Read Iloko Numbers 9 Bible Online

Numbers 9 - Iloko bible

Numbers 9

¹Nagsao ni Yahweh ken ni Moises idiay Let-ang ti Sinai iti umuna a bulan ti maikadua a tawen kalpasan ti ipapanaw dagiti Israelita idiay Egipto. Kinunana,

²“Iti sumipnget, iti maika-14 nga aldaw iti daytoy a bulan, mangrugi a ngilinen dagiti Israelita ti Fiesta ti Paskua, kas mayannurot iti amin a linteg ken alagaden iti pannakarambakna.”

⁴Imbaga ngarud ni Moises kadagiti tattao a rambakanda ti Fiesta ti Paskua.

⁵Rinambakanda iti sumipnget iti maika-14 nga aldaw iti umuna a bulan iti Let-ang ti Sinai. Tinungpal dagiti tattao ti amin nga imbilin ni Yahweh ken ni Moises.

⁶Ngem adda lallaki a maibilang a narugit iti imatang ti linteg ta nakasagidda iti bangkay ti maysa a tao. Gapu iti daytoy, dida mabalin ti makipagrambak iti Paskua iti dayta nga aldaw. Dimmatagda ken ni Moises ken ni Aaron.

⁷Kinunada, “Maibilangkami a narugit ta nakasagidkami iti bangkay ngem dimi kadi mabalin ti agidaton iti Apo a kas kadagiti dadduma nga Israelita?”

⁸“Aguraykayo,” insungbat ni Moises, “ta ammoek ti bilin ti Apo.”

⁹Imbaga ni Yahweh ken ni Moises

¹⁰nga ipakaammona daytoy kadagiti Israelita, “No adda kadakayo wenno dagiti kaputotanyo ti maibilang a narugit gapu ta nagsagid iti bangkay wenno adda iti adayo nga agbibiahe, mabalinna pay laeng a rambakan ti Fiesta ti Paskua.

¹¹Ngem agrambakkayo kalpasan ti makabulan, iti sumipnget iti maika-14 nga aldaw. Iti dayta a rabii, mangankay iti tinapay nga awan lebadurana ken napait a bulbulong.

¹²Awan ti ipabigatyo iti taraon ket diyo tukkolen ti aniaman a tulang ti animal. Ngilinenyo ti Paskua nga annurotenyo ti amin nga alagaden.

¹³Ngem ti siasinoman a narugit iti imatang ti linteg ken saan a nagbiahe a mangrambak iti Fiesta ti Paskua, mailaksid kadagiti tattaok ta dina indaton kaniak ti daton iti naituding a tiempo. Masapul a sagabaenna ti dusa ti basolna.

¹⁴“Mabalin ti ganggannaet nga agnaed kadakayo ti makipagrambak iti Fiesta ti Paskua no la ket annurotenna ti amin a linteg ken alagaden ti pannakarambakna. Maymaysa ti linteg a suroten ti amin, ganggannaet man wenno Israelita.”

¹⁵Iti aldaw a nalpas a nabangonen ti Tolda ti Dios, adda ulep a nangabbong iti Tolda. Iti rabii, kasla apuy ti ulep.

¹⁷Tunggal agpangato ti ulep, umalis dagiti Israelita ket agkampoda manen iti lugar a pagdissoan ti ulep.

¹⁸Umalisda iti pagkampoanda wenno agkampoda kas mayannurot iti bilin ni Yahweh. No adda ti ulep iti ngatoen ti Tolda, agtalinaedda iti kampo.

¹⁹No mabayag ti panagyan ti ulep iti ngatoenna, tungpalenda ni Yahweh ket agtalinaedda iti kampoda.

²⁰No dadduma, agyan ti ulep iti ngatoen ti Tolda iti sumagmamano nga aldaw; mabayag man wenno mabiit, agyanda iti kampo wenno umalisda iti pagkampoan segun ti bilin ni Yahweh.

²¹No dadduma, agtalinaed ti ulep manipud iti sumipnget agingga iti bigat ket agluasda apaman nga agpangato. No agpangato ti ulep, magnada.

²²Uray no dua nga aldaw, makabulan, makatawen wenno nasursurok pay, no agtalinaed ti ulep iti ngatoen ti Tolda, saanda nga umak-akar; ngem no agpangato, agluasda.

²³Agkampoda wenno umakarda kas mayannurot iti bilin ni Yahweh ken ni Moises.