iti kasta, impanna ni Balaam iti Bantay Peor a pakatannawagan ti let-ang.

²⁹Kinuna ni Balaam kenkuana, “Ibangonannak iti pito nga altar ditoy ket yegannak iti pito a toro a baka ken pito a kalakian a karnero.”

³⁰Inaramid ni Balak ti naibaga kenkuana ket nangidaton iti baka ken karnero iti tunggal altar.