Read Iloko Numbers 6 Bible Online

Numbers 6 - Iloko bible

Numbers 6

¹Binilin ni Yahweh ni Moises

²nga ipaulogna dagitoy nga alagaden kadagiti Israelita. No adda naisangsangayan a sapata ti maysa a lalaki wenno babai nga agbalin a Nazireo ket idatonna ti bagina iti Apo,

³masapul a di uminum iti arak wenno aniaman a makabartek. Maiparit kenkuana ti aniaman nga inumen a nagtaud iti ubas wenno mangan iti ubas wenno pasas.

⁴Iti las-ud ti tiempo ti sapatana, saan a mangan iti aniaman a naggapu iti ubas, uray pay iti bukel wenno ukisna.

⁵Bayat ti panagbalinna a Nazireo, saan nga agpukis wenno agibarbas. Bay-anna nga umatiddog ti buok wenno barbasna tapno di masalungasing ti sapata a pannakaidatonna iti Apo.

⁶Ti buokna ti pagilasinan a naidaton iti Dios ket masapul a dina tulawan ti bagina iti yaasidegna iti bangkay, uray ti bangkay ti amana, inana, wenno kabsatna.

⁸Bayat ti panagtalinaedna a Nazireo, naidaton iti Apo.

⁹No adda tao a kellaat a matay iti abay ti maysa a Nazireo, matulawan ti naidaton a buokna; masapul nga aguray iti pito nga aldaw sa agpakalbo ken agibarbas tapno maibilang a nadalus iti imatang ti linteg.

¹⁰Iti maikawalo nga aldaw, mangipan iti dua a kalapati wenno dua a pagaw iti ruangan ti Tolda ti Dios.

¹¹Idatag ti padi ti maysa a tumatayab a daton gapu iti basol ken ti maysa a kas daton a mapuoran—daytoy ti seremonia ti pannakadalusna gapu iti pannakasagidna iti bangkay. Iti dayta met la nga aldaw, idatonna manen ti buokna

¹²iti Apo, kasta met ti tiempona a kas Nazireo. Saan a maibilang daydi tiempona a pannakaidatonna ta natulawan ti buokna. Kas daton a pagsupapak, mangidatag iti karnero a maysa ti tawenna.

¹³No maturpos dagiti aldaw ti sapatana a kas Nazireo, aramidenna dagitoy sumaganad: Mapan iti ruangan ti Tolda ti Dios

¹⁴ket mangidaton iti tallo a karnero nga awan depektoda; maysa a kalakian a maysa ti tawenna a kas daton a mapuoran; maysa a kabaian a maysa ti tawenna a daton gapu iti basol ken maysa a kalakian a daton a pakikappia.

¹⁵Malaksid dagitoy, mangidaton pay iti sangabasket a tinapay nga awan lebadurana ken naaramid iti arina a nalaokan iti lana ti olibo, ken naiingpis a kankanen a napulagidan iti lana ti olibo. Mangitugot met kadagiti daton a makan ken arak.

¹⁶Idatag ida ti padi iti Apo ket idatagna ti daton a maipaay iti basol ken ti daton a mapuoran.

¹⁷Idatonna ti kalakian a karnero a daton a pakikappia, agraman ti sangabasket a tinapay ken dagiti daton a makan ken arak.

¹⁸Mapan ti Nazireo iti ruangan ti Tolda ti Dios ket kuskosanna ti buokna; kalpasanna, ipurruakna ti buok iti apuy a pakapupuoran ti daton a pakikappia.

¹⁹Alaen ti padi ti naanger nga abaga ti karnero, agraman maysa a tinapay ken maysa a kankanen sana ikabil kadagiti ima ti Nazireo.

²⁰Isaruno ti padi nga idatag dagitoy a kas naisangsangayan a sagut iti Apo. Nasagradoanda a daton para iti padi, agraman ti barukong ken saka ti karnero nga ituding ti linteg a kukua ti padi. Kalpasanna, mabalinen ti Nazireo ti uminum iti arak.

²¹Dagitoy ti alagaden nga agpaay kadagiti Nazireo. Ngem no ikari ti Nazireo ti mangted iti daton a nayon ti daton a rebbengna nga ited, masapul a tungpalenna ti inkarina.

²²Imbilin ni Yahweh ken ni Moises

²³nga ibagana ken ni Aaron ken kadagiti annakna nga aramatenda dagitoy a balikas no bendisionanda dagiti Israelita:

²⁴Bendisionannakayo koma ti Apo ket aywanannakayo;

²⁵Kaasiannakayo koma ti Apo ket paraburannakayo;

²⁶Kitaennakayo koma a siaayat ti Apo ket ikkannakayo iti talna.

²⁷Kinuna ni Yahweh, “Kastoy ti panangaramatda iti naganko iti pamendisionda kadagiti tattao ti Israel, ket paraburakto ida.”