Read Iloko Matthew 14 Bible Online

Matthew 14 - Iloko bible

Matthew 14

¹Iti daydi a tiempo, nadamag ni Herodes nga agturay iti Galilea ti maipapan ken ni Jesus.

²“Pudno nga isu daytoy ni Juan a Mammuniag a napagungar,” kinunana kadagiti ofisialesna. “Dagitoy ti gapuna nga adda kenkuana daytoy a pannakabalin nga agaramid kadagiti milagro.”

³Pinatiliw ngamin idi ni Herodes ni Juan sana pinareppet ken pinaibalud. Inaramidna daytoy gapu ken ni Herodias nga asawa ni Felipe a kabsatna.

⁴Kinunkuna ngamin ni Juan ken ni Herodes, “Saan a rumbeng nga ikabbalaymo ni Herodias nga asawa ni kabsatmo.”

⁵Kayat idi ni Herodes a papapatay ni Juan, ngem nagbuteng kadagiti Judio agsipud ta imbilangda ni Juan a maysa a profeta.

⁶Idi agkasangay ni Herodes, nagsala ti balasang nga anak ni Herodias iti sango dagiti sangaili. Naay-ayo ni Herodes

⁷ket inkarina kenkuana, “Isapatak nga ited kenka ti aniaman a dawatem.”

⁸Kas insingasing ni inana, kinuna ti balasang, “Itedmo kaniak ditoy ti naibandehado nga ulo ni Juan a Mammuniag.”

⁹Nagliday ti ari, ngem gapu iti panagkarina iti imatang dagiti sangailina, imbilinna a matungpal ti dawat ti balasang.

¹⁰Pinaputolanna ni Juan idiay pagbaludan.

¹¹Nayeg ti ulo a naibandehado ket naited iti balasang a nangited met ken ni inana.

¹²Dimteng dagiti adalan ni Juan, innalada ti bangkayna ket intanemda. Kalpasanna, napanda impadamag ken ni Jesus ti napasamak.

¹³Idi naammoan ni Jesus ti napasamak, nagbangka a napan nagpakni nga is-isuna iti maysa a lugar nga awan matagtagitao. Ngem idi nadamag dagiti tattao ti ipapanawna, pinanawanda dagiti il-ilida ket nagnagnada a simmurot kenkuana.

¹⁴Dimsaag ni Jesus iti bangka. Idi makitana dagiti adu a tattao, naasian kadakuada ket inagasanna dagiti masakitda.

¹⁵Idi mumalemen, napan dagiti adalanna kenkuana ket kinunada, “Sumipngeten ket awan matagtagitao ditoy. Pagawidem dagiti tattao tapno mapanda kadagiti barbarrio ket gumatangda iti kanenda.”

¹⁶“Saan a masapul a pumanawda,” kinuna ni Jesus kadakuada. “Ikkanyo ketdi ida iti kanenda.”

¹⁷“Lima a tinapay ken dua nga ikan laeng ti adda,” kinunada.

¹⁸“Yegyo ida ditoy,” kinuna ni Jesus.

¹⁹Pinagtugawna dagiti tattao iti karuotan. Innalana dagiti tinapay ken ikan, timmangad sadi langit, sa nagyaman iti Dios. Pinispisina dagiti tinapay ket intedna kadagiti adalan tapno ibunongda kadagiti tattao.

²⁰Nanganda amin ket nabsogda. Adda 12 a basket a napno kadagiti natda nga inurnong dagiti adalan.

²¹Aglimaribu a lallaki ti nangan, malaksid dagiti babbai ken ubbing.

²²Bayat ti panangpagawid ni Jesus kadagiti tattao, pinaluganna met dagiti adalan iti bangka ket pinaunana ida a bumallasiw iti dan-aw.

²³Idi napagawidnan dagiti tattao, simmang-at nga is-isu iti maysa a turod tapno agkararag. Idi rumabiin, maymaysa ni Jesus sadiay.

²⁴Iti dayta met la nga oras, nakaadayon ti bangka iti igid ti dan-aw ket mayallo-allon agsipud ta subsubaen ti angin.

²⁵Iti parbangon, nagna ni Jesus iti rabaw ti danum a napan iti yanda.

²⁶Nagbuteng dagiti adalan idi makitada ni Jesus a magmagna iti rabaw ti danum. “Al-alia!” inyikkisda gapu iti butengda.

²⁷Ngem dagus a kinuna ni Jesus, “Dikay agbuteng! Siak ni Jesus, dikay agdanag.”

²⁸“Apo,” kinuna ni Pedro, “no agpayso a sika, ayabannak man dita yanmo a magna iti rabaw ti danum.”

²⁹“Umayka,” kinuna ni Jesus. Dimsaag ngarud ni Pedro iti bangka ket nagna iti danum a mapan ken ni Jesus.

³⁰Ngem nagbuteng idi madlawna ti angin, ket idi lumneden, inyikkisna, “Apo, isalakannak!”

³¹Ginaw-at a dagus ni Jesus ti ima ni Pedro ket ginuyodna sana kinuna, “Nagbassit ket ti pammatimon! Apay a nagduaduaka?”

³²Limmuganda a dua iti bangka ket nagtalnan ti angin.

³³Dagiti adda iti bangka nagdaydayawda ken ni Jesus. “Pudno a sika ti Anak ti Dios,” kinunada.

³⁴Bimmallasiwda iti dan-aw ket simmangladda idiay Genesaret.

³⁵Nailasin dagiti tattao ni Jesus, isu a pinaayaban dagiti taga-sadiay dagiti amin a masaksakit kadagiti kabangibang a luglugar ket inyegda ida kenkuana.

³⁶Nagpakpakaasida kenkuana a sagiden dagiti masakit uray la koma ti gayadan ti kagayna, ket naimbagan dagiti amin a simmagid.