Read Iloko Numbers 28 Bible Online

Numbers 28 - Iloko bible

Numbers 28

¹Binilin ni Yahweh ni Moises

²nga ibagana kadagiti Israelita a masapul nga idatagda iti Dios iti naituding a tiempo dagiti inaldaw a daton a mapuoran a nabanglo kenkuana.

³Dagitoy dagiti daton a mapuoran a masapul a maidatag iti Apo. Para iti daton a mapuoran iti inaldaw, dua a kalakian nga urbon ti karnero a maysa ti tawenda ken awan depektoda.

⁴Maidatag ti maysa a karnero iti bigat, ket ti maysa iti sumipnget.

⁵Mapakuyogan ti tunggal karnero iti daton a makan a naaramid iti sangakilo nga arina a nagamay iti sangalitro ti kasayaatan a lana ti olibo.

⁶Daytoy ti inaldaw a daton nga immuna a naidatag idiay Bantay Sinai a daton a mapuoran a nabanglo iti Apo.

⁷Mapakuyogan ti umuna a karnero iti daton a sangalitro nga arak a maibuyat iti altar.

⁸Iti sumipnget, maidaton ti maikadua nga urbon ti karnero ket pakuyogan met iti arak, kas iti daton iti bigat. Daton met a mapuoran daytoy a nabanglo iti Apo.

⁹Iti Aldaw a Panaginana, maidatag ti dua a kalakian a karnero a maysa ti tawenna ken awan depektoda agraman dua a kilo nga arina a nagamay iti lana ti olibo a daton a makan ken ti daton nga arak.

¹⁰Maidatag daytoy a daton a mapuoran iti tunggal Aldaw a Panaginana a mainayon iti inaldaw a daton agraman ti daton nga arak.

¹¹Iti umuna nga aldaw ti tunggal bulan, dagitoy ti idatagyo a daton a mapuoran iti Apo: dua a bumaro a baka, maysa a kalakian a karnero, pito a kalakian a karnero nga agtawen iti maysa ken awan ti depektoda.

¹²Kas daton a makan, mangidatagkayo iti arina a nagamay iti lana ti olibo. Maipakuyog iti tunggal baka ti tallo a kilo nga arina, iti tunggal karnero, dua a kilo,

¹³ket iti tunggal urbon ti karnero, maysa a kilo. Dagitoy dagiti daton a mapuoran a nabanglo iti Apo.

¹⁴Ti daton nga inumen: dua a litro nga arak iti tunggal baka; maysa ket kagudua a litro iti karnero, ket maysa a litro iti tunggal urbon ti karnero. Daytoy ti maannurot iti daton a mapuoran iti umuna nga aldaw ti tunggal bulan.

¹⁵Malaksid ti inaldaw a daton a mapuoran agraman ti daton nga arak, mangidatagkayo met iti kalakian a kalding a daton gapu iti basol.

¹⁶Marambakan iti maika-14 nga aldaw ti umuna a bulan ti Fiesta ti Paskua a pammadayaw iti Apo.

¹⁷Iti maika-15 nga aldaw, mangrugi ti nasantoan a fiesta nga agpaut iti pito nga aldaw. Iti las-ud daytoy a tiempo, dagiti laeng tinapay nga awan lebadurana ti mabalin a kanen.

¹⁸Iti umuna nga aldaw ti fiesta, aguummongkayo nga agdaydayaw, ket awan ti agtrabaho.

¹⁹Mangidatagkayo iti mapuoran a daton a makan iti Apo: dua a bumaro a baka, maysa a kalakian a karnero ken pito a kalakian nga urbon ti karnero a maysa ti tawenda ken awan depektoda.

²⁰Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero,

²¹ken maysa a kilo iti tunggal urbon ti karnero.

²²Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

²³Idatagyo dagitoy a mainayon iti binigat a daton a mapuoran.

²⁴Kasta met nga iti las-ud ti pito nga aldaw, mangidatagkayo iti Apo iti daton a makan a nabanglo kenkuana. Idatonyo daytoy malaksid ti inaldaw a daton a mapuoran ken ti daton nga arak.

²⁵Iti maika-7 nga aldaw, aguummongkayo manen nga agdaydayaw ket awan ti agtrabaho.

²⁶Iti Fiesta ti Apit, no idatagyo dagiti baro nga apit a datonyo iti Apo, aguummongkayo nga agdaydayaw, ket awan ti agtrabaho.

²⁷Mangidatagkayo iti daton a mapuoran a nabanglo iti Apo: dua a bumaro a baka, maysa a kalakian a karnero ken pito nga urbon ti karnero a maysa ti tawenda ken awan depektoda.

²⁸Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero,

²⁹maysa a kilo iti tunggal urbon ti karnero.

³⁰Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

³¹Idatagyo dagitoy agraman ti daton nga arak malaksid laeng ti inaldaw a daton a mapuoran ken daton a makan.