Read Iloko Zechariah 9 Bible Online

Zechariah 9 - Iloko bible

Zechariah 9

¹Daytoy ti mensahe ni Yahweh: Inkeddengna ti dusa a maipatayto iti daga ti Hadrac ken ti siudad ti Damasco. Saan laeng a dagiti tribu ti Israel ti kukua ni Yahweh, no di pay ket ti kabesera ti Siria.

²Kukuana pay ti Hamat nga adda iti nagbaetan ti Hadrac ken Damasco, kasta met dagiti siudad ti Tiro ken Sidon, agraman amin a kinalaingda.

³Nangbangon ti Tiro iti sarikedked a mangsalaknib kenkuana. Nagurnong iti adu a pirak ken balitok—adu unay ket maibilangda a gagangay a kas tapok.

⁴Ngem alaento ni Yahweh ti amin a sanikua ti Tiro ket itappuakna iti baybay. Mapuoranto ti siudad agingga a dumapu.

⁵Makitanto daytoy ti siudad ti Askelon ket agbutengto. Makitanto met ti siudad ti Gaza ket agsagabanto iti kasta unay. Kastanto met ti Ekron ket mapukawnanto ti namnamana. Mapukawto ti Gaza ti arina ket awanto metten ti agnaed iti Askelon.

⁶Nadumadumanto a puli ti agnaed idiay Asdod. Kuna ni Yahweh, “Ipababakto dagitoy natangsit a Filisteo.

⁷Didanton agsida iti karne nga adda darana wenno aniaman a taraon a maiparit. Amin a makalasat, mainayondanto kadagiti tattaok ket mayarigdanto a kas maysa a familia iti tribu ti Juda. Agbalinto a tattaok dagiti taga-Ekron a kas kadagiti Jebuseo.

⁸Salaknibakto ti dagak ket diak palubosan dagiti armada a lumasat. Diakton palubosan dagiti naranggas nga agturay a mangidadanes kadagiti tattaok. Nakitak no kasano ti panagsagaba dagiti tattaok.”

⁹Agrag-okayo, tattao ti Sion, agrag-okayo! Agdir-ikay iti ragsak, tattao ti Jerusalem! Kitaenyo, umayen kadakayo ti ariyo! Umay a sibaballigi ngem napakumbaba; umay a nakasakay iti asno, iti urbon ti asno.

¹⁰Kuna ti Apo, “Ikkatekto iti Israel dagiti lugan a pakigubat; ipanawkonto met dagiti kabalio iti Jerusalem, madadaelto dagiti pana a nausar iti gubat. Makikappianto ti ariyo kadagiti nasion; sakupento ti pagturayanna manipud iti igid ti taaw agingga iti sabali nga igid; manipud iti Karayan Eufrates agingga kadagiti pungto ti daga.”

¹¹Kuna ti Apo, “Gapu iti nagtulagantayo a napasingkedan iti dara dagiti sakrifisio, wayawayaakto dagiti tattaoyo iti awan danumna nga abut a nakaipananyo a kas balud.

¹²Agsublikayo, dakayo a naitalaw, dakayo a balud nga addaan namnama; agsublikayon iti natalged a taengyo. Ibagak kadakayo ita, subadakto iti mamindua a kaadu ti bendision ti amin a sinagabayo.

¹³Aramatek ti Juda a kas bai ti soldado, ken ti Israel a kas pana. Usarek dagiti tattao ti Sion a kas kampilan a manggubat kadagiti tattao ti Grecia.”

¹⁴Agparangto ti Apo iti ngatoen dagiti tattaona; kaslanto kimat nga ibiatna dagiti panana. Paguniento ni Apo Dios ti trumpeta, magnanto a maikuyog iti bagio nga aggapu iti abagatan.

¹⁵Salaknibanto ti Apo a Mannakabalin-amin dagiti tattaona, ket papatayendanto dagiti kabusorda. Kasdanto la nabartek nga agpukkaw iti paggugubatan, ket pagayusendanto ti dara dagiti kabusorda. Agayusto a kas iti dara ti sakrifisio a maibuyat iti rabaw ti altar manipud iti malukong.

¹⁶Inton dumteng dayta nga aldaw, isalakanto ti Apo dagiti tattaona, a kas iti panangispal ti agpaspastor iti arbanna. Agraniagdanto iti dagana a kasla napateg a bato a naitampok iti korona.

¹⁷Anian a kinasayaat ken kinapintas ti pagbalinanto ti daga! Pumigsa dagiti agtutubo iti trigo ken arak.