Read Iloko Numbers 26 Bible Online

Numbers 26 - Iloko bible

Numbers 26

¹Kalpasan ti didigra, kinuna ni Yahweh kada Moises ken Eleazar nga anak ni Aaron,

²“Bilangenyo amin nga Israelita nga agtawen iti 20 wenno nasursurok pay a mabalin nga agsoldado segun ti familia a nagtaudan ti tunggal maysa.”

³Nagtungpal da Moises ken Eleazar ket inummongda dagiti amin a lallaki nga agtawen iti 20 ken nasursurok pay. Naguummongda iti tanap ti Moab iti ballasiw ti Karayan Jordan a sumango iti Jerico. Dagitoy dagiti Israelita a pimmanaw idiay Egipto:

⁴

⁵Ti tribu ni Ruben (isu ti inauna nga anak ni Jacob): dagiti familia ni Hanoc, Pallu,

⁶Hezron ken Carmi.

⁷Agdagup iti 43,730 dagitoy a kapuonan.

⁸Dagiti kaputotan ni Pallu isuda da Eliab

⁹ken dagiti annakna a Nemuel, Datan ken Abiram. (Da Datan ken Abiram ti pinili idi ti sangkagimongan. Binusorda da Moises ken Aaron ket simmurotda kadagiti pasurot ni Kora idi sinukirda ti Apo.

¹⁰Nagrengngat ti daga ket inalun-onna ida. Nairamanda a natay ken ni Kora agraman dagiti pasurotna idi naikisap ti 250 a lallaki babaen iti apuy. Nagserbi dagitoy a pasamak a ballaag kadagiti tattao.

¹¹Ngem saan a napapatay dagiti annak ni Kora.)

¹²Ti tribu ni Simeon: dagiti familia da Nemuel, Jamin, Jakin,

¹³Zera ken Saul.

¹⁴Agdagup iti 22,200 dagitoy a kapuonan.

¹⁵Ti tribu ni Gad: dagiti familia da Sefon, Haggi, Suni,

¹⁶Ozni, Eri,

¹⁷Arod ken Areli.

¹⁸Agdagup iti 40,500 dagitoy a kapuonan.

¹⁹Ti tribu ni Juda (dua kadagiti annak ni Juda, da Er ken Onan ti natay idiay Canaan):

²⁰dagiti familia da Sela, Perez, Zera,

²¹Hezron ken Hamul.

²²Agdagup iti 76,500 dagitoy a kapuonan.

²³Ti tribu ni Issacar: dagiti familia da Tola, Puva,

²⁴Jasub ken Simron.

²⁵Agdagup iti 64,300 dagitoy a familia.

²⁶Ti tribu ni Zabulon: dagiti familia da Sered, Elon ken Jaleel.

²⁷Agdagup iti 60,500 dagitoy a kapuonan.

²⁸Dagiti tribu ni Jose nga ama da Manases ken Efraim.

²⁹Ti tribu ni Manases: Ni Makir nga anak ni Manases ti ama ni Galaad. Dagitoy a kapuonan ti nagtaud ken ni Galaad:

³⁰dagiti familia ni Jezer, Helek,

³¹Asriel, Sekem,

³²Semida ken Hefer.

³³Awan lalaki nga anak ni Zelofehad nga anak ni Hefer. Pasig a babbai ti annakna: Maala, Noa, Hogla, Milca ken Tirza.

³⁴Agdagup iti 52,700 dagitoy a kapuonan.

³⁵Ti tribu ni Efraim: dagiti familia da Sutela, Beker ken Tahan.

³⁶Nagtaud ken ni Sutela ti familia ni Eran.

³⁷Agdagup iti 32,500 dagitoy a kapuonan. Dagitoy ti familia a nagtaud ken ni Jose.

³⁸Ti tribu ni Benjamin: dagiti familia da Bela, Asbel, Ahiram,

³⁹Sefufam ken Hufam.

⁴⁰Nagtaud ken ni Bela dagiti familia da Ard ken Naaman.

⁴¹Agdagup iti 45,600 dagitoy a familia.

⁴²Ti tribu ni Dan: ti familia ni Husim

⁴³nga agdagup iti 64,400.

⁴⁴Ti tribu ni Aser: dagiti familia da Imna, Isvi ken Beria.

⁴⁵Nagtaud ken ni Beria dagiti familia da Heber ken Malkiel.

⁴⁶Adda babai nga anak ni Aser. Sera ti naganna.

⁴⁷Agdagup iti 53,400 dagitoy a familia.

⁴⁸Ti tribu ni Neftali: dagiti familia da Jazeel, Guni,

⁴⁹Jezer ken Sillem.

⁵⁰Agdagup iti 45,400 dagitoy a familia.

⁵¹Agdagup amin dagiti Israelita a lallaki iti 601,730.

⁵²Kinuna ni Yahweh ken ni Moises,

⁵³“Bingbingayem ti daga, ket itedmo kadagiti tribu segun ti kaaduda.

⁵⁴Bingbingayem ti daga babaen iti binnunot. No dakkel ti tribu, dakkel met ti bingayna ket no bassit ti tribu, bassit met ti bingayna.”

⁵⁵

⁵⁶

⁵⁷Buklen dagiti familia da Gerson, Coat ken Merari ti tribu ni Levi.

⁵⁸Nagtaud dagiti dadduma a familia dagiti Levita kada Libni, Hebron, Mali, Musi ken Kora. Ni Coat ti ama ni Amram

⁵⁹a nangasawa ken ni Jocabed a nayanak idiay Egipto ken anak ni Levi. Annak da Amram ken Jocabed da Aaron, Moises ken Miriam.

⁶⁰Uppat ti lallaki nga annak ni Aaron: Nadab, Abiu, Eleazar ken Itamar.

⁶¹Natay da Nadab ken Abiu idi nangidatonda ken ni Yahweh iti saan a nasagradoan nga apuy.

⁶²Agdagup iti 23,000 dagiti Levita nga adda makabulanna wenno nasursurok pay. Dida nairaman iti listaan dagiti Israelita agsipud ta awan tawidda iti Israel.

⁶³Inlista da Moises ken Eleazar dagitoy a familia idi binilangda dagiti Israelita iti tanap ti Moab iti ballasiw ti Karayan Jordan a sumango iti Jerico.

⁶⁴Kadagiti lallaki a binilang idi da Moises ken Aaron iti Let-ang ti Sinai, awanen ti uray maysa a natda.

⁶⁵Imbaga ni Yahweh a matayda amin idiay let-ang ket pudno a natayda amin malaksid ni Caleb nga anak ni Jefone, ken ni Josue nga anak ni Nun.