Read Iloko Matthew 16 Bible Online

Matthew 16 - Iloko bible

Matthew 16

¹Napan ken ni Jesus dagiti sumagmamano a Fariseo ken Saduceo. Kas pangsuot kenkuana, kiniddawda nga iparanganna ida iti milagro a pakakitaan a naggapu sadi langit ti pannakabalinna.

²Ngem kinuna ni Jesus, “No lumlumnek ti init, kunayo, ‘Nasayaat ti tiempo ita ta nalabaga ti tangatang.’

³Iti agsapa, kunayo met, ‘Agtudo ita ta nalabaga ken nasipnget ti tangatang.’ Maibagayo ti tiempo babaen iti panangkitayo iti tangatang. Ngem diyo maibaga ti kaipapanan dagiti mapaspasamak kadagitoy a panawen!

⁴Anian a nagdakes dagiti tattao kadagitoy nga aldaw! Awan pammatida iti Dios. Agkiddawkayo iti milagro? Awan ti maipakita kadakayo no di laeng ti milagro ni Jonas.” Iti kasta, pinanawan ida ni Jesus.

⁵Idi nakaballasiwen dagiti adalan iti dan-aw, natakkuatanda a nalipatanda ti nagbalon iti tinapay.

⁶“Agsiputkayo,” kinuna ni Jesus kadakuada. “Agannadkayo iti lebadura dagiti Fariseo ken Saduceo.”

⁷Nagsasaritaanda ti sinaona. “Imbagana daytoy ta awan ngamin balontayo a tinapay,” kinunada.

⁸Ammo ni Jesus ti pagsasaritaanda ket sinaludsodna, “Apay a pagsusuppiatanyo ti kaawan balonyo a tinapay? Nagbassit ketdin ti pammatiyo!

⁹Dikayo pay la makaawat? Nalipatanyo kadin daydi panangpispisik iti lima a tinapay a naipakan kadagiti limaribu a tattao? Mano a basket ti pinunnoyo kadagiti natda?

¹⁰Wenno dagiti pito a tinapay a naipakan kadagiti uppat a ribu a tattao? Mano a basket ti pinunnoyo kadagiti natda?

¹¹Diyo pay la maawatan aya a saan a maipanggep iti tinapay ti sarsaritaek kadakayo? Alluadanyo ti lebadura dagiti Fariseo ken Saduceo!”

¹²Naawatanen dagiti adalan a saan a ti lebadura a pagaramid iti tinapay ti kuna ni Jesus nga annadanda, no di ket ti pannursuro dagiti Fariseo ken Saduceo.

¹³Idi dimteng ni Jesus iti disso nga asideg iti ili ti Cesarea Filipos, sinaludsodna kadagiti adalanna, “Siasino ti Anak ti Tao iti panagkuna dagiti tattao?”

¹⁴“Sika kano ni Juan a Mammuniag,” insungbatda. “Kuna met ti sumagmamano a sika ni Elias. Kuna pay dagiti dadduma a sika ni Jeremias wenno maysa kadagiti profeta.”

¹⁵“Ket dakayo,” sinaludsod ni Jesus, “siasinoak iti panagkunayo?”

¹⁶“Sika ti Cristo, ti Anak ti sibibiag a Dios,” insungbat ni Simon Pedro.

¹⁷Kinuna ni Jesus, “Nagasatka, Simon nga anak ni Jonas. Saan a tao no di ket ni Amak sadi langit ti nangipaltiing kenka iti daytoy a kinapudno.

¹⁸Ibagak ngarud kenka a sika ket Pedro. Iti rabaw daytoy a bato, bangonekto ti iglesiak ket uray ni patay dinto agballigi kenkuana.

¹⁹Itedkonto kenka dagiti tulbek ti Pagarian ti Langit. Ti aniaman nga iparitmo ditoy daga, maiparitto met sadi langit. Ket ti aniaman nga ipalubosmo ditoy daga, maipalubosto met sadi langit.”

²⁰Kalpasanna, imbilin ni Jesus kadagiti adalanna nga awan ti pangibagbagaanda nga isu ti Cristo.

²¹Manipud idin, impakaammo ni Jesus kadagiti adalanna: “Masapul a mapanak idiay Jerusalem ket adu ti sagabaek a pamarparigat dagiti panglakayen, dagiti panguloen a papadi ken dagiti mamaestro iti Linteg. Mapapatayakto ngem mapagungarakto iti maikatlo nga aldaw.”

²²Inyadayo bassit ni Pedro ni Jesus sana binabalaw. “Apo, saan koma a kasta ti sasawem,” kinunana. “Saanto a maaramid kenka dayta.”

²³Sinango ni Jesus ni Pedro ket kinunana, “Adaywannak, Satanas! Maysaka a lapped iti dalanko agsipud ta saan a ti pagayatan ti Dios ti pampanunotem no di ket ti pagayatan ti tao.”

²⁴Kalpasanna, kinuna ni Jesus kadagiti adalanna: “Ti agtarigagay a sumurot kaniak masapul a tallikudanna ti bagina, ibaklayna ti krusna, ket surotennak.

²⁵Ta ti siasinoman a mangipatpateg iti biagna, mapukawnanto. Ngem ti siasinoman a mangyawat iti biagna gapu kaniak, maisalakannanto.

²⁶Adda aya magunggona ti tao no matagikuana ti entero a lubong ngem mapukawna met ti biagna? Awan! Awan ti maited ti tao a pangsubbot iti biagna.

²⁷Ta dandanin umay ti Anak ti Tao agraman dagiti anghelesna. Umay iti dayag ni Amana, ket gunggonaannanto ti tunggal maysa kas mayannatup kadagiti aramidna.

²⁸Laglagipenyo nga adda sumagmamano kadakayo ditoy a saanto pay a matay agingga a makitada ti Anak ti Tao nga umay nga Ari.”