Read Iloko Numbers 24 Bible Online

Numbers 24 - Iloko bible

Numbers 24

¹Awanen duadua ni Balaam a kayat ni Yahweh a bendisionanna dagiti Israelita, isu a saanen a napan nagbirok kadagiti pagilasinan iti panagipadtona. Nagturong iti let-ang

²ket nakitana dagiti Israelita a nagkampo a nabunggo-bunggoy iti tunggal tribu. Inturayan ti espiritu ti Dios

³ket inyebkasna daytoy a padto: “Sao daytoy ni Balaam nga anak ni Beor, padto ti tao a nalawag ti makitana

⁴Ken mangngegna ti ibagbaga ti Dios. Simumulagatak ket makitak ti parmata nga aggapu iti Dios a Mannakabalin-amin.

⁵Napintas dagiti tolda ti Israel.

⁶Kasda la atiddog nga intar ti palma wenno minuyongan iti igid ti karayan. Kasda la aloe nga immula ti Apo wenno sedro iti igid ti waig.

⁷Addaandanto iti tudo a nabuslon agmuladanto kadagiti mapadanuman a taltalon. Nabilbilegto ngem ni Agag ti arida, lumawanto ti sakupen ti pagturayanna.

⁸Inruar ti Dios ida idiay Egipto. Makiranget gapu kadakuada a kasla atap a baka. Alun-onenda dagiti kabusorda, bungbungtolenda dagiti tultulangda ket tukkotukkolenda dagiti panada.

⁹Mayarig ti nasion iti nabileg a leon a no matmaturog awan makaitured a mangriing kenkuana. Mabendisionan ti mangbendision iti Israel ket mailunod ti mangilunod kenkuana.”

¹⁰Nangmesmes ni Balak gapu iti pungtotna ket kinunana ken ni Balaam, “Pinaayabanka a mangilunod kadagiti kabusorko. Apay a binendisionam ida? Ket namitlo pay!

¹¹Agawidkan! Inkarik a gunggonaanka ngem saan nga impalubos ti Apo.”

¹²Kinuna ni Balaam, “Imbagak kadagiti imbaonmo nga

¹³uray itedmo kaniak ti amin a pirak ken balitok iti palasiom, diak mabalin a sukiren ti Apo; diak mabalin nga aramiden ti saanna a paaramid. Ti laeng ibaga kaniak ti Apo ti ibagak.”

¹⁴Kinuna ni Balaam ken ni Balak, “Agawidakon kadagiti tattaok ngem sakbay nga agawidak, ballaaganka maipapan iti aramiden dagiti Israelita kadagiti tattaom iti masakbayan.”

¹⁵Ket inyebkasna daytoy a padto: “Sao daytoy ni Balaam nga anak ni Beor, padto ti tao a nalawag ti makitana

¹⁶ken mangngegna ti ibagbaga ti Dios, ket awatenna ti pannakaammo nga agtaud iti Kangatoan. Simumulagatak ket makitak ti parmata nga aggapu iti Dios a Mannakabalin-amin.

¹⁷Makitak ti Israel iti masakbayan Addanto ari a tumaud iti dayta a pagilian, Kaslanto naraniag a bituen. Manipud iti Israel, tumpuarto a layap Burakennanto ti ulo ti Moab, ket parmekennanto dagiti amin a tattao ti Set.

¹⁸Agballiginto kadagiti kabusorna iti Edom, ket tagikuaennanto ti dagada ket pumigpigsa latta dagiti Israelita.

¹⁹Ibaddebaddekto ida ti nasion ti Israel, ket ikisapnanto dagiti makalasat.”

²⁰Iti parmata ni Balaam, nakitana dagiti Amalekita ket impadtona daytoy: “Ti Amalec ti kabilgan iti amin a pagilian, ngem iti kamaudiananna mapukawto iti agnanayon.”

²¹Iti parmatana, nakitana dagiti Kineo ket impadtona daytoy: “Natalged ti lugar a pagnaedanyo, natalged a kas iti umok iti nangato a rangkis.

²²Ngem madadaelkayto, dakayo a Kineo, inton italawdakayo a kas balud dagiti Asirio.”

²³Impadto daytoy ni Balaam: “Siasino dagitoy a tattao nga aguummong iti amianan?

²⁴Manipud Chipre, sumangpet dagiti bapor Lugan dagiti umay mangraut; parmekendanto ti Asiria ken Babilonia, ngem uray isuda mapukawdanto iti agnanayon.”

²⁵Kalpasanna, nagawid ni Balaam ket nagturong met ni Balak iti papananna.