Read Iloko Numbers 27 Bible Online

Numbers 27 - Iloko bible

Numbers 27

¹Da Mala, Noa, Hogla, Milca ken Tirza dagiti babbai nga annak ni Zelofehad nga anak ni Hefer nga anak ni Galaad nga anak ni Makir nga anak ni Manases nga anak ni Jose.

²Dimmatagda kada Moises, Eleazar a padi, kadagiti papangulo ken iti sangkagimongan iti ruangan ti Tolda ti Dios, ket kinunada,

³“Natay daydi amami nga awan anakna a lalaki. Saan a nairaman iti bunggoy ni Kora a bimmusor iti Apo. Natay gapu iti basolna.

⁴Gapu ta awan lalaki nga anakna, rumbeng kadi a mapukaw ti naganna iti familiana? Ibingayandakam iti sanikua dagiti kabagian ni amami.”

⁵Inyuman ni Moises ti parikutda ken ni Yahweh.

⁶Kinuna ni Yahweh kenkuana,

⁷“Nainkalintegan ti dawat dagiti annak ni Zelofehad. Patawidam met ida iti sanikua dagiti kabagian ni amada. Itedmo ti tawiden koma ni amada.

⁸Ibagam kadagiti Israelita a no matay ti maysa a tao nga awan anakna a lalaki, ti anakna a babai ti agtawid iti sanikuana.

⁹Ngem no awan ti anakna a babai, dagiti lallaki a kakabsatna ti agtawid iti sanikuana.

¹⁰No awan ti ulitegna, dagiti lallaki a kabsat ti amana ti agtawid.

¹¹No awan lallaki a kakabsatna wenno ulitegna, ti kaasitgan a kabagianna ti agtawid ket alaenna a kas kukuana. Annuroten dagiti Israelita daytoy a linteg kas imbilinko. Siak ni Yahweh.”

¹²Kinuna ni Yahweh ken ni Moises, “Sumang-atka iti Bantay Abarim, ket tannawagam ti daga nga itedko kadagiti Israelita.

¹³Kalpasanna, mataykanto a kas ken ni kabsatmo nga Aaron,

¹⁴agsipud ta sinukiryo a dua ti bilinko idiay let-ang ti Zin. Idi nagsao dagiti tattao iti maibusor kaniak idiay Meriba, diyo binigbig ti nasantoan a pannakabalinko iti imatang dagiti tattao.” (Ti Meriba isu ti ubbog idiay Kades iti let-ang ti Zin.)

¹⁵Nagkararag ni Moises,

¹⁶“O Apo a Dios, a pagtaudan ti amin a biag, dawatek a mangdutokka iti lalaki a makaidalan kadagiti tattao,

¹⁷ken makabilin kadakuada a makigubat, tapno saan a maipada ti ilim kadagiti karnero nga awan pastorda.”

¹⁸Kinuna ni Yahweh ken ni Moises, “Ayabam ni Josue nga anak ni Nun, maysa a tao a makabael, ket ipataymo ti imam iti ulona.

¹⁹Pagtakderem iti sangoanan ni Eleazar a padi ken ti sangkagimongan ket iwaragawagmo nga isu ti sumukat kenka.

²⁰Itedmo kenkuana ti dadduma a turaymo tapno dagiti amin nga Israelita agtulnog kenkuana.

²¹Agpannurayto ken ni Eleazar a padi a makiuman kaniak babaen iti panangaramatna iti Urim ken Tummim. No ania ti ibaga ni Eleazar ken ni Josue, isunto ti aramiden ti gimong ti Israel.”

²²Tinungpal ni Moises ti imbilin kenkuana ni Yahweh. Pinagtakderna ni Josue iti sangoanan ni Eleazar a padi ken ti sangkagimongan.

²³Impatayna ti imana iti ulo ni Josue ket inwaragawagna nga isu ti kasukatna.