Read Iloko Numbers 8 Bible Online

Numbers 8 - Iloko bible

Numbers 8

¹Kinuna ni Yahweh ken ni Moises,

²“Ibagam ken ni Aaron a no isaadna dagiti pito a pagsilawan iti kandelero, masapul a lawaganda ti sango ti kandelero.”

³Nagtungpal ni Aaron ket inkabilna dagiti pagsilawan tapno lawaganda ti sango ti kandelero.

⁴Naaramid ti kandelero iti napitpit a balitok, manipud puon agingga kadagiti ungkayna, kas mayannurot iti pagtuladan nga impakita ni Yahweh ken ni Moises.

⁵Kinuna ni Yahweh ken ni Moises,

⁶“Ilasinmo dagiti Levita kadagiti dadduma nga Israelita ket aramidem ti seremonia ti pannakadalusda

⁷iti kastoy a wagas: warsiam ida iti danum a pagdalus ket pakiskisam ti entero a bagida ken palabaam ti pagan-anayda. Kalpasanna, agbalindan a nadalus iti imatang ti linteg.

⁸Mangalada iti bumaro a baka ken ti naituding a daton a makan nga arina a nagamay iti lana ti olibo; mangalaka iti sabali a baka a maidaton gapu iti basol.

⁹Ummongem ti entero a gimong ti Israel ket idatagmo dagiti Levita iti sangoanan ti Tolda.

¹⁰Ipatay dagiti Israelita dagiti imada iti ulo dagiti Levita;

¹¹kalpasanna, idaton ni Aaron dagiti Levita a naisangsangayan a sagut dagiti Israelita tapno agserbida kaniak.

¹²Ipatay dagiti Levita ti imada iti ulo dagiti dua a baka; maysa ti maidatag a daton gapu iti basol ket ti maikadua kas daton a mapuoran kas annongen ti seremonia ti pannakadalus dagiti Levita.

¹³“Idatonmo dagiti Levita a naisangsangayan a sagut kaniak ket dutokam ni Aaron ken dagiti annakna a mangimaton kadakuada.

¹⁴Kastoy ti panangilasinmo kadagiti Levita kadagiti dadduma nga Israelita tapno agbalinda a kukuak.

¹⁵Kalpasan ti panangdalusmo kadakuada kas mayannurot iti linteg ken panangidatonmo ida, mangrugidan nga agserbi iti Tolda.

¹⁶Innalak ida a kas suno ti amin nga inauna nga annak a lallaki dagiti Israelita ket siak laeng ti akinkukua kadakuada.

¹⁷Idi pinatayko ti amin nga inauna nga annak idiay Egipto, indatonko a kas kukuak ti amin nga inauna nga anak iti Israel, annak man dagitoy ti tao wenno animal.

¹⁸Alaek dagiti Levita a kas sukat dagiti inauna nga annak dagiti Israelita.

¹⁹Ikabilko dagiti Levita iti babaen ni Aaron ken dagiti annakna, kas sagut dagiti Israelita, tapno agserbida iti Tolda a Paguummongan. Tumulongda iti pannakaidaton kadagiti sagut a mangikkat kadagiti basol dagiti Israelita tapno mayadayoda iti didigra nga agdissuor kadakuada no umasidegda iti Nasantoan a Disso.”

²⁰Indaton ngarud da Moises, Aaron ken amin nga Israelita dagiti Levita kas imbilin ni Yahweh ken ni Moises.

²¹Dinalusan dagiti Levita dagiti bagida kas mayannurot iti linteg ken linabaanda dagiti pagan-anayda ket indaton ida ni Aaron a kas naisangsangayan a sagut ken ni Yahweh. Inannongna pay ti seremonia ti pannakadalusda.

²²Inaramid dagiti tattao ti imbilin ni Yahweh ken ni Moises maipapan kadagiti Levita. Ngarud, mabalinen dagiti Levita ti agserbi iti Tolda ti Dios iti babaen ni Aaron ken dagiti annakna.

²³Kinuna ni Yahweh ken ni Moises,

²⁴“No agtawenen ti Levita iti 25, mangrugin nga agserbi iti Tolda a Paguummongan

²⁵ket no madanonnan ti 50, agretiron.

²⁶Kalpasan dayta, mabalinna ti tumulong kadagiti padana a Levita kadagiti annongda iti Tolda ngem dina mabalin ti agaramid iti aniaman a panagserbi a maymaysana. Kastoy ti panangitudingmo iti annong dagiti Levita.”