Read Iloko Micah 5 Bible Online

Micah 5 - Iloko bible

Micah 5

¹Tattao ti Jerusalem, aglemmengkayo kadagiti sarikedked! Nalakubtayon! Darupendan ti pangulo ti Israel!

²Kuna ti Apo, “Betlehem iti Efrata, sika ti maysa kadagiti kabassitan nga ili ti Juda. Ngem pataudek kenka ti maysa a mangituray iti Israel a nagtaud ti kapuonanna idi ugma.”

³Ngarud, yawatto ni Yahweh dagiti tattaona kadagiti kabusorda agingga nga ipasngay ti babai ti anakna a lalaki. Kalpasanna, agsublinto dagiti kadaraanna a naitalaw a kas balud ket maitiponda kadagiti kailianda.

⁴Inton umay, iturayannanto dagiti tattaona babaen iti bileg nga aggapu iti Apo ken ti dayag ti Apo a Dios. Natalgedto ti panagbiag dagiti tattaona agsipud ta bigbigento dagiti tattao iti sangalubongan ti kinatan-okna,

⁵ket yegnanto ti kappia. No rauten dagiti taga-Asiria ti pagiliantayo ket rebbaenda dagiti sarikedkedtayo, ipasangotayo a mangsaranget kadakuada dagiti kapigsaan a pangulotayo.

⁶Parmekendanto ti Asiria, ti daga ni Nimrod, babaen kadagiti kampilanda. Ispalendatayto kadagiti taga-Asiria inton sakupenda ti dagatayo.

⁷Addanto dagiti makalasat kadagiti kaputotan ni Jacob. Mayarigdanto iti makapabang-ar a linnaaw nga aggapu iti Apo a maipaay kadagiti adu a nasion, kas iti arbis a mangbisibis kadagiti agtubtubo a mula. Agpannuraydanto iti Dios, saan nga iti tao.

⁸Addadanto kadagiti sidong dagiti nasnasion. Mayarigdanto iti leon nga agbirbirok iti taraonna iti bakir wenno iti pagpastoran. Sumrek iti ayan dagiti karnero ket tukmaan ken rangrangkayenna ida. Awan ti mangisalakan kadakuada.

⁹Parmekento dagiti natda a kaputotanna dagiti kabusorda ket ikisapdanto ida amin.

¹⁰Kuna ti Apo, “Iti dayta a tiempo, italawkonto dagiti kabalioyo ket dadaelekto amin a luganyo a pakigubat.

¹¹Rebbekekto dagiti siudad iti dagayo ket rebbaekto dagiti sarikedkedyo.

¹²Dadaelekto dagiti anting-anting nga ar-aramatenyo. Pukawekto amin a mammadlesyo.

¹³Dadaelekto dagiti imahen ken dagiti nasagradoan nga adigi a bato a pagdaydayawanyo. Dikayton agdaydayaw kadagiti inaramidyo met laeng.

¹⁴Duprakekto dagiti imahen ni Asera a didiosen iti dagayo, ket dadaelekto dagiti siudadyo.

¹⁵Iti nakaro a pungtotko, balsekto dagiti nasion a di nagtulnog kaniak.”