Read Iloko Zechariah 12 Bible Online

Zechariah 12 - Iloko bible

Zechariah 12

¹Daytoy ti sao ti Apo maipapan iti Israel, ti Apo a nangyukrad iti langit ken nangipasdek iti daga ken nangted iti biag ti tao. Kunana:

²“Pagbalinekto ti Jerusalem a kasla kopa ti arak. Uminumto dagiti nasion iti likmutna ket agbasingbasingdanto a kasla nabartek. Inton lakubenda ti Jerusalem, malakubto met dagiti dadduma a siudad ti Juda.

³Ngem iti dayta nga aldaw, pagbalinekto ti Jerusalem a nadagsen a bato a narigat a magaraw ket masugatanto iti nasaem ti siasinoman a mangbagkat kenkuana. Agmaymaysanto dagiti amin a pagilian ti lubong a mangraut kenkuana.

⁴Iti dayta a tiempo, kigtotekto dagiti kabalioda ket pagmauyongekto dagiti nagsakay kadakuada. Bantayakto dagiti tattao ti Juda ngem pagbulsekekto ti amin a kabalio dagiti kabusorda.

⁵Kunanto dagiti kapuonan ti Juda, ‘Ti Apo a Mannakabalin-amin a Dios ti mangted iti pigsa kadagiti tattaona nga agnaed iti Jerusalem.’

⁶“Iti dayta a tiempo, pagbalinekto dagiti kapuonan ti Juda a kasla apuy iti kabakiran wenno talon a natangkenan iti dawa. Dadaelendanto dagiti amin a pagilian iti lawlawda. Awanto ti pakaan-anoan dagiti tattao ti Jerusalem iti uneg ti siudad.

⁷“Siak, ni Yahweh, umunanto a pagballigiek dagiti armada ti Juda tapno saan a maartapan ti dayaw dagiti kaputotan ni David ken dagiti agnaed iti Jerusalem ti dayaw ti Juda.

⁸Iti dayta a tiempo, salaknibanto ti Apo dagiti agnaed iti Jerusalem. Uray ti kakapsutan kadakuada, pumigsanto a kas ken ni David. Idalanto ida dagiti kaputotan ni David a kas iti mismo a Dios, kas iti anghel ti Apo.

⁹Iti dayta a tiempo, dadaelekto ti amin a pagilian nga agpanggep a mangraut iti Jerusalem.

¹⁰“Punnoekto dagiti kaputotan ni David ken dagiti tattao ti Jerusalem iti espiritu a mamagbalin kadakuada a manangngaasi ken managkararag. Kitaendanto ti natay gapu iti panangduyokda kenkuana ket dung-awandanto a kas iti pimmusay a kakaisuna nga anak. Agdung-awdanto iti nasaem a kasla kadagiti tattao a natay ti inauna nga anakda.

¹¹Iti dayta a tiempo, nasaemto ti panagdung-aw idiay Jerusalem a kas iti panangdung-aw ken ni didiosen a Baal iti tanap ti Megiddo.

¹²Tunggal familia iti pagilian, agdung-awto nga is-isuna: Ti familia a nagtaud iti kaputotan ni David; ti familia iti kaputotan ni Natan; ti familia iti kaputotan ni Levi; ti familia iti kaputotan ni Simei, ken dagiti dadduma a familia. Agdung-awto nga is-isuna ti tunggal familia, agraman lallaki a mailasin kadagiti babbai.