Read Iloko Matthew 10 Bible Online

Matthew 10 - Iloko bible

Matthew 10

¹Inayaban ni Jesus dagiti sangapulo ket dua nga adalanna. Inikkanna ida iti pannakabalin a mangpaksiat kadagiti dakes nga espiritu, ken mangpaimbag kadagiti agsagsagaba iti amin a kita ti sakit ken an-annayen.

²Dagitoy dagiti sangapulo ket dua nga apostoles: umuna, da Simon (a managan Pedro) ken Andres a kabsatna; da Santiago ken Juan nga annak ni Zebedeo;

³da Felipe ken Bartolome; ni Tomas ken ni Mateo, ti agsingsingir iti buis; ni Santiago nga anak ni Alfeo, ken ni Tadeo;

⁴ni Simon a Patriota ken ni Judas Iscariote a mangliput ken ni Jesus.

⁵Imbaon ni Jesus dagitoy sangapulo ket dua. Kastoy ti imbilinna kadakuada: “Dikayo mapmapan iti uray sadino a daga dagiti Hentil wenno iti uray sadino nga ili dagiti Samaritano.

⁶Ngem inkayo ketdi kadagiti napukaw a karnero iti nasion ti Israel.

⁷Inkayo ikasaba daytoy, ‘Asidegen ti Pagarian ti Langit!’

⁸Paimbagenyo dagiti masakit, pagungarenyo dagiti natay, agasanyo dagiti agkukutel ken paksiatenyo dagiti demonio. Awan imbayadyo iti inawatyo. Ngarud, diyo pabayadan ti ipaayyo.

⁹Dikayo mangitugot iti kuarta—balitok man wenno pirak wenno gambang.

¹⁰Dikayo met mangitugot iti bay-on, uray bado a pagsukatan, uray sapatos wenno sarukod, ta karbengan ti mangmangged ti maikkan iti kasapulanna.

¹¹“No dumtengkayo iti maysa nga ili wenno barrio, bumirokkayo iti mayat nga umawat kadakayo. Agyankayo kenkuana agingga a pumanawkayo iti dayta a lugar.

¹²No sumrekkayo iti maysa a balay, kunayo, ‘Dios ti mangted iti talna kadakayo.’

¹³No awatendakayo dagiti akimbalay, ibatiyo ti inkablaawyo a talna. No didakayo awaten, ibabawiyo ti inkablaawyo.

¹⁴“Kasta met a no adda balay wenno ili a dinto umawat wenno dumngeg kadakayo, panawanyo ida ket pampagenyo ti tapok kadagiti sakayo.

¹⁵“Laglagipenyo nga inton Aldaw ti Panangukom, nalaglag-anto ti dusa nga ipalak-am ti Dios kadagiti taga-Sodoma ken Gomorra ngem kadagiti tattao iti dayta nga ili.”

¹⁶“Dumngegkayo! Ibaonkayo a kas karnero iti ayan ti arban dagiti lobo. Ngarud, masapul a nasiribkayo a kas iti uleg ken naamokayo a kas iti kalapati.

¹⁷Agannadkayo, ta addanto dagiti tattao a mangtiliw ken mangisaklang kadakayo iti pangukoman. Saplitendakayto iti uneg dagiti sinagoga.

¹⁸Gapu kaniak, maisaklangkayto iti sangoanan dagiti agtuturay ken ar-ari tapno paneknekanyo kadakuada ken kadagiti Hentil ti Naimbag a Damag.

¹⁹Ngem inton addakayo iti sangoanan ti ukom, diyonto pakadanagan no anianto ti sawenyo wenno kasanonto ti panangisaoyo. Maipaltiingto ti sawenyo inton dumteng dayta a tiempo.

²⁰Ta saanto nga agtaud kadakayo ti ibalikasyo; agtaudto iti Espiritu ni Amayo nga agsasao kadakayo.

²¹“Papapatayto dagiti tattao dagiti bukodda a kakabsat. Kastanto met ti aramiden dagiti amma kadagiti annakda. Busorento dagiti annak dagiti nagannak kadakuada ket papapataydanto ida.

