Read Iloko Matthew 13 Bible Online

Matthew 13 - Iloko bible

Matthew 13

¹Iti dayta met la nga aldaw, pimmanaw ni Jesus iti balay, ket napan nagtugaw iti igid ti dan-aw tapno mangisuro.

²Gapu ta adu unay ti tao nga immaribungbong kenkuana, limmugan iti bangka sa nagtugaw. Nagtakder dagiti tattao iti sang-at.

³Insursurona ida kadagiti adu a bambanag babaen iti pangngarig. Kinunana: “Adda maysa a tao a napan nagpurruak iti bukel.

⁴Idi agpurpurruak, nagdisso ti sumagmamano a bukel iti igid ti dalan ket tinuktok dagiti tumatayab.

⁵Adda met sumagmamano a bukel a nagdisso iti kabatoan a bassit laeng ti dagana. Gapu ta narabaw ti dagana, nabiit a nagtubo dagiti bukel.

⁶Idi makatangkayagen ti init, nalaylay dagiti apagtubo a mula ket nagangoda a dagus agsipud ta di unay nakauneg dagiti ramutda.

⁷Nagdisso met ti sumagmamano a bukel iti nagtuboan dagiti siitan a mula a dimmakkel ken nangleppes kadakuada.

⁸Ngem nagdisso ti dadduma a bukel iti nadam-eg a daga, ket nagdawada: adda nagdawa iti sangagasut, adda met innem a pulo ken adda pay tallopulo.”

⁹Inggibus ni Jesus, “Dumngeg ngarud ti siasinoman nga addaan pannakaawat!”

¹⁰Napan dagiti adalan ken ni Jesus ket sinaludsodda, “Apay nga aramatem dagiti pangngarig no agsaoka kadagiti tattao?”

¹¹Simmungbat ni Jesus, “Naited kadakayo ti panangammo kadagiti palimed ti Pagarian ti Langit, ngem kadakuada, saan.

¹²Ta ti addaan, maikkanto pay iti ad-adu tapno aglaplapusanan ngem ti awanan, maikkatto pay uray ti bassit nga adda kenkuana.

¹³Daytoy ti gapuna nga aramatek dagiti pangngarig no agsaoak kadakuada: ta kumitkitada ngem dida makailasin, agdengdengngegda ngem dida makaawat.

¹⁴Iti kasta, matungpal ti padto ni Isaias maipapan kadakuada: ‘Dengngegkayto la a dengngeg ngem dikay makaawat; Kitakayto la a kita ngem dikay makailasin.

¹⁵Agsipud ta natangken ti ulo dagitoy a tattao, Sinullatanda dagiti lapayagda, Ken inkidemda dagiti matada, Amangan no makakita ken makangngegda, ket makaawatda, Ken amangan no agsublida kaniak, kuna ti Dios, Ket paimbagek ida.’

¹⁶“Ngem nagasatkayo ta makakita dagiti matayo ken makangngeg dagiti lapayagyo!

¹⁷Laglagipenyo nga adu a profeta ken dadduma pay a tattao ti Dios ti nagtarigagay a kumita kadagiti makitayo, ngem dida nakita, ken dumngeg kadagiti mangngegyo, ngem dida nangngeg.”

¹⁸“Denggenyo ngarud ti kaipapanan ti pangngarig maipapan iti agmulmula:

¹⁹“Dagiti dumngeg iti sao maipapan iti Pagarian ngem dida maawatan, mayarigda iti bukel a nagdisso iti igid ti dalan. Umay ti Managdakdakes ket rabsutenna ti naimula kadakuada.

²⁰Ti bukel a nagdisso iti kabatoan iladawanna dagiti tattao a siraragsak nga umawat iti mensahe apaman a mangngegda.

²¹Ngem saan nga umuneg ti sao kadakuada ket saanda nga agbayag. Isut' gapuna a maupayda a dagus no dumteng ti rigrigat ken pannakaidadanes gapu iti sao.

²²Ti bukel a nagdisso iti kasisiitan iladawanna dagiti nakangngeg iti sao. Gapu kadagiti pakaringgoran iti daytoy a biag ken ti panagagum iti kinabaknang, lineppesda ti sao ket dida agbunga.

²³Ti bukel a naimula iti nadam-eg a daga iladawanna dagiti dumngeg ken makaawat iti sao ket agbungada; adda makaibunga iti sangagasut, adda makainnem a pulo ket adda pay makatallopulo.”

²⁴Adda pay sabali a pangngarig nga insarita ni Jesus kadakuada. Kinunana: “Mayarig ti Pagarian ti Langit iti sumaganad: Adda maysa a tao a nagpurruak iti nasayaat a bukel iti talonna.

²⁵Iti maysa a rabii, idi matmaturog dagiti tattao, napan ti kabusorna ket nagmula iti ruot iti nagbabaetan dagiti trigo, sa pimmanaw.

²⁶Idi dimmakkel dagiti mula, ket mangrugidan nga agdawa, nagparang met dagiti ruot.

²⁷Napan dagiti adipen iti akinkukua iti talon ket kinunada kenkuana. ‘Apo, nasayaat met a bukel ti immulam iti talonmo; ngem apay nga adda metten dagiti ruot?’

²⁸“ ‘Aramid ti kabusor dayta,’ kinunana. “ ‘Kayatmo nga inkami paruten dagiti ruot?’ sinaludsodda.

²⁹“Insungbatna, ‘Saan, amangan no mairaman a maparut dagiti trigo no parutenyo dagiti ruot.

