Read Iloko Habakkuk 2 Bible Online

Habakkuk 2 - Iloko bible

Habakkuk 2

¹Umuliak iti torrek a pagwanawanan ket urayek ti ibaga ti Apo a sawek ken no ania ti isungbatna iti asugko.

²Ket daytoy ti sungbat ti Apo, “Isuratmo iti tapi a damili ti ipakaammok kenka tapno nalaka a basaen.

³Isuratmo agsipud ta saan pay a mapasamak. Ngem dandanin dumteng ti tiempo, ket mapasamakto ti ipakitak kenka. Kasla mabayag ti idadatengna ngem urayem. Awan duadua a mapasamak iti tiempo nga inkeddengko ket saanto nga agtaktak.

⁴Daytoy ti mensahe: ‘Saanto a makalasat dagiti managdakdakes, ngem agbiagto ti nalinteg babaen iti pammatina.’”

⁵Mangallilaw ti kinabaknang. Napalangguad dagiti naagum ken darasudosda a tattao. Kasda la iti patay a pulos a di mapnek. Isut' gapuna nga agsasaruno dagiti nasion a parmekenda nga agpaay kadakuada.

⁶Laisen dagiti naparmek a tattao dagiti nangparmek kadakuada ket ipakitada ti gurada kadakuada. Kunadanto: “Agalakayo iti saanyo a kukua, ngem nailunodkayo. Kaano ti panagpatingga ti panangpabaknangyo iti bagiyo babaen iti panangsuitikyo kadagiti nakautang kadakay iti kuarta?”

⁷Ngem diyonto mapupuotan a dakayo a nangparmek kadagiti dadduma, makautangkayto met ket kapilitan nga agbayadkayto iti interes. Umayto dagiti kabusor ket pagtigergerendakayto. Samsamandakayto.

⁸Sinamsamanyo dagiti tattao iti adu a nasion, ngem samsamandakayto met dagiti nakalasat, gapu kadagiti panagpapatay ken kinaranggas nga inaramidyo kadagiti tattao iti lubong ken kadagiti siudadda.

⁹Nakabutbuteng ti pagbanagam! Bimmaknang ti familiam gapu kadagiti tinakawmo ket pinadasmo a pagbalinen a natalged ti balaymo tapno saan a maan-ano iti ranggas ken peggad.

¹⁰Ngem naibabain ti familiam gapu kadagiti dakes a pinanggepmo. Gapu iti adu a dinadaelmo a pagilian, inyegmo met laeng ti pannakadadaelmo.

¹¹Uray dagiti bato iti diding, umkisda a bumusor kenka. Tumulad met dagiti pasanggir ti balay.

¹²Nakabutbuteng ti pagbanagam! Impasdekmo ti maysa a siudad babaen iti kinadakes, ket binangonmo babaen iti panagpapatay.

¹³Agbambannog dagiti nasion a pinarmekmo iti awan serserbina, ket mauram dagiti amin a binangonda. Inaramid daytoy ni Yahweh a Mannakabalin-amin.

¹⁴Ngem mapnonto ti daga iti pannakaammo iti dayag ni Yahweh a kas iti pannakapunno dagiti taaw iti danum.

¹⁵Nakabutbuteng ti pagbanagam! Gapu iti pungtotmo, inrurumen ken imbabainmo dagiti kaarrubam. Pinagbasingbasingmo ida a kasda la nabartek.

¹⁶Maibabainkanto iti kasta unay imbes a maidaydayawka. Mabartek ken agibar-ibarkanto met. Ipainumto kenka ti Apo ti bukodmo a kopa ti pannakadusa, ket agsagabakanto iti pannakaibabain.

¹⁷Pinukanmo dagiti kayo iti bakir ti Libano, ket ita, mapukanka met. Pinataymo dagiti animal iti bakir, ket ita, butbutngendaka dagiti animal. Mapasamakto daytoy gapu kadagiti panagpapatay ken kinaranggas nga impaaymo kadagiti tattao iti daga ken kadagiti siudadna.

¹⁸Ania ti serbi ti didiosen? Aramid laeng ti tao, ket awan ti maibagana kenka no di la pasig nga ulbod. Ania ti pagimbagan a maited ti panagtalek ti nangaramid iti dayta a didiosen—maysa a didiosen a di pay makasao?

¹⁹Asika pay! Kunam iti maysa a kayo, “Agriingka!” wenno iti maysa a bato, “Bumangonka!” Adda aya maipaltiing kenka ti maysa nga imahen? Mabalin a nakalupkopan iti pirak ken balitok, ngem awan biagna.

²⁰Adda ti Apo iti nasantoan a Templona. Agulimek koma ti tunggal maysa ditoy daga iti sangoananna.