Read Iloko Numbers 5 Bible Online

Numbers 5 - Iloko bible

Numbers 5

¹Kinuna ni Yahweh ken ni Moises,

²“Bilinem dagiti Israelita a pagtalawenda iti kampo ti amin nga agkukutel wenno agtuttutot iti aniaman a paset ti bagida ken amin a narugit iti imatang ti linteg gapu iti panangsagidda iti bangkay.

³Iruaryo dagitoy a tattao a maibilang a narugit tapno dida tulawan ti kampo a pakipagnaedak kadagiti tattaok.”

⁴Nagtungpal dagiti Israelita ket pinagtalawda amin ida iti kampo.

⁵Inted ni Yahweh ken ni Moises

⁶dagiti sumaganad nga alagaden nga agpaay kadagiti Israelita. No adda agaramid iti dakes iti padana a tao, salungasingenna ti Apo ket makabasol.

⁷Masapul nga ipudnona ti basolna, bayadanna ti maikeddeng a gatad ket nayonanna pay iti apagkalima a paset daytoy. Maited ti pagbayadna iti nakabasolanna.

⁸Ngem no natay ti tao ket awan ti asideg a kabagianna, maidatag ti pagbayad iti Apo tapno agpaay iti padi, agraman kalakian a karnero a mausar iti seremonia ti pannakadalus gapu iti basolna.

⁹Maysa pay, kukua ti padi a pangyawatanda ti amin a naisangsangayan a sagut dagiti Israelita iti Apo.

¹⁰Alaen ti padi dagiti daton a maited kenkuana.

¹¹Imbilin ni Yahweh ken ni Moises

¹²nga itedna dagitoy nga alagaden kadagiti Israelita. Kas pagarigan lipliputan ti maysa a babai ti asawana babaen iti pannakikaiddana iti sabali a lalaki. Ngem saan a mapaneknekan ti lalaki gapu ta awan ti saksi ket dina matiliwan ti asawana iti akto. Wenno kas pagarigan agatap ti lalaki nga adda dakes nga aramid ti asawana idinto a napudno kenkuana ti babai.

¹⁵Kadagitoy a banag, masapul nga idatag ti lalaki ti asawana iti padi. Mangitugot met iti sangakilo nga arina a sebada a naituding a daton. Ngem dina laokan daytoy a daton iti lana ti olibo wenno ikkan iti insenso agsipud ta maidatag gapu iti panagatap, maysa a daton a mangkiddaw a madusa ti babai no nakabasol.

¹⁶Pagtakderen ti padi ti babai iti sango ti altar.

¹⁷Mangikabil ti padi iti nasantoan a danum iti maysa a bakka sana laokan iti daga manipud iti datar ti Tolda ti Dios.

¹⁸Wakrayenna ti buok ti babai ket ikabilna kadagiti imana ti daton nga arina. Iggaman ti padi ti bakka a nakaikargaan ti napait a danum a mangyeg iti lunod.

¹⁹Kalpasanna, pagsapataenna ti babai: “No dimo liniputan ti asawam, dimo sagabaen ti lunod a yeg daytoy a danum.

²⁰Ngem no adda dakes nga aramidmo,

²¹dusaennaka koma ti Apo tapno maballaagan dagiti kailiam. Kumbet koma ti mabagbagim ket bumsog ti tianmo.

²²Sumrek koma daytoy a danum iti tianmo a pakaigapuanna a bumsog ken pakaigapuan ti panagkebbet ti mabagbagim.” Kastoyto ti sungbat ti babai, “Sapay koma ta kasta; kasta koma ti aramiden ti Apo.”

²³Isurat ti padi dagitoy a lunod iti maysa a pagsuratan nga itanebna iti napait a danum tapno mapunas ti naisurat.

²⁴Ipainumnanto iti babai ti napait a danum ti lunod. Ket umunegto kenkuana ti danum a mangyeg iti nakaro a panagsagaba.

²⁵Alaen ti padi ti daton nga arina kadagiti ima ti babai, itayagna a kas pangidatonna iti Apo ket idatagna iti altar.

²⁶Kalpasanna, mangrakem iti daton ket puoranna iti altar. Kamaudianna, ipainumna ti danum iti babai.

²⁷No liniputanna ti asawana, marikna ti babai ti nakaro nga ut-ot gapu iti ininumna, bumsog ti tianna ket kumbet ti mabagbagina. Makarimonto ti naganna kadagiti kailianna.

²⁸Ngem no awan ti basolna, awan ti pakaan-anoanna ket mabalinnanto ti aganak.

²⁹Daytoy ti linteg a maannurot no agimon ti lalaki ket atapenna a makikakaidda ti asawana iti sabali a lalaki. Maayaban ti babai nga agtakder iti sango ti altar ket aramiden ti padi daytoy a seremonia.

³¹Awan basol ti asawa a lalaki ngem ti nagbasol a babai ti masapul a madusa.