Read Iloko Micah 7 Bible Online

Micah 7 - Iloko bible

Micah 7

¹Awanen ti namnama! Kaslaak la iti mabisin a tao nga awan ti masarakanna a bunga ti kayo ken ubas iti kaubasan. Naburas aminen dagiti ubas ken dagiti naimas nga igos.

²Awanen ti uray maysa a nalinteg a tao a masarakan iti pagilian. Awanen ti napudno iti Dios. Agur-uray ti tunggal maysa iti gundawayna a mangpapatay iti padana a tao. Anupen ti tunggal maysa ti kailianna.

³Nalaingda amin nga agaramid iti dakes. Dumawat dagiti ofisiales ken dagiti hues iti pasuksok. Ikeddeng ti mararaem a tao ti kayatna. Iti kasta, agtutulagda amin nga agaramid iti dakes.

⁴Uray ti kasayaatan ken kalintegan kadakuada mayarigda iti siitsiitan a mula. Ita, dimtengen ti aldaw a dusaen ti Dios ida, kas imballaagna kadagiti profeta nga agbambantay kadakuada. Ita, dida ammon ti aramidenda.

⁵Dikay agtalek iti kaarruba wenno iti gayyemyo. Uray iti asawam annadam ti sawem kenkuana.

⁶Kadagitoy a tiempo, saanen a raemen dagiti annak a lallaki dagiti ammada. Sukiren dagiti annak a babbai dagiti innada. Apaen dagiti manugang a babbai dagiti katuganganda a babbai. Dagiti kabusor ti maysa a tao isuda dagiti kamkameng ti familiana.

⁷Ngem agpannurayak iti Apo. Mangnamnamaak kenkuana a mangisalakan kaniak. Ipangagnak ti Diosko.

⁸Dakayo a kabusor, dikay agragsak iti dakes a napasamak kadakami. Natuangkami ngem bumangonkami manen. Addakam ita iti kasipngetan ngem ikkanakami ti Apo iti silaw.

⁹Nagbasolkami iti Apo, isut' gapuna nga ibturanmi iti apagbiit ti pungtotna. Ngem iti kamaudiananna, ikaluyanakami. Ikalintegannakami kadagiti naipalak-am kadakami. Ipannakami iti lawag. Makitaminto ti panangisalakanna!

¹⁰Makitanto daytoy dagiti kabusorko ket maibabaindanto—dagiti nangang-angaw kadakami a kunkunada, “Sadino ti ayan ti Apo a Diosyo?” Makitaminto ti pannakaparmek ken pannakapayatpayatda a kasla pitak kadagiti kalsada.

¹¹Tattao ti Jerusalem, dumtengen ti tiempo a bangonenyo manen dagiti bakud ti siudad. Lumawanto ti sakupyo.

¹²Agsublinto dagiti tattaoyo. Aggapudanto iti amin a lugar: Asiria iti daya, Egipto iti abagatan, iti sakup ti Karayan Eufrates, kadagiti ballasiw ti taaw ken adayo a bambantay.

¹³Ngem aglangalangto ti daga gapu iti kinadakes dagiti tattao nga agnanaed kenkuana.

¹⁴Aywanam dagiti pinilim a tattao, O Apo. Ipastormo ida a kas iti arban. Nupay agwaywayasda iti let-ang, nalikmutda iti nadam-eg a daga. Ipanmo ida iti nalangto a pagaraban ti Basan ken Galaad a kas idi un-unana.

¹⁵Ipakitaannakami kadagiti milagro, O Apo, a kas iti inaramidmo idi inruarnakami idiay Egipto.

¹⁶Makitanto daytoy dagiti nasion ket didanto agballigi uray kasano ti pigsada. Didanto makasao wenno makangngeg.

¹⁷Kasladanto uleg nga aguyas iti tapok, kas kadagiti agkarkarayam a parsua nga agtigtigerger iti butengda a rummuar iti paglemlemmenganda. Dumatagdanto a sibubuteng iti Apo a Diostayo.

¹⁸Awan ti dios a kas kenka, O Apo. Pakawanem dagiti basol dagiti tattao a nakalasat. Dika koma agpungtot iti agnanayon, no di ket ipakitam kadakami ti di agbalbaliw nga ayatmo.

¹⁹Kaasiannakami manen. Payatpayatem dagiti basolmi ket ipanmo ida iti lansad ti taaw.

²⁰Ipakitam ti kinapudnom ken ti di agbalbaliw nga ayatmo kadagiti tattaom nga Israelita a kaputotan ni Abraham ken ni Jacob, kas inkarim kadagidi kapuonanmi idi punganay.