Read Iloko Matthew 11 Bible Online

Matthew 11 - Iloko bible

Matthew 11

¹Kalpasan ti panangbilin ni Jesus kadagiti sangapulo ket dua nga adalanna, pimmanaw iti dayta a lugar tapno mapan mangisuro ken mangasaba kadagiti il-ili nga asideg sadiay.

²Adda ni Juan a Mammuniag iti pagbaludan idi nadamagna dagiti ar-aramiden ni Cristo ket imbaonna ken ni Jesus ti sumagmamano kadagiti adalanna.

³“Sika kadi ti umayto a kas inkaskasaba ni Juan, wenno agpadaankami iti sabali?” sinaludsodda kenkuana.

⁴Simmungbat ni Jesus, “Agsublikayo ken ni Juan ket ibagayo kenkuana ti mangngeg ken makitayo:

⁵makakita dagiti bulsek, makapagna dagiti pilay, mapaimbag dagiti agkukutel, makangngeg dagiti tuleng, mapagungar dagiti natay, ket maikaskasaba ti Naimbag a Damag kadagiti napanglaw.

⁶Nagasat ti tao a di agduadua kaniak!”

⁷Idi pumanaw dagiti adalan, nagsao ni Jesus kadagiti tattao maipapan ken ni Juan, “Idi napankayo ken ni Juan idiay let-ang, ania aya ti ninamnamayo a makita? Maysa a runo a mayangin-angin?

⁸Ania kadi ti napanyo kinita? Maysa a tao a nagkawes iti napintas a pagan-anay? Kinapudnona, palasio ti pagnaedan dagiti agkawes iti kasta.

⁹Ibagayo man, ania ti napanyo kinita? Profeta? Wen, ibagak kadakayo, nangnangruna pay ngem profeta ti nakitayo.

¹⁰Ta ni Juan ti sarsaritaen daytoy a paset ti Nasantoan a Surat: ‘Adtoy ti babaonek, kuna ti Dios; Ibaonko nga umun-una ngem sika tapno isaganana ti dalanmo.’

¹¹Laglagipenyo a kadagiti amin a tao a nayanak, awan ti nangnangruna ngem ni Juan a Mammuniag. Nupay kasta, natantan-ok ngem isu ti kanumoan iti Pagarian ti Langit.

¹²Manipud idi inkasaba ni Juan ti mensahena agingga ita, nagsagaba iti napalalo a pannakaidadanes ti Pagarian ti Langit ken kayat a rabsuten dagiti narungsot a tattao.

¹³Agingga iti tiempo ni Juan, amin dagiti profeta ken ti Linteg ni Moises nagsaoda iti maipapan iti Pagarian.

¹⁴No patienyo ti saoda, ni Juan ti Elias a naipadto ti yaayna.

¹⁵Dumngeg ngarud ti siasinoman nga addaan pannakaawat.

¹⁶“Ngem ania ti pangipadaak kadagiti tattao kadagitoy nga aldaw? Kasda la ubbing nga agtugtugaw iti tiendaan. Ipukkaw ti maysa a grupo kadagiti kaay-ayamda:

¹⁷‘Nagtokarkami iti naragsak, ngem dikay nagsala. Nagkantakami iti naliday, ngem dikay nagsangit!’

¹⁸“Immay ni Juan ket nagay-ayunar ken saan nga immin-inum iti arak, ket kunkuna dagiti tattao nga isu ket linuganan ti demonio.

¹⁹“Immay ti Anak ti Tao, nangnangan ken immin-inum, ket kunkunada, ‘Kitaenyo daytoy a tao, narawet ken mammartek, gayyem dagiti agsingsingir iti buis ken dadduma pay a dakes a tattao!’ Nupay kasta, maipakita ti kinasirib ti Dios babaen kadagiti gapuananna.”

²⁰Binabalaw ni Jesus dagiti il-ili a nakaaramidan ti kaaduan kadagiti milagrona agsipud ta di nagbabawi dagiti tattao kadagiti basbasolda.

²¹“Asikanto pay, Corazin! Asikanto met, Betsaida! No naaramid koma idiay Tiro ken Sidon dagiti milagro a naaramid kadakayo, nabayag koman nga impakita dagiti tattao sadiay ti panagbabawida babaen iti panagkawesda iti nakersang ken ti panangwarakiwakda iti dapu kadagiti bagbagida.

²²Laglagipenyo ngarud nga inton Aldaw ti Panangukom, nalaglag-anto ti panangdusa ti Dios iti Tiro ken Sidon ngem ti panangdusana kadakayo.

²³“Ket sika met, Capernaum, kayatmo kadi ti maitan-ok sadi langit? Saan a mabalin! Maitappuakkanto idiay infierno! No idiay koma Sodoma ti nakaaramidan dagiti milagro a naaramid iti yanmo, adda koma pay laeng ita ti Sodoma.

²⁴Laglagipem ngarud nga inton umay ti Aldaw ti Panangukom, nalaglag-anto ti panangdusa ti Dios iti Sodoma ngem ti panangdusana kenka.”

²⁵Iti dayta a tiempo, kinuna ni Jesus, “Agyamanak kenka, Ama nga Apo ti langit ken daga, ta impakitam kadagiti awan adalna ti inlemmengmo kadagiti mamasirib ken kadagiti nasaririt.

²⁶Wen, Ama, naaramid daytoy ta isu ti pagayatam.

²⁷“Inted kaniak ni Amak ti isuamin a banag. Awan ti makaam-ammo iti Anak no di laeng ti Ama. Awan met ti makaam-ammo iti Ama no di laeng ti Anak ken dagiti kayat ti Anak a pangipakaammoan kenkuana.

²⁸“Umaykayo kaniak, dakayo amin a nabannog ken madagdagsenan, ket paginanaenkayo.

²⁹Alaenyo ti sangolko, ket agsursurokayo kaniak agsipud ta naemma ken napakumbabaak, ket masarakanyonto ti inana.

³⁰Ta nanam-ay ti sangol nga itedko kadakayo, ket nalag-an ti awit nga ipabaklayko kadakayo.”