Read Iloko Matthew 15 Bible Online

Matthew 15 - Iloko bible

Matthew 15

¹Napan ken ni Jesus dagiti sumagmamano a Fariseo ken mamaestro iti Linteg a naggapu idiay Jerusalem ket sinaludsodda kenkuana,

²“Apay a di tungpalen dagiti adalam ti pannursuro a tinawidtayo kadagiti kapuonantayo? Saan nga umisu ti panangbuggoda kadagiti imada sakbay a manganda.”

³“Ket dakayo,” insungbat ni Jesus, “apay a salungasingenyo ti bilin ti Dios gapu laeng iti ayatyo a mangtungpal kadagiti pannursuroyo?

⁴Ta kinuna ti Dios, ‘Dayawem da amam ken inam,’ ken ‘Ti agsao iti dakes ken ni amana wenno inana, rebbengna ti mapapatay.’

⁵Ngem isursuroyo a no ibaga ti maysa a tao kada ama ken inana a ti itulongna koma kadakuada ipaayna laengen iti Dios,

⁶saanen a masapul a dayawenna ni amana. Iti kasta, laksidenyo ti pannursuro ti Dios tapno surotenyo ti bukodyo a pannursuro.

⁷Dakayo nga aginsisingpet! Pudno unay ti impadto ni Isaias maipapan kadakayo:

⁸‘Kuna ti Dios, dagitoy a tattao kunkunada a dayawendak, Ngem adayo ti pusoda kaniak.

⁹Awan serserbi ti panagdaydayawda kaniak Gapu ta isursuroda dagiti linteg nga aramid ti tao ket ibilangda a bilinko.’ ”

¹⁰Inayaban ni Jesus dagiti tattao sana kinuna kadakuada, “Denggen ken awatenyo daytoy:

¹¹Saan a ti ipauneg ti tao ti mangtulaw kenkuana no di ket ti rummuar iti ngiwatna.”

¹²Napan kenkuana dagiti adalanna ket kinunada, “Dimo kadi ammo a napasakitan dagiti Fariseo iti sinaom?”

¹³“Tunggal mula a saan nga immula ni Amak sadi langit, maparutto,” insungbat ni Jesus.

¹⁴“Saanyo a pakadanagan ida. Bulsekda a mangidadaulo. Ket no idalan ti bulsek ti padana a bulsek, matnagda a dua iti abut.”

¹⁵“Ipalawagmo man kadakami daytoy a pagsasao,” kinuna ni Pedro.

¹⁶“Kayatyo a sawen nga uray dakayo diyo maawatan?” kinuna ni Jesus.

¹⁷“Diyo aya ammo a ti aniaman a sumrek iti ngiwat ti maysa a tao mapan iti tianna ket rummuarto?

¹⁸Ngem dagiti rummuar iti ngiwat agtaudda iti puso, ket dagitoy ti mangtulaw iti tao.

¹⁹Ta ti puso ti pagtaudan dagiti dakes a pampanunot a mangiturong kenkuana a pumatay, makikamalala, agderrep, agtakaw, agulbod ken mamadpadakes.

²⁰Dagitoy ti mangtulaw iti tao. Ngem ti saan a panagbuggo sakbay a mangan, saan nga isu ti mangtulaw iti tao.”

²¹Pimmanaw ni Jesus iti dayta a lugar ket napan iti asideg ti Tiro ken Sidon.

²²Napan kenkuana ti maysa a babai a taga-Canaan ken agnaed iti dayta a disso ket kinunana, “Apo, Anak ni David, kaasiannak kadi! Linuganan ti demonio ti anakko a babai ket marigatan unay.”

²³Ngem saan a sinungbatan ni Jesus. Immasideg dagiti adalanna ket kinunada, “Patgamon ti dawatna ta di ket agik-ikkis a sumursurot kadatayo.”

²⁴Kinuna ni Jesus, “Naibaonak laeng kadagiti nayaw-awan a tattao ti Israel.”

²⁵Ngem napan nagparintumeng ti babai iti sango ni Jesus sana kinuna, “Tulongannak kadi, Apo!”

²⁶“Saan a rumbeng nga alaen ti kanen dagiti ubbing sa ipurruak kadagiti aso,” kinuna ni Jesus.

²⁷“Agpayso ta kunam, Apo,” insungbat ti babai, “ngem uray dagiti aso kanenda dagiti murkat a maregreg iti sirok ti lamisaan ti apoda.”

²⁸Iti kasta, kinuna ni Jesus kenkuana, “Babai, dakkel ti pammatim! Maited kenka ti dawatmo.” Ket iti dayta met la nga oras, immimbag ti anakna.

²⁹Pinanawan ni Jesus dayta a lugar ket nagna iti igid ti Dan-aw ti Galilea. Simmang-at iti maysa a turod sa nagtugaw.

³⁰Adu a tattao ti napan kenkuana. Nangikuyogda kadagiti pilay, bulsek, lugpi, umel ken adu pay a masakit sada impan iti sangoananna, ket pinaimbagna ida.

³¹Nasdaaw dagiti tattao idi makitada a makasaon dagiti umel, naimbagen dagiti lugpi, makapagnan dagiti pilay ken makakitan dagiti bulsek, ket indaydayawda ti Dios ti Israel.

³²Inayaban ni Jesus dagiti adalanna ket kinunana, “Maasianak kadagitoy a tattao ta tallo nga aldawdan ditoy yanko ket ita, awanen ti kanenda. Diak kayat a pagawiden ida a sibibisin amangan no matalimudawda iti dalan.”

³³“Sadino ti pangalaantayo ditoy let-ang iti umanay a kanen ti kastoy a kaadu ti tao?” sinaludsod dagiti adalan.

³⁴“Adda mano a tinapayyo?” dinamag ni Jesus. “Pito, ken sumagmamano a babassit nga ikan,” insungbat dagiti adalan.

³⁵Imbilin ngarud ni Jesus kadagiti tattao nga agtugawda iti daga.

³⁶Innalana dagiti pito a tinapay ken dagiti ikan sa nagyaman iti Dios. Kalpasanna, pinispisina sana inted kadagiti adalan tapno ibunongda kadagiti tattao.

³⁷Nanganda amin ket nabsogda. Uppat a ribu a lallaki ti nangan, malaksid dagiti babbai ken ubbing. Pito a basket ti napno kadagiti natda nga inurnong dagiti adalan.

³⁹Pinagawid ni Jesus dagiti tattao sa limmugan iti bilog ket napan iti sakup ti Magadan.