Read Iloko Zephaniah 3 Bible Online

Zephaniah 3 - Iloko bible

Zephaniah 3

¹Saan a malisian ti Jerusalem ti pannakadusana, dayta dakes ken nasukir a siudad a mangidaddadanes kadagiti bukodna a tattao.

²Saanna nga impangag ni Yahweh wenno inawat ti panangdisiplinana. Saan a nagtalek ken ni Yahweh wenno immawag iti tulongna.

³Mayarig kadagiti mabisin a leon dagiti ofisialesna. Kasla mabisin a lobo dagiti ukomna—agumda unay ta alun-onenda ti matukmaanda ket awan uray tulang nga ipabigatda.

⁴Iresponsable ken mangliliput dagiti profetana. Tulawan dagiti papadina ti banag a nasantoan ket ballikugenda ti linteg ti Dios para iti bukodda a pagimbagan.

⁵Ngem adda pay laeng ni Yahweh iti siudad. Aramidenna ti naimbag ket pulos a di agaramid iti dakes. Binigat nga awan duadua a yegna ti hustisia kadagiti tattaona. Ngem awan babain dagiti managdakdakes sadiay. Kankanayon nga agaramidda iti dakes.

⁶Kuna ni Yahweh, “Pinukawko dagiti pagilian, dinadaelko dagiti siudadda ket binaybay-ak a rebba dagiti bakud ken sarikedkedda. Napanawan dagiti siudadda. Awanen matagtagitao kadagiti kalsadada ket awanen ti agnaed sadiay.

⁷Impagarupko idi nga agbutengton kaniak dagiti tattaok ket awatenda ti panangdisiplinak kadakuada. Impagarupko a dida malipatan ti dusa nga inyegko a pangisuro kadakuada. Ngem iti saan a mabayag, ad-adda ketdi a dimmakesda.”

⁸Kuna ni Yahweh, “Aguraykayo. Urayenyo ti aldaw a panagtakderko a kas ukom a mangidarum kadagiti nasion. Inkeddengko nga ummongen dagiti pagilian ken pagarian tapno ipariknak kadakuada ti napalalo a pungtotko. Madadaelto ti entero a daga iti gumilgil-ayab nga apuy ti pungtotko.

⁹“Aramidek a siakto laeng ti pagdaydayawan dagiti pagilian a saan ketdi a kadagiti sabali a didiosen ket agtulnogdanto amin kaniak.

¹⁰Uray dagiti naiwaraswaras a tattaok nga adda idiay adayo nga Etiopia, umaydanto tapno agidatonda kaniak.

¹¹Iti dayta a tiempo, dakayo a tattaok, saanton a masapul nga agbainkayo iti panagsukiryo kaniak. Ikkatekto dagiti natangsit ken napasindayag ket saankayonton nga agsukir kaniak iti nasantoan a turodko iti Jerusalem.

¹²Addanto ibatik a tattao sadiay, tattao a nanumo ken napakumbaba. Umaydanto agpatulong kaniak.

¹³Dinton agaramid iti dakes dagiti makalasat a tattao ti Israel. Didanton mangallilaw wenno agulbod. Narang-ay ken natalgeddanto ket awanton ti kabutengda.”

¹⁴Agkanta ken agriawkayo iti rag-o, dakayo nga Israelita! Agragsakka iti amin a pusom, Jerusalem!

¹⁵Impanawen ti Apo dagiti gumurgura kenka; inikkatna amin a kabusormo. Adda kenka ti Apo nga ari ti Israel; awan itan ti gapu ti pagbutngam.

¹⁶Dumtengen ti tiempo nga ibagada iti Jerusalem, “Dika agbuteng, siudad ti Jerusalem! Dimo ipalubos a malpay dagiti imam!

¹⁷Adda ti Apo a Diosmo iti dennam; ti bilegna ti mangted kenka iti balligi. Agrag-onto ket sika ti pagragsakanna, Ikkannakanto iti baro a biag ta ay-ayatennaka. Agkantanto a siraragsak gapu kenka,

¹⁸naragsak a kas kadagiti tao a makifiesta.” Kuna ti Apo, “Ginibusakon ti pangta ti pannakadusam ket inikkatko ti pannakaibabainmo.

¹⁹Umayen dayta nga aldaw! Dusaekto amin a mangilupitlupit kenka. Arayatekto dagiti amin a pilay ket yawidkonto dagiti naitalaw a tattao. Pagbalinekto a dayaw ti pannakaibabainda ket raemento ida ti entero a lubong.

²⁰Umayen dayta nga aldaw! Yawidkonto dagiti naiwarawara a tattaom, Pagbalinenka nga agdindinamag ken madaydayaw kadagiti amin a tattao ditoy daga. Makitamto ti pannakaisubli ti sigud a kinarang-aymo.” Ti Apo ti nangibaga iti daytoy.