Read Iloko Zechariah 5 Bible Online

Zechariah 5 - Iloko bible

Zechariah 5

¹Kimmitaak manen ket naimatangak ti maysa a nalukot a pagbasaan nga agtaytayab.

²Sinaludsod ti anghel no ania ti nakitak. Insungbatko, “Maysa nga agtaytayab a pagbasaan a 30 a kadapan ti kaatiddogna ken 15 a kadapan ti kaakabana.”

³Imbagana kaniak, “Nailanad iti daytoy a pagbasaan ti lunod nga agsaknap iti entero a daga. Iti maysa a bangir ti pagbasaan, nailanad a mapapanaw amin a mannanakaw iti daga. Iti sabali a bangir, nailanad met a maipanawto amin nga agsapata iti ulbod.

⁴Kinuna ti Apo a Mannakabalin-amin nga idissuornanto daytoy a lunod kadagiti balay dagiti mannanakaw ken kadagiti balay dagiti agsapata iti ulbod. Agtalinaedto daytoy kadagiti balbalayda ket ibusennanto ida a mamimpinsan.”

⁵Nagparang manen ti anghel ket kinunana, “Kitaem ti sumungsungad!”

⁶Sinaludsodko no ania daydiay ket kinunana, “Maysa a basket. Iladawanna ti basol ti entero a daga!”

⁷Adda buli a kalub ti basket. Idi kitkitaek, naingato ti kalub ket nakitak iti unegna ti maysa a babai a nakatugaw.

⁸Kinuna ti anghel, “Iladawan daytoy a babai ti kinadakes.” Kalpasanna, intalmegna ti babai iti uneg ti basket sana inkabil ti kalub.

⁹Timmangadak ket nakitak ti dua a babbai nga addaan iti nabileg a payak a kas iti payak ti kannaway, ket agturongda iti ayanko. Innalada ti basket ket intayabda.

¹⁰Sinaludsodko iti anghel, “Sadino ti pangipananda?”

¹¹Kinunana, “Idiay Babilonia a pangaramidanda iti templona. Apaman a malpas ti templo, maipanto sadiay ti basket tapno pagdaydayawan dagiti tattao.”