Read Iloko Haggai 2 Bible Online

Haggai 2 - Iloko bible

Haggai 2

¹Iti maika-21 nga aldaw iti maikapito a bulan iti dayta a tawen, nagsao manen ni Yahweh ken ni profeta Haggeo.

²Imbagana kenkuana a kasaona ni Zerubbabel a gobernador ti Juda, ni Josue a Nangato a Padi ken dagiti umili ket kinunana kadakuada,

³“Adda kadi makalagip pay laeng iti sigud a kinadayag ti Templo? Ania ti panagkitayo itan? Kasla awanen ti serserbina.

⁴Uray no kasta, saankayo koma a maupay. Irugiyon ti trabaho, ta addaak kadakayo.

⁵Idi rummuarkayo idiay Egipto, inkarik a dikay baybay-an. Addaak pay laeng kadakayo, isut' gapuna a dikay agbuteng.

⁶“Iti saan a mabayag, gunggonek ti langit, ti lubong ken ti taaw.

⁷Parmekekto ti amin a nasion. Mayegto ditoy ti gamengda ket mapnonto ti Templo iti kinabaknang.

⁸Kukuak amin a pirak ken balitok ditoy lubong.

⁹Nadaydayagto ti baro a Templo ngem ti immuna. Iti daytoy a lugar, parang-ayek dagiti tattaok ket ikkak ida iti talna.” Ni Yahweh a Mannakabalin-amin ti nagsao iti daytoy.

¹⁰Iti maikadua a tawen a panagturay ni Dario a kas emperador, iti maika-24 nga aldaw iti maikasiam a bulan, nagsao manen ni Yahweh a Mannakabalin-amin ken ni profeta Haggeo.

¹¹Kinunana, “Saludsodem kadagiti papadi no ania ti ikeddengda maipapan iti daytoy:

¹²Kas pangarigan mangala ti maysa a tao iti naidaton a karne ket sab-okenna iti gayadan ti kagayna. No isagidna ti kagayna iti tinapay wenno naluto a makan wenno arak wenno lana wenno aniaman a taraon, mapasanto met kadi ti nakaisagidanna?” “Saan,” insungbat dagiti papadi idi sinaludsod daytoy ni Haggeo.

¹³Sinaludsod ni Haggeo, “No natulawan ti maysa a tao gapu ta nakasagid iti bangkay, ket sagidenna ti uray ania kadagitoy a taraon, matulawan met kadi dagiti taraon?” “Wen,” insungbat dagiti papadi.

¹⁴Kinuna ngarud ni Haggeo, “Imbaga ti Apo a kasta met ti maaramid kadagiti tattao iti daytoy a nasion, ken kadagiti amin nga apitda; matulawan ti aniaman nga idatonda iti altar.”

¹⁵Kuna ni Yahweh, “Diyo kadi makita ti napasamak kadakayo? Sakbay nga inrugiyo a bangonen manen ti Templo,

¹⁶mapankayo iti pempen ti trigo ket namnamaenyo a makaalakayo iti 20 a salup ngem sangapulo a salup ti masarakanyo. Mapankayo iti tangke ti arak tapno tumakokayo iti 50 a galon, ngem 20 laeng a galon ti maalayo.

¹⁷Inyegko ti dumardarang nga angin ken uraro tapno madadael ti amin a mulayo ngem kaskasdi a dikayo nagbabawi.

¹⁸Iti daytoy maika-24 nga aldaw iti maikasiam a bulan, ita ta naipasdeken dagiti fondasion ti Templo, panunotenyo a naimbag ti mapasamak manipud ita.

¹⁹Awanen ti natda a trigo. Saan pay a nagbunga dagiti ubas, igos, granada ken olibo. Ngem manipud ita, bendisionankayo.”

²⁰Iti dayta met la nga aldaw, iti maika-24 nga aldaw ti bulan, kinuna manen ni Yahweh ken ni Haggeo:

²¹“Ibagam ken ni Zerubbabel a gobernador ti Juda a dandanikon pagkintayegen ti langit ken ti daga

²²ket rebbaek dagiti pagarian ken gibusak ti pannakabalinda. Parmekek dagiti lugan a pakigubat ken dagiti nagsakay. Matayto dagiti kabalio ket agpipinnatayto dagiti nagsakay.

²³Iti dayta nga aldaw, alaenkanto, sika, Zerubbabel nga adipenko, ket isaadka nga agturay iti naganko. Sika ti pinilik.” Ni Yahweh a Mannakabalin-amin ti nagsao iti daytoy.