Read Iloko Micah 3 Bible Online

Micah 3 - Iloko bible

Micah 3

¹Denggendak, dakayo nga agturay iti Israel. Rumbeng koma a dakayo ti mangipakat iti hustisia,

²ngem saan met, ta guraenyo ti naimbag ket ayatenyo ti dakes. Lalatenyo a sibibiag dagiti tattaok. Ilapenyo ti lasagda kadagiti tulangda.

³Lamutenyo dagiti tattaok. Lapgisenyo ti kudilda, tukkolenyo dagiti tultulangda ket tadtadenyo ida a kas iti karne a maipisok iti kaldero.

⁴Dumtengto ti tiempo nga umasugkayo iti Apo ngem dinakayto ipangag. Dinanto denggen dagiti kararagyo, ta dakes ti inaramidyo.

⁵Al-allilawen dagiti profeta dagiti tattaok. Ikarida nga adda talna no la ket mabayadanda. Ngem no saanda a maikkan iti kuarta, butbutngenda dagiti tattao ket ibagada nga adda dumteng a gubat. Kastoy ti kuna ti Apo kadagitoy a profeta,

⁶“Gapu ta yaw-awanyo dagiti tattaok, awanton dagiti parmatayo ket diyonton kabaelan ti agipadto. Dakayo a profeta, dandanin aggibus ti aldawyo. Lumneken ti init kadakayo.”

⁷Maibabainto dagiti mangibaga iti mapasamak iti masakbayan ta saan a matungpal dagiti ipadtoda. Maupaydanto agsipud ta saan ida a sungbatan ti Dios.

⁸Ngem no maipapan kaniak, punnoennak ti espiritu ti Apo ken iti pannakabalinna, ipakaammona kaniak ti hustisia ket paturdennak a mangibutaktak iti basol dagiti Israelita.

⁹Denggendak, dakayo nga agtuturay iti Israel, dakayo a manggura iti kinahustisia ken mangkillo iti nalinteg.

¹⁰Bangonenyo ti Jerusalem a siudad ti Dios babaen iti panagpapatay ken kinadakes.

¹¹Agawat dagiti agtuturay iti siudad iti pasuksok. Agpatangdan dagiti papadi no ilawlawagda ti linteg. Agdawat dagiti profeta iti kuarta no agipadtoda. Ibagada nga adda kadakuada ti Apo. Kunada, “Di met aya adda kadatayo ti Apo? Awan ti dumteng a didigra kadatayo.”

¹²Ngarud, gapu kadakayo, maaradonto ti Sion a kas iti maysa a talon. Marebbekto ti Jerusalem ket agbalin a nagrebbaan. Agbalinto met a kabakiran ti bantay nga ayan ti Templo.