Read Iloko Zechariah 6 Bible Online

Zechariah 6 - Iloko bible

Zechariah 6

¹Adda manen sabali a parmatak. Naimatangak ti uppat a lugan a pakigubat a rumrummuar iti nagbaetan ti dua a bronse a bantay.

²Guyguyoden dagiti nalabaga a kabalio ti umuna a lugan. Nangingisit a kabalio ti mangguyguyod iti maikadua.

³Guyguyoden dagiti puraw a kabalio ti maikatlo, ket ti maikapat, guyguyoden dagiti labang a kabalio.

⁴Sinaludsodko iti anghel, “Ania ti kaipapanan dagiti lugan a pakigubat, apo?”

⁵Kinunana, “Dagitoy dagiti uppat nga angin. Kagapgapuda iti saklang ti Apo ti entero a daga.”

⁶Agpa-amianan a mapan Babilonia ti lugan a guyguyoden dagiti nangisit a kabalio. Agpa-laud dagiti puraw a kabalio, ket agpa-abagatan dagiti labang nga agturong iti maysa a pagilian.

⁷Idi rummuar dagiti labang a kabalio, gumanatda a mapan mangwanawan iti daga. Kinuna ti anghel, “Inkayo kitaen ti daga!” Iti kasta napanda.

⁸Kalpasanna, impukkaw ti anghel kaniak, “Dagiti kabalio a napan idiay Babilonia, pinabaawda ti pungtot ti Apo iti dayta a daga.”

⁹Kinuna ti Apo kaniak,

¹⁰“Alaem dagiti sagut nga inted dagiti napagtalaw a kas balud a naggapu idiay Babilonia, da Heldai, Tobijas ken Jedaias. Inka a dagus iti balay ni Josias nga anak ni Sofonias.

¹¹Aramidem a korona dagiti balitok ken pirak nga intedda samo ibalangat ken ni Josue a nangato a padi nga anak ni Josadac.

¹²Ibagam ken ni Josue a kastoy ti sao ni Yahweh a Mannakabalin-amin: ‘Adtoy ti tao a maawagan “Ti Sanga.” Dumakkel iti daga nga ayanna ket bangonennanto ti Templo ti Apo.

¹³Wen, isunto ti mangbangon iti Templo. Awatennanto ti pammadayaw a maipaay iti ari, ket iturayannanto dagiti tattaona. Addanto padi nga umas-asibay iti tronona. Agtinnulongdanto nga agtrabaho iti kappia ken panagtutunos.’

¹⁴Agpaayto ti korona a pakalaglagipan iti templo ni Yahweh a pammadayaw kada Heldai, Tobijas, Jedaias ken ni Josias.”

¹⁵Umayto dagiti tattao nga agnaed iti adayo ket tumulongda iti pannakabangon manen ti Templo ti Apo. Ket inton malpas ti templo, maammoanyonto a ti Apo a Mannakabalin-amin ti nangibaon kaniak nga umay kadakayo. Mapasamak amin dagitoy no agtulnogkayo a sipapasnek kadagiti bilin ti Apo a Diosyo!