Read Iloko Haggai 1 Bible Online

Haggai 1 - Iloko bible

Haggai 1

¹Iti maikadua a tawen a panagturay ni Dario a kas emperador ti Persia, iti umuna nga aldaw ti maikanem a bulan, kinasao ni Yahweh ni profeta Haggeo. Maiturong ti mensahe iti gobernador ti Juda, ni Zerubbabel nga anak ni Salatiel, ken iti Nangato a Padi, ni Josue nga anak ni Josadac.

²Kinuna ni Yahweh a Mannakabalin-amin ken ni Haggeo, “Kuna dagitoy a tattao a saan pay a tiempo a bangonen manen ti Templo.”

³Kalpasanna, inted ni Yahweh daytoy a mensahe kadagiti tattao babaen ken ni profeta Haggeo,

⁴“Dakayo a tattaok, rumbeng kadi nga agnaedkayo kadagiti napintas a balbalayyo idinto nga agrakrakaya ti Templok?

⁵Diyo kadi makita ti mapaspasamak kadakayo?

⁶Adu ti immulayo a trigo ngem bassit ti inapityo. Adda kanenyo ngem saan nga umanay a mangbussog kadakayo. Adda arak nga inumenyo ngem saan nga umdas a mangbartek kadakayo. Adda kawesyo ngem saan nga umanay a pagimengyo. Bassit ti mateggedan ti mangmangged. Saan nga umanay a pagbiagna.

⁷Diyo kadi maawatan no apay a mapaspasamak dagitoy?

⁸Ita, inkayo kadagiti turod. Agpukankayo iti kayo ket bangonenyo manen ti Templo tapno maragsakanak ket agdaydayawkayo kaniak a kas rebbengna.

⁹“Nangnamnamakayo nga adu ti maapit ngem bassit ti apityo. Idi inyawidyo ti inapityo, pinatayabko. Apay a kasta ti inaramidko? Gapu ta agrakrakaya ti Templok idinto a maringgoran ti tunggal maysa kadakayo a mangbangbangon iti bukodna a balay.

¹⁰Daytoy ti gapuna nga awan tudo ket awan ti agtubo.

¹¹Pinagtikagko ti pagilian. Nagmaga dagiti turturod, taltalon, kaoliboan ken kaubasan. Gapu iti tikag, agsagaba ti amin a mula, tao, animal ken amin a kayatyo nga imula.”

¹²Impangag da Zerubbabel, Josue ken amin a tattao a nagsubli manipud idiay Babilonia a nakaibellenganda a kas balud ti sao ni Yahweh a Diosda. Nagbutengda ket tinungpalda ni profeta Haggeo a babaonen ni Yahweh.

¹³Kalpasanna, impakaammo ni Haggeo ti mensahe ni Yahweh kadagiti tattao: “Ikarik a dikay baybay-an.”

¹⁴Tinignay ni Yahweh ti tunggal maysa nga agtrabaho iti Templo: da Zerubbabel a gobernador ti Juda, ni Josue a Nangato a Padi ken dagiti tattao a nagsubli.

¹⁵Rinugianda a trinabaho ti templo ni Yahweh a Mannakabalin-amin a Diosda iti maika-24 nga aldaw iti maikanem a bulan iti maikadua a tawen ti panagturay ni Dario a kas emperador.