Read Iloko Micah 2 Bible Online

Micah 2 - Iloko bible

Micah 2

¹Nakabutbutengto ti pagbanagan dagiti agpatpatnag nga agpanggep nga agaramid iti dakes! Nasapada nga agriing tapno ibanagda dagiti planoda apaman nga adda gundawayda.

²No adda talon a kayatda, alaenda latta. No adda balay a tarigagayanda, agawenda. Awan ti saanda a samsamen, familia man wenno sanikua.

³Isut' gapuna a kuna ti Apo, “Adda didigra nga isagsaganak nga idissuor kadakayo ket awanto ti makalasat. Dikayton magna a sipapalangguad inton dumteng ti aldaw a panagsagabayo.

⁴Inton dumteng dayta a tiempo, aramatento dagiti tattao ti napasamak kadakayo a kas pangngarig ti didigra. Ikantadanto daytoy nasaem a kanta: “Nadadaelkami a namimpinsan. Innala ni Yahweh ti dagami, ket intedna kadagiti nangitalaw kadakami a kas balud!”

⁵Ngarud, awanto kadakayo ti umawat iti daga a pannakabingayna inton aldaw ti pannakaibunongda kadagiti tattao ti Apo.

⁶Kasabaandak dagiti tattao, ket kunada, “Dinakami man kaskasabaan. Dimo ibagbaga dagita. Dinakamto ibabain ti Dios.

⁷Nailunod aya dagiti Israelita? Naibus kadin ti anus ti Apo? Maaramidna aya dagita? Nasayaat ti saona kadagiti agaramid iti naimbag.”

⁸Isungbat ti Apo, “Ngem pagbalinenyo dagiti bagbagiyo a kabusor dagiti tattaok. Agawenyo ti kagay dagiti nasingpet a tattao a naggapu iti paggugubatan a mangipagarup nga awanen ti pagpeggadanda.

⁹Pagtalawenyo dagiti babbai kadagiti tattaok kadagiti taeng nga ipatpategda. Rinabsutyo ti bendision nga impaayko kadagiti annakda.

¹⁰Tumakderkayo ket pumanawkayo; saan a paginanaan daytoy a lugar. Gapu iti basol, nakaam-amak a pannakadadael ti mapagtengyo.

¹¹“Kaykayat dagitoy a tattao ti profeta a mangiwarwaras iti ulbod ken mangal-allilaw ket kunana, ‘Ipadtok nga agayus kadakayo ti arak ken naingel nga inumen.’

¹²“Ngem ummongenkayto, dakay amin nga Israelita, dakay amin a natda. Pagmaymaysaenkayto a kas kadagiti karnero a mayapon iti koral. Kas iti kaadu ti arban iti pagpaaraban, mapnonto manen ti dagayo iti adu a tattao.”

¹³Luktanto ti Dios ti ruangan ket iruarna ida. Agdadarisondanto iti ruangan ti siudad ket rummuarda a siwawaya. Ninto Yahweh nga arida ti mangidalan kadakuada.