Read Iloko Numbers 36 Bible Online

Numbers 36 - Iloko bible

Numbers 36

¹Naguummong dagiti pangulo iti tunggal familia iti kaputotan ni Galaad nga anak ni Makir ken apoko ni Manases nga anak ni Jose. Dimmatagda ken ni Moises ken kadagiti dadduma a pangulo

²ket kinunada, “Binilinnakayo ti Apo a bingayenyo ti daga babaen iti binnunot ket ibunongyo kadagiti Israelita. Imbilinna pay nga itedyo ti sanikua ni Selofehad a kabagianmi kadagiti annakna a babbai.

³Ngem laglagipenyo a no makiasawada iti saanda a katribuan, alaen dayta a tribu ti dagada ket bumassit ti tawidmi.

⁴Inton dumteng ti Tawen a Panagisubli ket maisubli dagiti amin a nailako a sanikua kadagiti sigud nga akinkukua, mainayonto ti bingay dagiti annak ni Selofehad iti daga ti tribu a nakayasawaanda. Iti kasta, agnanayon a kukuadan ti daga ket maibilang a pukaw ti tribumi.”

⁵Ngarud, inted ni Moises daytoy a bilin ni Yahweh kadagiti Israelita. Kinunana, “Pudno ti kuna dagiti tattao iti tribu ni Manases.

⁶Ibilin ngarud ti Apo a nawaya dagiti annak ni Selofehad a makiasawa iti siasinoman no la ket katribuanda.

⁷Saan a mabalin nga alaen ti sabali a tribu ti daga ti sabali a tribu.

⁸Ket ti babai nga adda tawidna a daga iti tribuna, masapul a makiasawa iti katribuanna tapno pagtitinnawidan dagiti Israelita ti sanikua dagiti kapuonanda.

⁹Saan a mabalin a mayakar ti bingay ti tribu iti sakup ti sabali a tribu. Agtalinaed a kukua ti tribu ti bukodna a daga.”

¹⁰Tinungpal da Maala, Tirza, Hogla, Milca ken Noa nga annak ni Selofehad ti bilin ti Apo ken ni Moises. Nakiasawada kadagiti kakasinsinda

¹²a kameng iti tribu ni Manases nga anak ni Jose ket nagtalinaed ti sanikuada iti tribu ti amada.

¹³Dagitoy dagiti alagaden ken linteg nga inted ni Yahweh ken ni Moises nga agpaay kadagiti Israelita iti tanap ti Moab iti ballasiw ti Jordan iti batog ti Jerico.