Read Iloko Numbers 3 Bible Online

Numbers 3 - Iloko bible

Numbers 3

¹Daytoy ti familia da Aaron ken Moises idi makisao ni Yahweh ken ni Moises idiay Bantay Sinai.

²Uppat ti annak ni Aaron: Nadab nga inauna, Abiu, Eleazar ken Itamar.

³Naikonsagrarda ket naordenanda a kas papadi

⁴ngem natay da Nadab ken Abiu idi nangidatagda iti saan a nasagradoan nga apuy ken ni Yahweh idiay Let-ang ti Sinai. Awan ti annakda, isu a nagakem da Eleazar ken Itamar a kas papadi bayat ti panagbiag ni Aaron.

⁵Kinuna ni Yahweh ken ni Moises,

⁶“Ipanmo ken ni Aaron a padi dagiti kameng ti tribu ni Levi ket dutokam ida a katulonganna.

⁷Tulonganda ni Aaron ken agserbida iti entero a gimong iti sangoanan ti Tolda ti Dios iti tabernakulo.

⁸Aywananda amin nga alikamen ti Tolda ket aramidenda dagiti annongda kadagiti Israelita.

⁹Ti laeng akem dagiti Levita isu ti panagserbida ken ni Aaron ken kadagiti annakna.

¹⁰Dutokam ni Aaron ken dagiti annakna a mangakem kadagiti pagrebbengan ti kinapadi; mapapatay ti siasinoman nga agannong a padi a saan a kaputotan ni Aaron.”

¹¹Kinuna ni Yahweh ken ni Moises,

¹²“Agpaay kaniak dagiti Levita. Idi pinatayko dagiti amin nga inauna nga anak a lalaki dagiti Egipcio, indatonko a kas kukuak ti inauna nga anak a lalaki iti Israel, tao man wenno animal. Ita, kukuak dagiti Levita a kas sukat dagiti inauna nga annak ti Israel. Siak ni Yahweh.”

¹³

¹⁴Iti Let-ang ti Sinai, imbilin ni Yahweh ken ni Moises

¹⁵a sensusenna dagiti Levita segun ti kapuonanda ken familia a nagtaudanda ket ilistana ti amin a lalaki nga adda makabulannan wenno nasursurok pay.

¹⁶Ket nagtungpal ni Moises.

¹⁷Tallo ti annak ni Levi: Gerson, Coat ken Merari a nagtaudan dagiti familia a nangtawid kadagiti naganda. Dua ti annak ni Gerson: Libni ken Simei; uppat ti annak ni Coat: Amram, Izhar, Hebron ken Uzziel; ket dua met ti annak ni Merari: Mali ken Musi. Isuda ti kapuonan dagiti familia a nangtawid kadagiti naganda.

¹⁸

¹⁹

²⁰

²¹Dua a familia ti mangbukel iti kaputotan ni Gerson: dagiti Libnita ken Simita.

²²Agdagup iti 7,500 dagiti lallaki nga adda makabulandan wenno nasursurok pay.

²³Agkampo daytoy a kapuonan iti likudan ti Tolda iti bangirna ti laud.

²⁴Ipanguloan ida ni Eliasaf nga anak ni Lael.

²⁵Aywananda Tolda ti Dios, iti akin-uneg a linongna, ti akinruar nga abbongna, ti kurtina ti ruangan,

²⁶dagiti bengbeng a nanglikmut iti paraangan iti lawlaw ti Tolda ken ti altar ken ti kurtina ti pagserkan ti paraangan. Aramidenda ti amin a trabaho a mainaig kadagitoy nga alikamen.

²⁷Uppat a familia ti mangbukel iti kaputotan ni Coat: dagiti Amramita, Isharita, Hebronita ken Uzzielita.

²⁸Agdagup iti 8,600 dagiti lallaki nga adda makabulandan wenno nasursurok pay.

²⁹Agkampo daytoy a kapuonan iti bangirna ti abagatan ti Tolda

³⁰iti panangipangulo ni Elisafan nga anak ni Uzziel.

³¹Isuda ti agaywan iti Lakasa ti Tulag, ti lamisaan, ti kandelero, dagiti altar, dagiti alikamen nga aramaten dagiti papadi iti Nasantoan a Disso ken ti kurtina ti ruangan ti Kasasantoan a Disso. Aramidenda ti amin a trabaho a mainaig kadagitoy nga alikamen.

³²Ni Eleazar nga anak ni Aaron a padi ti kangatoan a turayen dagiti Levita. Isu ti mangimaton kadagiti agserserbi iti Nasantoan a Disso.

³³Dua a familia ti mangbukel iti kaputotan ni Merari: dagiti Malita ken Musita.

³⁴Agdagup iti 6,200 dagiti lallaki nga adda makabulandan wenno nasursurok pay.

³⁵Agkampo daytoy a kapuonan iti amianan ti Tolda. Ni Zuriel nga anak ni Abihail ti panguloda.

³⁶Aywananda dagiti maus-usar iti Tolda a kas kadagiti bastidor, dagiti balunetna, adigi, pagbatayan ken amin a kawitna. Aramidenda ti amin a trabaho a mainaig kadagitoy nga alikamen.

³⁷Aywananda pay dagiti adigi, pagbatayan, pasok ken tali nga agpaay iti akinruar a paraangan.

³⁸Agkampo ni Moises ken Aaron ken dagiti annakna iti sango ti Tolda ti Dios iti bangirna ti daya. Isuda ti makaammo iti pannakaibanag dagiti akem iti Nasantoan a Disso iti nagan dagiti Israelita. Mapapatay ti siasinoman a mangaramid kadagiti annongenda.

³⁹Agdagup iti 22,000 ti amin a lallaki a Levita nga adda makabulanna wenno nasursurok pay nga inlista ni Moises segun ti kapuonanda, kas imbilin ti Apo.

⁴⁰Kinuna ni Yahweh ken ni Moises, “Kukuak ti amin nga inauna nga annak a lallaki ti Israel. Ngarud, ilistam ti nagan ti amin nga inauna a lallaki nga Israelita nga adda makabulanna wenno nasursurok pay. Ngem kas sunoda, tagikuaek dagiti amin a Levita! Siak ni Yahweh! Tagikuaek met dagiti animal dagiti Levita a kas suno ti amin nga inauna nga annak dagiti animal.”

⁴¹

⁴²Ket inlista ni Moises ti amin nga inauna nga annak a lallaki

⁴³nga adda makabulanna wenno nasursurok pay; agdagupda iti 22,273.

⁴⁴Kinuna ti Apo ken ni Moises,

⁴⁵“Ita, idatonmo kaniak dagiti Levita a kas suno ti amin nga inauna nga annak dagiti Israelita ken dagiti animal dagiti Levita a kas suno dagiti amin nga inauna nga annak dagiti animal dagiti Israelita.

⁴⁶Ad-adu dagiti inauna nga annak dagiti Israelita ngem dagiti annak dagiti Levita. Agdagup iti 273 ti pagad-aduanda ket masapul a masubbot dagitoy.

⁴⁷Bayadam ti tunggal maysa iti lima a bagi ti pirak segun ti naituding a pagtimbangan

⁴⁸ket itedmo daytoy a kuarta ken ni Aaron ken dagiti annakna.”

⁴⁹Nagtungpal ni Moises ket innalana

⁵⁰ti 1,365 a bagi ti pirak

⁵¹sana inted ken ni Aaron ken dagiti annakna.