Read Iloko Matthew 1 Bible Online

Matthew 1 - Iloko bible

Matthew 1

¹Daytoy ti libro ti kapuonan ni Jesu-Cristo a nagtaud iti kaputotan ni David, a nagtaud met iti kaputotan ni Abraham.

²Manipud ken ni Abraham agingga ken ni Ari David, adtoy dagiti nailista a kaputotan: Abraham, Isaac, Jacob, Juda ken dagiti kakabsatna; sumaruno da Fares ken Zara nga annak ni Tamar; Esrom, Aram, Aminadab, Naason, Salmon, Boaz nga anak ni Rahab, Obed nga anak ni Ruth, Jesse ken ni Ari David.

⁶Dagiti kaputotan manipud ken ni David agingga idi napagtalaw dagiti Israelita a kas balud ket naipanda idiay Babilonia: David, Solomon (putot ni David iti asawa idi ni Urias), Roboam, Abias, Asa, Josafat, Joram, Ozias, Joatam, Acaz, Hezekias, Manases, Amon, Josias, ken ni Jeconias agraman dagiti kakabsatna.

¹²Dagiti kaputotan kalpasan ti pannakaipan dagiti Israelita idiay Babilonia agingga iti pannakayanak ni Jesus: Jeconias, Salatiel, Zorobabel, Abiud, Eliakim, Azor, Sadoc, Akim, Eliud, Eleazar, Matan, Jacob, Jose nga asawa ni Maria nga ina ni Jesus a maawagan iti Cristo.

¹⁷Ngarud, adda 14 a kaputotan manipud ken Abraham agingga ken ni David. Sangapulo ket uppat met ti kaputotan manipud ken ni David agingga a naipan dagiti Israelita idiay Babilonia. Adda met 14 a kaputotan manipud pannakaipanda idiay Babilonia agingga iti pannakayanak ti Cristo.

¹⁸Kastoy ti pakasaritaan ti pannakayanak ni Jesu-Cristo: Naitulag ni Maria nga inana a mayasawa ken ni Jose. Ngem sakbay ti panagkasarda, naammoan a masikogen ni Maria babaen iti pannakabalin ti Espiritu Santo.

¹⁹Agsipud ta nasingpet a lalaki ni Jose a nakaitulaganna, ket dina kayat a maibabain ni Maria, pinanggepna nga isina a sililimed.

²⁰Ngem idi pampanunotenna daytoy, nagparang kenkuana ti anghel ti Apo iti maysa a tagtagainep. Kinunana, “Jose nga anak ni David, dika agamak a mangikasar ken ni Maria, ta aramid ti Espiritu Santo ti sikogna.

²¹Ipasngaynanto ti maysa a lalaki ket panaganamto iti Jesus, agsipud ta isalakannanto dagiti tattaona kadagiti basbasolda.”

²²Naaramid amin daytoy tapno matungpal ti insao ti Apo babaen iti profeta:

²³“Agsikogto ti birhen a balasang. Ipasngaynanto ti maysa a lalaki, ket mapanagananto iti Immanuel a kayatna a sawen, ‘Adda kadatayo ti Dios.’”

²⁴Idi makariing ni Jose, tinungpalna ti imbaga ti anghel ket inkasarna ni Maria.

²⁵Ngem saanna a dinennaan ni Maria sakbay a nangipasngay iti anak a lalaki a pinanaganan ni Jose iti Jesus.