³⁰Bay-anyo nga aggiddan a dumakkel dagiti trigo ken ruot. Ket inton panagani, ibagakto kadagiti agani nga unaenda a paruten dagiti ruot, sada reppeten nga ipuor. Kalpasanna, anienda dagiti trigo ket idulinda iti kamaligko.’ ”

³¹Adda pay sabali a pangngarig nga insarita ni Jesus kadakuada. Kinunana: “Mayarig ti Pagarian ti Langit iti sumaganad: Adda maysa a tao a mangala iti bukel ti mostasa ket imulana iti talonna. Ti mostasa ti kabassitan kadagiti amin a bukel, ngem inton dumakkel, isu ti kadakkelan kadagiti amin a mula. Agbalin a kayo ket agumok dagiti tumatayab kadagiti sangsangana.”

³²

³³Adda pay sabali a pangngarig nga insarita ni Jesus kadakuada. Kinunana, “Mayarig ti Pagarian ti Langit iti sumaganad: Mangala ti maysa a babai iti lebadura sana igamay iti uppat a pulo a litro nga arina. Gapu iti lebadura, bumsog ti entero a masa.”

³⁴Inaramat ni Jesus dagiti pangngarig iti panangibagana amin kadagitoy a bambanag kadagiti tattao. Dina kasao ida no di agaramat iti pangngarig.

³⁵Inaramidna daytoy tapno matungpal ti insao ti profeta: “Aramatekto dagiti pangngarig no makisaoak kadakuada; Ibagakto kadakuada dagiti bambanag a di pay naammoan manipud naparsua ti lubong.”

³⁶Pinanawan ni Jesus dagiti tattao ket simrek iti balay. Napan kenkuana dagiti adalanna ket kinunada, “Ilawlawagmo man kadakami ti pangngarig maipapan kadagiti ruot iti talon.”

³⁷“Ti tao a nagmula iti nasayaat a bukel isu ti Anak ti Tao,” insungbat ni Jesus.

³⁸“Ti talon isu ti lubong. Ti nasayaat a bukel isuda dagiti annak ti Pagarian. Dagiti ruot isuda dagiti annak ti Managdakdakes.

³⁹Ti kabusor a nagmula kadagiti ruot isu ti Diablo. Ti panagani isu ti kanibusanan ti lubong, ket dagiti agani isuda dagiti angheles.

⁴⁰Kas iti pannakaurnong ken pannakapuor dagiti ruot, kastanto met ti mapasamak inton aggibus ti lubong.

⁴¹Ibaonto ti Anak ti Tao dagiti anghelesna a mangurnong ken mangikkat manipud iti Pagarianna dagiti amin a pakaigapuan ti panagbasol dagiti tattao ken dagiti amin a managdakdakes.

⁴²Isebbadanto ida iti gumilgil-ayab nga apuy. Sadiay, agsasangit ken agngangaretngetdanto.

⁴³Kalpasanna, agraniagto dagiti tattao ti Dios a kas init iti Pagarian ni Amada. Dumngeg ngarud ti siasinoman nga addaan pannakaawat.”

⁴⁴“Mayarig ti Pagarian ti Langit iti kastoy: Adda tao a nakasarak iti gameng a naikali iti maysa a talon. Gaburanna met laeng ket iti ragsakna, mapanna ilako amin a sanikuana sa agsubli tapno gatangenna dayta a talon.”

⁴⁵“Mayarig pay ti Pagarian ti Langit iti kastoy: Adda agtagtagilako nga agsapsapul iti napipintas a perlas.

⁴⁶No makasarak iti naidumduma ti pintasna, ilakona amin a sanikuana ket gatangenna dayta a perlas.”

⁴⁷“Mayarig met ti Pagarian ti Langit iti sumaganad: Adda sumagmamano a mangngalap a mangiwayat iti iketda iti dan-aw ket makaalada iti amin a kita ti ikan.

⁴⁸No mapnon ti iket, isang-atda sada agtugaw a mamaglalasin kadagiti ikan. Ikargada dagiti nasayaat kadagiti tiklis ket ibellengda dagiti dakes.

⁴⁹Kastoyto met inton aggibus ti lubong. Rummuarto dagiti angheles ket ilasindanto dagiti dakes a tattao kadagiti naimbag.

⁵⁰Isebbadanto dagiti dakes iti gumilgil-ayab nga apuy. Sadiay, agsasangit ken agngaretngetdanto.”

⁵¹Sinaludsod ni Jesus kadakuada, “Maawatanyo kadi daytoy?” “Wen,” insungbatda.

⁵²Iti kasta, kinuna ni Jesus kadakuada, “Ngarud, kayatna a sawen a tunggal maestro iti Linteg nga agbalin nga adalan iti Pagarian ti Langit, mayarig iti agtagibalay a mangiruar kadagiti baro ken daan a gameng iti kuarto a pagiduldulinanna.”

⁵³Idi nasaon ni Jesus dagitoy a pangngarig, pimmanaw iti dayta a lugar,

⁵⁴ket nagsubli iti ilina. Nangisuro iti sinagogada ket nagsiddaaw dagiti nagdengngeg kenkuana. “Sadino ti nangalaanna iti kasta a sirib ken pannakabalin nga agaramid kadagiti milagro?” sinaludsodda.

⁵⁵“Saan aya nga isu ti anak ti karpintero? Saan aya a ni Maria ti inana ket da Santiago, Jose, Simon ken Judas dagiti kakabsatna?

⁵⁶Saan aya nga agnanaed ditoy dagiti kakabsatna a babbai? Sadino ngarud ti nangalaanna amin kadagitoy?”

⁵⁷Inumsida ngarud ni Jesus. Kinuna ni Jesus kadakuada, “Mapadayawan ti profeta iti amin a lugar malaksid iti ilina ken iti bukodna a familia.”

⁵⁸Bassit laeng ti milagro nga impakitana sadiay agsipud ta awan pammatida kenkuana.