Read Iloko Malachi 1 Bible Online

Malachi 1 - Iloko bible

Malachi 1

¹Daytoy ti mensahe ni Yahweh nga impakaammona ken ni Malakias nga ibagana kadagiti Israelita.

²Kuna ni Yahweh kadagiti tattaona, “Inay-ayatkayo.” Ngem isungbatda, “Kasano ti panangipakitam nga inay-ayatnakami?” Isungbat ni Yahweh, “Agkabsat da Esau ken Jacob, ngem inay-ayatko ni Jacob ken dagiti kaputotanna,

³ket ginurak ni Esau ken dagiti kaputotanna. Dinadaelko ti katurturodan a pagilian ni Esau ket binaybay-ak ti dagana a pagtaengan dagiti atap nga animal.”

⁴No kuna dagiti Edomita a kaputotan ni Esau, “Nadadael dagiti ilimi ngem bangonenminto manen ida,” daytoy ti sungbat ni Yahweh a Mannakabalin-amin, “Bangonenda latta ida ngem rebbaekto manen. Awaganto dagiti tattao ida iti ‘Ti managdakdakes a pagilian’ ken ‘Ti pagilian a kapungtot ti Apo iti agnanayon.’”

⁵Makitanto a mismo daytoy dagiti Israelita ket kunadanto, “Mannakabalin ti Apo uray pay iti ruar ti daga ti Israel!”

⁶Kuna ti Apo a Mannakabalin-amin kadagiti papadi, “Raemen ti anak ti amana. Raemen met ti adipen ti apona. Siak ti amayo, ngem apay a didak dayawen? Siak ti apoyo, ngem apay a didak raemen? Lalaisendak, ngem saludsodenyo pay laeng, ‘Kasano ti pananglaismi kenka?’

⁷Kastoy ti pananglaisyo kaniak—agidatonkayo iti awan pategna a taraon iti altarko, ket saludsodenyo, ‘Kasano ti dimi panangipakita a saankami nga agraem kenka?’ Ibagak kadakayo—babaen iti panangipakitayo iti pananglaisyo iti altarko.

⁸Ipagarupyo kadi a naimbag ti panangidatagyo kaniak iti bulsek, pilay wenno masakit nga animal? Padasenyo man ti mangted ti kasta nga animal iti gobernadoryo. Maragsakan ngata? Itedna ngata ti masapulyo?”

⁹Ita, dakayo a papadi, padasenyo man ti agdawat iti Dios tapno kaasiannatayo. Dina ipangag ti kararagyo ket dakayo ti akimbasol.

¹⁰Kuna ti Apo a Mannakabalin-amin, “Adda koma maysa kadakayo a mangirikep iti ruangan ti Templo tapno dikay makastrek a mangpasged iti awan serserbina nga apuy iti altarko. Diak maragsakan kadakayo, ket diak awaten dagiti daton nga idatagyo kaniak.

¹¹Agraem kaniak dagiti amin a tattao ditoy lubong. Iti sadinoman a disso, agpuorda iti insenso a maipaay kaniak ket agidatagda kadagiti makaay-ayo a daton. Isuda amin raemendak.

¹²Ngem didak raemen no ibagayo nga awan serserbi ti altarko, ken no laisenyo ti taraon nga idatonyo sadiay.

¹³Kunayo, ‘Naumakamin kadagitoy!’ ket musiigandak. Mangidatagkayo iti tinakaw nga animal a kas datonyo kaniak wenno pilay wenno masakit. Ipagarupyo kadi nga awatek dagitoy?

¹⁴Mailunod koma ti manangallilaw a mangidaton kaniak iti awan serserbina nga animal idinto nga inkarina a mangidatag kaniak iti nasayaat nga animal nga aggapu iti arbanna. Naindaklanak nga ari! Kabutengdak dagiti amin a tao iti amin a pagilian.”