Read Iloko Zechariah 8 Bible Online

Zechariah 8 - Iloko bible

Zechariah 8

¹Inted ni Yahweh a Mannakabalin-amin daytoy a mensahe ken ni Zacarias:

²“Tinarigagayak a tulongan ti Jerusalem gapu iti nasged nga ayatko kadagiti tattaona. Gapu iti ayatko, kinapungtotko dagiti kabusorna.

³Agsubliak iti Jerusalem, ti nasantoan a siudadko, ket agnaedak sadiay. Maawaganto iti napudno a siudad. Maawaganto met ti bantay ni Yahweh a Mannakabalin-amin iti nasantoan a bantay.

⁴Agtugawto manen dagiti babbaket ken lallakay kadagiti kalsada ken plasa ti Jerusalem. Agsarukoddanto a magna gapu iti kinalakay ken kinabaketda.

⁵Mapnonto manen dagiti kalsada ti siudad kadagiti agaayam nga ubbing.

⁶“Mabalin nga ipagarup dagiti nasion a nabati a saan a maaramid daytoy ngem nalaka la a banag daytoy kaniak.

⁷Isalakankonto dagiti tattaok kadagiti pagilian a nakaipananda.

⁸Alaekto ida manipud iti daya ken laud ket isublikto ida idiay Jerusalem a pagnaedanda. Isudanto dagiti tattaok ket siakto ti Diosda. Iturayakto ida a sipupudno ken awan idumdumak.

⁹“Pakirdenyo ti pakinakemyo, dakayo a tattao. Dagiti mangmangngegyo ita, isu met laeng ti insasao dagiti profeta idi maisaad dagiti fondasion tapno mabangon manen ti Templok.

¹⁰Sakbay dayta a tiempo, awan ti makabael a mangtangdan iti tao wenno animal. Mabuteng dagiti tattao a rummuar gapu kadagiti kabusorda. Pinagbibinnusorko dagiti amin a tattao.

¹¹Ngem ita, maiduma ti pannakilangenko kadagiti nakalasat a tattao iti daytoy a pagilian.

¹²Awanto ti kabutengda no agmulada. Agbunganto dagiti ubasda. Adunto ti maapit iti daga. Nawadwadto ti tudo. Ipaaykonto amin dagitoy a bendision kadagiti tattao a nakalasat iti nasionko.

¹³Tattao ti Juda ken Israel, iti napalabas, no ilunod dagiti ganggannaet dagiti padada, kunada, ‘Agdissuor koma kadakayo ti isu met la a didigra a nagdissuor iti Juda ken Israel.’ Ngem isalakankayto ket kunanto dagita a ganggannaet iti tunggal maysa, ‘Sapay koma ta mabendisionankayo a kas iti Juda ken Israel.’ Bumilegkayo ngarud ket dikay agbuteng.”

¹⁴Kuna ni Yahweh a Mannakabalin-amin, “Idi pinagpungtotdak dagidi kapuonanyo, inkeddengko nga idissuor kadakuada ti didigra ket diak nagbabawi no di ket inaramidko dagiti panggepko.

¹⁵Ngem ita, panggepko a bendisionan dagiti tattao ti Jerusalem ken Juda. Dikayo ngarud agbuteng.

¹⁶Dagitoy ti masapul nga aramidenyo: Agsaokayo iti pudno iti padayo a tao. Kadagiti pangukoman, ipakatyo ti hustisia, ti hustisia a mangyeg iti kappia.

¹⁷Dikay agpanggep iti dakes iti padayo a tao. Dikay agsaksi iti ulbod. Kagurak ti kinaulbod, kinakillo ken kinaranggas.”

¹⁸Impakaammo ni Yahweh a Mannakabalin-amin ken ni Zacarias daytoy a mensahe:

¹⁹“Ti panagayunaryo kadagiti maikapat, maikalima, maikapito ken maikasangapulo a bulan, agbalinto a narambak ken naragsak a fiesta dagiti tattao ti Juda. Masapul nga ayatenyo ti kinapudno ken kappia!”

²⁰Kuna ni Yahweh a Mannakabalin-amin, “Dumtengen ti tiempo nga umay iti Jerusalem dagiti tattao nga aggapu kadagiti dadakkel a pagilian ken siudad.

²¹Kunanto dagiti tattao iti maysa a siudad kadagiti agnaed iti sabali a siudad, ‘Inkam agdaydayaw iti Apo a Mannakabalin-amin ken agdawat iti bendisionna. Umaykayo met!’

²²Dadakkel ken nabibileg a nasion ti mapanto idiay Jerusalem tapno agdaydayawda ken ni Yahweh a Mannakabalin-amin ken agdawatda iti bendisionna.

²³Kadagita nga aldaw, sangapulo a ganggannaet ti mapan iti maysa a Judio ket kunada, ‘Kayatmi ti sumurot kenka ta nadamagmi nga adda kenka ti Dios.’”