Read Iloko Nahum 3 Bible Online

Nahum 3 - Iloko bible

Nahum 3

¹Asi pay ti Nineve, ti siudad nga ulbod ken mammapatay! Napno iti kinabaknang a sinamsam ken inagaw.

²Denggenyo ti kanabsiit ti saplit, ti karadakad dagiti pilid, ti dalagudog dagiti kabalio, ti darison dagiti lugan a pakigubat.

³Dumarup dagiti nakakabalio, sumilap dagiti kampilan, gumilap dagiti gayang! Ginabsuon dagiti bangkay, di mabilang dagiti natay. Maitikleb dagiti tattao kadagiti agkaiwara a naidasay.

⁴Madusdusan ti balangkantis a Nineve, makagargari ken makapatay ti pintasna. Kinayawanna dagiti nasion, ket ginargarina ida.

⁵Kuna ni Yahweh a Mannakabalin-amin, “Dusaenkanto, Nineve! Labusankanto tapno makitadaka dagiti pagilian ket maimatanganda ti amin a pakaibabainam.

⁶Ipakitakto kenka ti gurak, ket gaburankanto iti rugit; maalliawto dagiti tattao a kumita kenka.

⁷Itarayandakanto ti amin a kumita kenka. Kunadanto, ‘Narban ti Nineve. Siasino ti makipagrikna kenkuana? Siasinonto ti mayat a mangliwliwa kenkuana?’”

⁸Nineve, nasaysayaatka kadi ngem ti Tebes a kabesera ti Egipto? Adda met karayanna a mangsalaknib kenkuana a kas iti bakud—ti Karayan Nile ti sarikedkedna.

⁹Awan patingga ti pannakabalinna, inturayanna ti Sudan ken Egipto. Kaduana idi ti Libia.

¹⁰Ngem kaskasdi a naitalaw a kas balud dagiti taga-Tebes. Nakabkabil agingga a natay dagiti annakda iti amin a nagsulian ti kalsada. Naipanaw a sikakawar dagiti mararaem a tattaona, ket nagbibingayan dagiti nangitalaw kadakuada.

¹¹Uray sika, Nineve, mabartek ken agwasangwasangkanto. Agbirokkanto met iti pagkamangam manipud kadagiti kabusormo.

¹²Mayarigto dagiti amin a sarikedkedmo kadagiti igos a naluomen ti bungada. No magunggonda, agtinnag dagiti bungada iti ngiwat ti mangan!

¹³Kasla babbai dagiti soldadom, ket awan gaway ti pagiliam kadagiti kabusormo. Mauramto dagiti balunet dagiti ruanganmo.

¹⁴Sumakdoka iti danum a pangsagana iti pannakalakub, ket pabilgem dagiti sarikedkedmo. Lutlotem ti daga, ket isaganam dagiti pagsukogan a pagaramid kadagiti ladrilio.

¹⁵Uray agan-anoka, mauram wenno mapapataykanto iti paggugubatan. Maikisapkanto a kas kadagiti mula nga ibusen dagiti dudon. Immaduka a kas iti pangen ti dudon!

¹⁶Ad-adu dagiti pagtagtagilakoem ngem dagiti bituen sadi langit. Ngem ita, awandan a kas kadagiti dudon a tumayab ken pumanaw.

¹⁷Dagiti ofisialesmo kasda la pangen ti dudon a kumpet iti bakud no nalam-ek. Ngem no aginiten, tumayabda ket awan ti makaammo iti pagturonganda.

¹⁸Sika, ari ti Asiria, natayen dagiti gobernadormo, ket matmaturogen iti agnanayon dagiti natan-ok a tattaom! Nawarawara dagiti tattaom kadagiti bambantay, ket awanen ti mangyawid kadakuada.

¹⁹Saanen a maagasan dagiti dunormo, ket saanen a maimbagan dagiti sugatmo. Maragsakanto dagiti amin a makadamag, iti pannakadadaelmo ket agsipatdanto iti ragsakda. Adda aya nakalibas iti saan nga agpatingga a kinaranggasmo?