Read Iloko Micah 1 Bible Online

Micah 1 - Iloko bible

Micah 1

¹Linaon daytoy a libro ti mensahe ni Yahweh ken ni Mikias a taga-Moreset idi panawen ti panagari da Jotam, Ahaz ken Hezekias iti Juda. Dagitoy ti impakaammo ni Yahweh kenkuana maipapan iti Samaria ken Jerusalem.

²Dumngegkayo, dakay amin a tattao; denggenyo daytoy, dakay amin nga agnaed iti daga! Agsaksi ti Apo a Dios iti maibusor kadakayo; agsao manipud iti nasantoan a templona.

³Rummuar iti nasantoan a taengna; umulog ket magna iti tapaw dagiti bantay.

⁴Margaay dagiti bantay a payatanna; malunagda a kas allid, ket agayusda a kas danum nga agtinnag iti derraas.

⁵Mapasamak amin dagitoy agsipud ta nagbasol dagiti Israelita ket tinallikudanda ti Dios. Siasino ti akimbasol iti panagtallikud ti Israel? Dagiti tattao ti Samaria! Siasino ti nagdaydayaw kadagiti didiosen idiay Juda? Dagiti tattao ti Jerusalem!

⁶Ngarud, kastoy ti kuna ti Apo, “Pagbalinek ti Samaria a nagrebbaan iti away nga ubas laeng ti mabalin nga imula. Igabsuonko dagiti narba a bato ti siudad kadagiti tanap tapno agparang dagiti fondasionna.

⁷Maburburak dagiti napateg nga imahen sadiay, ket mapuoran dagiti amin nga indaton dagiti agserserbi kadagiti didiosen, ken maiwarawara a kas rugit dagiti amin nga imahen. Nagtaud dagitoy kadagiti tangdan dagiti agserserbi kadagiti didiosen, ket ita, maipanda met kadagiti agserserbi kadagiti didiosen iti sabali a lugar.”

⁸Kinuna ni Mikias, “Gapu iti daytoy, agasug ken agdung-awak. Magnaak a sakasaka ken lamolamo a mangipakita iti ladingitko. Agtaguobak a kas iti atap nga aso ken agdung-awak a kas iti abestrus.

⁹Ngamin, saan a maagasan ti sugat ti Samaria. Dandani sagabaenen daytoy ti Juda ket dimmanonen kadagiti ruangan ti Jerusalem a pagnaedan dagiti tattaok.”

¹⁰Diyo ibagbaga kadagiti kabusortayo idiay Gat ti pannakaparmektayo. Diyo ipakita kadakuada ti panagsangityo. Tattao iti ili ti Afra, ipakitayo ti ladingityo babaen iti panagtulidyo iti tapok!

¹¹Tattao ti Safir, inkayo iti sabali a daga. Inkayo a silalamolamo ket nakababain ti kasasaadyo. Awan ti makaruar a sibibiag kadagiti umili ti Zaanan. Inton mangngegyo ti panagdung-aw dagiti tattao ti Bet-ezel, maammoanyo nga awan pagkamangan sadiay.

¹²Agur-uray a sigagagar iti tulong dagiti tattao ti Marot, gapu ta indissuor ti Apo ti didigra iti asideg ti Jerusalem.

¹³Dakayo a tattao ti Lakis, ipakoyo dagiti kabalioyo kadagiti lugan a pakigubat. Dakayo ti nangisungsong nga agbasol ti Jerusalem, ta tinuladyo ti dakes nga aramid ti Israel.

¹⁴Ita, dakayo a taga-Juda, agpakadakay iti ili ti Moreset-Gat. Awan ti tulong a mauray dagiti ari ti Israel nga aggapu iti ili ti Akzib.

¹⁵Tattao ti Maresa, imbaga ti Apo a yawatnakayo iti kabusor a mangsakup iti iliyo. Mapanto aglemmeng dagiti pangulo ti Israel iti rukib ti Adullam.

¹⁶Tattao ti Juda, pakuskosanyo dagiti uloyo a mangipakita iti ladingityo. Dung-awanyo dagiti patpatgenyo nga annak. Wen, kuskosanyo dagiti uloyo a kas iti ulo ti tumatayab a buitre, ta maipanaw dagiti annakyo a kas balud iti sabali a daga.