²²Guraendakayto dagiti tattao gapu kaniak. Ngem ti siasinoman a makaibtur agingga iti panungpalan, maisalakanto.

²³No idadanesdakayo iti maysa nga ili, inkayo agkamang iti sabali nga ili. Ibagak kadakayo a diyonto pay malpas ti trabahoyo iti amin nga il-ili ti Israel, inton umay ti Anak ti Tao.

²⁴“Saan a natantan-ok ti agad-adal ngem ti maestrona; saan met a naturturay ti adipen ngem ti apona.

²⁵Ngarud, mapnek koma ti agad-adal no agbalin a kas iti maestrona; kasta met ti adipen, no agbalin a kas iti apona. No Beelzebub ti ipanaganda iti pangulo ti maysa a familia, naal-alasto pay ti maipanagan kadagiti kamkameng ti familiana.”

²⁶“Dikay ngarud agbuteng kadagiti tattao; ta awan ti nailemmeng a dinto maiparangarang, ket awan met ti palimed a dinto mailatak.

²⁷Ti ibagak kadakayo iti kasipngetan, isaoyo iti lawag; ket ti mayarasaas kadakayo, ipukkawyo iti tuktok dagiti balbalay.

²⁸Dikay agbuteng kadagiti mangpapatay iti bagi, ngem dida mabalin a papatayen ti kararua. Agbutengkayo ketdi iti Dios, isu a makabalin a mangpatay iti bagi ken kararua idiay infierno.

²⁹Iti maysa a sentimo makagatangkayo iti dua a sallapingaw. Nupay kasta, awan matnag uray maysa kadakuada no di ipalubos ni Amayo.

³⁰No maipapan kadakayo, uray dagiti buokyo nabilangda aminen.

³¹Isut' gapuna a dikay agbuteng ta napatpategkayo nga adayo ngem ti adu a sallapingaw.”

³²“Siasinoman a mangipaduyakyakto kaniak, ipaduyakyakkonto met iti imatang ni Amak sadi langit.

³³Ngem ti mangilibak kaniak, ilibakkonto met iti sangoanan ni Amak sadi langit.”

³⁴“Diyo ipagarup nga immayak mangyeg iti kappia ditoy lubong. Diak immay mangyeg iti kappia no di ket kampilan.

³⁵Immayak tapno pataudek ti ibubusor dagiti annak a lallaki kadagiti ammada, dagiti annak a babbai kadagiti innada, dagiti manugang a babbai kadagiti katuganganda a babbai.

³⁶Dagiti kabusor ti tao isuda met laeng dagiti kameng ti familiana.

³⁷“Ti dakdakkel ti panagayatna iti amana wenno iti inana ngem ti panagayatna kaniak, saan a maikari nga agbalin nga adalak; ti dakdakkel ti panagayatna kadagiti annakna ngem ti panagayatna kaniak, saan a maikari nga agbalin nga adalak.

³⁸Siasinoman a di mangibaklay iti krusna ken sumurot kaniak, saan a maikari nga agbalin nga adalak.

³⁹Siasinoman a mangipangpangruna iti biagna, mapukawnanto; ket ti makapukaw iti biagna gapu kaniak, masarakannanto.”

⁴⁰“Siasinoman nga umawat kadakayo, siak met laeng ti awatenna. Siasinoman nga umawat kaniak, awatenna met ti nangibaon kaniak.

⁴¹Siasinoman nga umawat iti profeta gapu ta maysa a profeta, magunggonaanto met a kas iti pannakagunggona ti profeta. Siasinoman nga umawat iti nalinteg a tao, gapu ta isu ket nalinteg, magunggonaanto met a kas iti pannakagunggona ti nalinteg a tao.

⁴²Laglagipenyo a ti siasinoman a mangted iti uray sangabaso laeng a nalamiis a danum iti maysa kadagitoy nanumo a pasurotko, gapu ta isu ket pasurotko, awan duadua nga awatennanto ti gunggonana.”