Read Iloko Habakkuk 1 Bible Online

Habakkuk 1 - Iloko bible

Habakkuk 1

¹Daytoy ti mensahe nga impakaammo ni Yahweh ken ni profeta Habakuk.

²O Apo, kasano pay kabayag ti panagdawatko iti tulongmo sakbay nga ipangagnak ket isalakannakami iti kinaranggas?

³Apay nga ipakitam kaniak ti adu a rigat ken kinadakes? Nalikmutak iti pannakadadael ken kinaranggas. Adda panagaapa ken panagriringgor iti amin a lugar.

⁴Awan ti maaramid ti linteg ken awan serserbina. Pulos a saan a matungpal ti hustisia. Ilupitlupit dagiti managdakdakes dagiti nalinteg; iti kasta, maballikug ti hustisia.

⁵Kinuna ni Yahweh kadagiti tattaona: “Siputanyo dagiti nasion iti lawlawyo, ket masdaawkayo iti makitayo. Addanto aramidek ket diyonto patien no maibaga kadakayo.

⁶Pagturayek dagiti taga-Babilonia, dagiti tattao a naranggas ken darasudos. Agdakiwasda iti entero a daga tapno parmekenda dagiti sabali a pagilian.

⁷Isaknapda ti danag ken buteng ket iti kinatangsitda, aramidenda ti kaykayatda.

⁸“Naparpardas a tumaray dagiti kabalioda ngem dagiti leopardo, ket narangranggasda ngem dagiti mabisin a lobo. Aggapu iti adayo dagiti nakakabalio a tattaoda. Agkur-ay dagiti kabalioda. Umayda a kasla agila a mangsippayot iti kanenda.

⁹“Naranggas ti idadarup dagiti armadada, ket mabuteng dagiti tattao iti isusungadda. Saan a mabilang a kas iti darat ti kaadu dagiti baludda.

¹⁰Laisenda dagiti ari ket katawaanda dagiti natan-ok nga ofisiales. Awan ti sarikedked a makalapped kadakuada. Buntuonenda ti daga iti abayna sada parmeken.

¹¹Kalpasanna, lumabasda a kas angin ket awandan, dagitoy nailunod a lallaki a pannakadiosda ti bilegda.”

¹²O Apo, sikan ti Dios manipud idi punganay. Sika ti Diosko a nasantoan ken agnanayon. O Apo a Diosko ken mangaywan kaniak, pinilim dagiti taga-Babilonia ket pinapigsam ida tapno mabalindakam a dusaen.

¹³Ngem kasano a maibturam dagitoy mangliliput ken managdakdakes a tattao? Nasantoan unay dagiti matam ket dida maibturan a kitaen ti dakes. Dimo kayat a kitaen dagiti tattao nga agaramid iti dakes. Apay ngarud nga agulimekka idinto ta dadaelenda dagiti tattao a nalinlinteg ngem isuda?

¹⁴Apay nga ibilangmo dagiti tattao a kas ikan wenno kas pangen ti igges?

¹⁵Kasla ikan dagiti tattao a banniitan dagiti taga-Babilonia. Guyodenda ida iti iket ket agririawda iti ragsak gapu iti nakalapanda.

¹⁶Agdaydayawda ken agidatonda pay kadagiti iketda agsipud ta dagiti iketda ti mangted kadakuada kadagiti kasayaatan a taraon.

¹⁷Itultuloyda kadi nga usaren dagiti kampilanda ket awan asida a mangdadael kadagiti nasion?