Read Iloko Zechariah 14 Bible Online

Zechariah 14 - Iloko bible

Zechariah 14

¹Dumtengen ti aldaw a panagtugaw ti Apo a kas ukom. Dumtengto dagiti agsamsam iti siudad ti Jerusalem ket mabingbingayto dagiti nasamsam iti imatangmo.

²Ummongento ti Apo dagiti amin a pagilian tapno darupenda ti Jerusalem. Maparmekto ti siudad. Masamsamanto dagiti balbalay. Maramesto dagiti babbai. Maitalawto ti kagudua ti bilang dagiti agnaed iti siudad ngem mabatinto dagiti dadduma.

³Kalpasanna, rummuarto ti Apo ket makirangetto a kas kadagiti napalabas a tiempo; gubatennanto dagidiay a pagilian.

⁴Iti dayta nga aldaw, agtakderto ti Apo iti tapaw ti Bantay Olivo iti daya ti Jerusalem. Maguduanto ti bantay ket addanto nalawa a tanap iti baetna a mangrugi iti daya nga agpa-laud. Umalisto nga agpa-amianan ti kaguduana ket agpa-abagatanto met ti sabali a kagudua.

⁵Aglibaskayto ket magnakay iti daytoy a tanap a nanggudua iti bantay. Agtataraykayto a kas kadagidi kapuonanyo idi dimteng ti ginggined iti tiempo ni Uzzias nga ari ti Juda. Umayto ti Apo a Diosko ket ikuyogna dagiti amin nga angheles.

⁶Inton dumteng dayta a tiempo, awanton ti lam-ek wenno panagbalay ti danum.

⁷Agnanayonto nga aldaw a saan met a gagangay nga aldaw ken rabbi. No kaano a mapasamak daytoy, ni laeng Yahweh ti makaammo.

⁸Inton dumteng dayta nga aldaw, addanto nabiag a danum nga aggapu iti Jerusalem. Agturongto ti kaguduana iti Natay a Baybay ket ti kaguduana iti Taaw Mediterranean. Saanto nga agpatingga ti panagayusna, uray iti kalgaw wenno tudtudo.

⁹Kalpasanna, agarinto ni Yahweh iti entero a lubong. Agdaydayawto ti tunggal maysa kenkuana a kas Dios ket maymaysanto ti naganna nga ammoda.

¹⁰Nasimpanton ti deppaar manipud Geba iti amianan agingga iti Rimmon iti abagatan. Nangatngatonto ti Jerusalem ngem dagiti daga iti lawlawna. Sakupento ti siudad manipud iti Ruangan ni Benjamin agingga iti Ruangan ti Suli, iti nagtakderan ti sigud a ruangan, ken manipud iti Torre ni Hananel agingga kadagiti pagpespesan iti ubas a kukua ti ari.

¹¹Natalgedton dagiti tattao nga agnaed sadiay, ket saandanton nga agpeggad a madadael.

¹²Idissuorto ni Yahweh ti nakabutbuteng a sakit kadagiti pagilian a manggubat iti Jerusalem. Marunotto ti lasagda idinto a sibibiagda pay. Malungsotto dagiti mata ken dagiti dilada.

¹³Iti dayta nga aldaw, riribuken ken pagbutngento ida ni Yahweh. Gammatanto ti maysa a tao ti adda iti abayna ket kabilenna.

¹⁴Makigubatto dagiti tattao ti Juda a mangsalaknib iti Jerusalem. Alaendanto a kas samsam ti sanikua dagiti amin a nasion—balitok, pirak ken adu a pagan-anay.

¹⁵Addanto met nakaro a sakit nga agdissuor kadagiti kabalio, mulo, kamelio ken asno—kadagiti amin nga animal nga adda iti kampo dagiti kabusor.

¹⁶Kalpasan ti pannakaparmek dagiti kabusor, tinawen a sumang-atto idiay Jerusalem dagiti amin a nakalasat tapno agdaydayawda ken ni Yahweh a Mannakabalin-amin a kas ari ken tapno rambakanda ti Fiesta dagiti Abong-abong.

¹⁷No adda nasion a saan a sumang-at idiay Jerusalem tapno agdaydayaw ken ni Yahweh a Mannakabalin-amin a kas ari, saanto nga agtudo iti dagada.

¹⁸No saan a kayat dagiti Egipcio a rambakan ti Fiesta dagiti Abong-abong, sagabaendanto met ti sakit nga idissuor ni Yahweh kadagiti nasion a saan a mapan makipagrambak.

¹⁹Daytoyto ti dusa a maipatay iti Egipto ken kadagiti dadduma a nasion no dida rambakan ti Fiesta dagiti Abong-abong.

²⁰Iti dayta a tiempo, uray kadagiti kilingkiling a maibitin kadagiti kabalio maisuratto: “Naidaton iti Apo.” Agbalinton dagiti banga nga adda iti Templo a nasagradoan a kas kadagiti malukong iti sango ti altar.

²¹Mailasinto ti amin a banga iti Jerusalem ken iti Juda tapno maaramat iti panagdaydayaw ken ni Yahweh a Mannakabalin-amin. Usarento dagiti agidaton ti banga a paglutoan iti karne ti idatagda. Inton dumteng dayta a tiempo, awanton ti agtagtagilako iti Templo ni Yahweh a Mannakabalin-amin.