Read Iloko Numbers 32 Bible Online

Numbers 32 - Iloko bible

Numbers 32

¹Adu ti baka dagiti tribu da Reuben ken Gad. Idi makitada ti daga ti Jazer ken Galaad a napintas a pagpastoran,

²napanda ken ni Moises, Eleazar ken dagiti dadduma a pangulo dagiti tattao ket kinunada,

³“Napintas a pagaraban ti baka dagiti ili ti Atarot, Dibon, Jazer, Nimra, Hesbon, Eleale, Sibma, Nebo ken Beon. Daytoy ti lugar a pinarmek ti Apo a pagnaedan dagiti Israelita. Adu ti bakami

⁵ket itedyo koma daytoy a daga a kas bingaymi. Pangngaasiyo ta didakam pagnaeden iti ballasiw ti Karayan Jordan.”

⁶Insungbat ni Moises, “Kayatyo ti agyan ditoy idinto ta mapan makigubat dagiti padayo nga Israelita?

⁷Apay nga upayenyo ida a bumallasiw iti Karayan Jordan tapno mapanda iti daga nga inted ti Apo kadakuada?

⁸Kasta ti inaramid dagidi kapuonanyo idiay Kades Barnea idi imbaonko ida a mangwanawan iti daga.

⁹Dimmanonda iti Tanap ti Escol ket nakitada ti daga ngem idi nagsublida inupayda dagiti tattao a mapan iti daga nga inted kadakuada ti Apo.

¹⁰Iti dayta nga aldaw, nakapungtot ti Apo ket insapatana:

¹¹‘Gapu ta dida nagtalinaed a napudno kaniak, awanto ti agtawen iti 20 wenno nasursurok a rimmuar iti Egipto a sumrek iti daga nga inkarik kada Abraham, Isaac ken Jacob.’

¹²Awanto ti makastrek sadiay, malaksid ni Caleb nga anak ni Jefone a Kenezeo ken ni Josue nga anak ni Nun; nagtalinaedda a napudno iti Apo.

¹³Nakapungtot ti Apo kadagiti tattao ket pinagalla-allana ida iti let-ang iti las-ud ti 40 a tawen agingga a natay dayta a kaputotan a nagbasol kenkuana.

¹⁴Ita, kayatyo a tuladen ti inaramid dagiti kapuonanyo. Kayatyo kadi nga agdissuor manen ti pungtot ti Apo iti Israel? Dakeskayo la unay, dakayo a baro a kaputotan!

¹⁵Dakayo iti tribu ni Ruben ken Gad, no diyo kayat ti sumurot ita iti Apo, baybay-anna manen dagitoy a tattao iti let-ang ket dakayo ti akimbasol iti pannakadadaelda amin.”

¹⁶Immasidegda ken ni Moises ket kinunada, “Mangbangonkami pay kadagiti pagaponan dagiti karneromi ken nasarikedkedan nga ili a pagnaedan dagiti familiami.

¹⁷Kalpasanna, sisasaganakamton a kumuyog kadagiti padami nga Israelita iti paggugubatan ken mangipangulo iti iraraut agingga a maipanmi ida iti daga a naituding kadakuada. Kabayatanna, mabalin dagiti familiami ti agnaed ditoy kadagiti nasarikedkedan nga ili ket dinto an-anoen ida dagiti tattao iti daytoy a daga.

¹⁸Dikamto agsubli no saan a matagikua dagiti dadduma nga Israelita ti daga a naipatawid kadakuada.

¹⁹Saankaminton a makibingay iti daga iti ballasiw ti Jordan gapu ta adda bingaymin iti dayaen ti Jordan.”

²⁰Insungbat ni Moises, “No pudno ti saoyo, agsaganakayo ngarud a makigubat iti imatang ti Apo.

²¹Masapul a ballasiwen dagiti amin a soldadoyo ti Karayan Jordan ket babaen iti panangidalan ti Apo, rautenda dagiti kabusortayo agingga a parmeken ida ti Apo

²²ket tagikuaenna ti daga. Kalpasanna, mabalinyon ti agsubli gapu ta tinungpalyo ti rebbengenyo iti Apo ken kadagiti padayo nga Israelita. Bigbigento ti Apo a kukuayo daytoy a daga iti daya ti Jordan.

²³Ngem no diyo tungpalen ti kariyo, ipakpakaunak nga agbasolkayo iti Apo. Uray kitaenyo, awan duadua a madusakayto gapu iti basolyo.

²⁴Sige, bangonenyo dagiti iliyo ken dagiti pagaponan dagiti karneroyo ngem tungpalenyo ti inkariyo.”

²⁵Kinuna dagiti lallaki iti tribu da Gad ken Ruben, “Apo, tungpalenmi ti bilinmo.

²⁶Agbati kadagiti ili ti Galaad dagiti assawa ken annakmi ken dagiti baka ken karneromi.

²⁷Ngem sisasaganakami amin a makigubat iti babaen ti panangidalan ti Apo. Bumallasiwkami iti Jordan a mapan makigubat kas iti kinunam.”

²⁸Ngarud, imbilin ni Moises kada Eleazar, Josue, ken kadagiti dadduma a pangulo ti Israel,

²⁹“No ballasiwen dagiti tattao iti tribu da Gad ken Ruben ti Karayan Jordan a sisasagana a makigubat iti panangidalan ti Apo ket no babaen iti tulongda, maparmekyo ti daga, itedyo ngarud ti daga ti Galaad a tagikuaenda.

³⁰Ngem no dida bumallasiw tapno tulongandakayo a makigubat, masapul a makibingayda kadakayo iti daga ti Canaan.”

³¹Kinuna dagiti lallaki iti tribu da Gad ken Ruben, “Apo, tungpalenmi ti imbilin ti Apo.

³²Iti babaen ti panangidalanna, bumallasiwkami iti Jordan a mapan iti daga ti Canaan ket makigubatkami tapno mapagtalinaedmi ti dagami ditoy daya ti Jordan.”

³³Iti kasta, inted ni Moises kadagiti tribu da Gad ken Ruben ken iti kagudua ti tribu ni Manases ti amin a daga a sakup ni Sihon nga ari dagiti Amorreo ken ni Og nga ari ti Basan, agraman dagiti kabangibang nga ili ken away.

³⁴Binangon manen ti tribu ni Gad dagiti nasarikedkedan nga ili ti Dibon, Atarot, Aroer,

³⁵Atrot Sofan, Jazer, Jogbeha,

³⁶Bet Nimra, ken Bet Haran.

³⁷Binangon manen ti tribu ni Ruben dagiti ili ti Hesbon, Eleale, Kiriataim,

³⁸Nebo, Baal Meon (nabaliwan daytoy a nagan) ken Sibma. Inikkanda ti baro a nagan dagiti ili a binangonda manen.

³⁹Rinaut dagiti kaputotan ni Makir nga anak ni Manases ti daga ti Galaad. Sinakupda ti daga ket pinagtalawda dagiti Amorreo nga agnaed sadiay.

⁴⁰Inted ni Moises ti daga ti Galaad kadagiti kapuonan ni Makir ket nagnaedda sadiay.

⁴¹Rinaut ken sinakup ni Jair iti tribu ni Manases ti sumagmamano a barrio ket pinanagananna ida iti Barbarrio ni Jair.

⁴²Rinaut ken sinakup ni Noba ti Kenat ken dagiti barriona ket pinanagananna ti ili iti Noba nga impasurot iti naganna.