Read Iloko Numbers 30 Bible Online

Numbers 30 - Iloko bible

Numbers 30

¹Inted ni Moises dagiti sumaganad a bilin kadagiti pangulo dagiti tribu ti Israel.

²No agkari ti maysa a tao nga adda itedna iti Apo wenno isapatana a dina aramiden ti maysa a banag, masapul a tungpalenna ti karina ket aramidenna ti amin nga imbagana.

³No maysa a balasang nga adda pay la iti sidong dagiti nagannak kenkuana ti agkari wenno agsapata iti Apo,

⁴masapul nga aramidenna ti inkari wenno insapatana, malaksid no madi ti amana apaman a maammoanna.

⁵Ngem no iparit ti amana a tungpalenna ti karina apaman a maammoanna, saan a maipapilit a tungpalenna. Awan ti sungsungbatanna iti Apo agsipud ta imparit ti amana a matungpal ti karina.

⁶No balasang ti agkari, inggagarana man wenno dina napuotan, wenno ikarina a dina aramiden ti maysa a banag ket kalpasanna makiasawa,

⁷masapul nga aramidenna ti karina wenno sinapataanna, malaksid no madi ti asawana apaman a maammoanna daytoy.

⁸Ngem no iparit ti asawana a tungpalenna ti sapatana apaman a maammoanna, saan a mapilit a mangtungpal iti karina. Pakawanento ti Apo.

⁹Masapul a tungpalen ti balo a babai, wenno ti babai a naisina iti asawana, ti insapatana nga aramidenna ken ti insapatana a dina aramiden.

¹⁰No agkari wenno agsapata ti naasawaan a babai,

¹¹masapul nga aramidenna amin nga insapata wenno inkarina, malaksid no madi ti asawana no maammoanna.

¹²Ngem no paritan ti asawana a tungpalenna ti karina no maammoanna, saan a mapilit a mangtungpal iti karina. Pinaritan ti asawana a mangtungpal iti karina; pakawanento ti Apo.

¹³Adda kalintegan ti asawana a mangpatalged wenno mangwaswas iti kari wenno sapata ti babai.

¹⁴Ngem no awan ti masao ti asawana iti aldaw a maammoanna ti karina, masapul nga aramidenna ti amin nga inkarina. Pinatalgedanna ti sapata iti saanna a panangiparit kalpasan a maammoanna daytoy.

¹⁵Ngem no waswasenna ti kari kalpasan ti sumagmamano nga aldaw a pannakaammona, isu ti agsagaba iti dusa ti babai iti dina panangtungpal iti karina.

¹⁶Dagitoy dagiti alagaden nga inted ni Yahweh ken ni Moises maipapan kadagiti sapata ti naasawaan a babai wenno ti awan asawana a babai nga agnanaed iti balay ni amana.