Read Iloko Matthew 18 Bible Online

Matthew 18 - Iloko bible

Matthew 18

¹Iti dayta a kanito, immasideg dagiti adalan ken ni Jesus ket sinaludsodda, “Siasino ti kangrunaan iti Pagarian ti Langit?”

²Nangayab ni Jesus iti ubing, pinagtakderna iti sangoananda

³ket kinunana, “Laglagipenyo a dikayto makastrek iti Pagarian ti Langit no dikay agbalbaliw ken agbalin a kas kadagiti ubbing.

⁴Siasinoman nga agpakumbaba ken agbalin a kas iti daytoy nga ubing, isu ti kangrunaan iti Pagarian ti Langit.

⁵Ket ti siasinoman nga umawat iti maysa kadagiti kakastoy nga ubbing gapu kaniak, siak ti awatenna.”

⁶“No adda siasinoman a pakaigapuan ti panagbasol ti maysa kadagitoy nga ubbing a mamati kaniak, nasaysayaat koma a maigalut ti dakkel a gilingan a bato iti tengnged dayta a tao sa mailemmes iti taaw.

⁷Asi pay ti lubong gapu ta adda dagiti bambanag a pakaigapuan ti pannakapukaw dagiti tattao iti pammatida! Umay a di bumurong dagitoy a sulisog, ngem asi pay ti tao a pakaigapuanda!

⁸“No ta imam wenno ta sakam ti pakaigapuan ti panagbasolmo, putdem ket ibellengmo! Nasaysayaat a pawad wenno pukolka a sumrek iti biag nga agnanayon ngem ti addaanka iti dua nga ima ken dua a saka ket maitappuakka iti agnanayon nga apuy.

⁹No ta matam ti pakaigapuan ti panagbasolmo, suatem ket ibellengmo! Nasaysayaat a buldingka a sumrek iti biag nga agnanayon ngem ti addaanka iti dua a mata ket maitappuakka iti apuy idiay infierno.”

¹⁰“Kitaenyo diyo laisen ti uray maysa kadagitoy nga ubbing. Ibagak kadakayo a dagiti anghelesda idiay langit, kankanayon nga addada iti imatang ni Amak nga adda sadi langit.

¹²“Ania ti makunayo? Ania ti aramiden ti maysa a tao nga addaan sangagasut a karnero no mapukaw ti maysa kadakuada? Panawanna dagiti siam a pulo ket siam nga agar-arab iti turod ket mapanna sapulen ti napukaw a karnero.

¹³Ibagak kadakayo a no masapulanna, ad-addanto ti ragsakna iti daytoy a karnero ngem kadagiti siam a pulo ket siam a saan a napukaw.

¹⁴Kasta met a di kayat ni Amayo sadi langit a mapukaw ti uray maysa kadagitoy nga ubbing.”

¹⁵“No makabasol kenka ti kabsatmo, inka kenkuana ket ilawlawagmo ti nagbasolanna. Ngem aramidem daytoy no duduakayo. No dumngeg kenka, napasublimon ti kabsatmo.

¹⁶Ngem no dina aklonen ti basolna, mangikuyogka iti maysa wenno dua a kaduam tapno, kas nailanad iti Nasantoan a Surat, ‘Mapatalgedan ti amin a pammabasol babaen iti pammaneknek ti dua wenno tallo a saksi.’

¹⁷Ngem no dina denggen ida, ipakaammom iti iglesia. Ket no dina latta denggen ti iglesia, ibilangmon dayta a kabsat a kas maysa a ganggannaet wenno agsingsingir iti buis.”

¹⁸“Ibagak ngarud kadakayo: Ti aniaman nga iparityo ditoy daga, maiparitto met idiay langit; ket ti aniaman nga ipalubosyo ditoy daga, maipalubosto met idiay langit.

¹⁹“Adda pay ibagak kadakayo: No pagnummoan ti dua kadakayo ditoy daga ti aniaman a dawatenyo, itedto kadakayo ni Amak sadi langit.

²⁰Ta no sadino ti ayan ti dua wenno tallo nga aguummong gapu iti naganko, addaak kaduada sadiay.”

²¹Napan ni Pedro ken ni Jesus ket sinaludsodna, “Apo, mamin-ano a pakawanek ti kabsatko nga agbasbasol kaniak? Mamimpito?”

²²Kinuna ni Jesus, “Saan laeng a mamimpito no di ket mamimpitopulo a pito.

²³Ta ti Pagarian ti Langit mayarig iti kastoy: Adda idi maysa nga ari a nangikeddeng a makikuenta kadagiti agserserbi kenkuana.

²⁴Idi mangrugi a makikuenta, inyegda kenkuana ti maysa nga adipen a nakautang iti sangapulo ribu a talento.

²⁵Awan ti umanay a pagbayadna. Tapno makabayad, imbilin ti ari a mailako a kas tagabu agraman ti asawana, annakna ken amin a sanikuana.

²⁶“Nagparintumeng ti adipen iti sangoanan ti ari ket nagpakpakaasi. ‘Anusannak kadi,’ kinunana, ‘ta bayadakto amin nga utangko.’

²⁷“Naasian ti ari iti adipen ket pinakawanna ti utangna sana pinagawid.

²⁸“Rimmuar ti lalaki. Nasarakanna ti padana nga adipen a nakautang kenkuana iti sangagasut a denario. Tiniliwna sana binekkel. ‘Bayadam ti utangmo,’ kinunana.

²⁹“Nagparintumeng ti nakautang, ket nagpakpakaasi kenkuana, ‘Anusannak kadi ta agbayadakto met laeng.’

³⁰“Dina pinatgan ti dawat ti padana nga adipen. Pinaibaludna ketdi agingga a mabayadanna ti utangna.

³¹“Nagladingit dagiti dadduma nga adipen idi makitada ti napasamak. Napanda iti ari ket impulongda amin kenkuana.

³²“Ngarud, pinaayaban ti ari ti adipen. Kinunana, ‘Nagdakeska ketdin nga adipen! Pinakawanko ti amin nga utangmo agsipud ta nagpakpakaasika.

³³Kinaasiam met koma ti padam nga adipen a kas iti panangngaasik kenka.’

³⁴“Iti napalalo a pungtot ti ari, pinaibaludna ti adipen tapno madusa agingga a mabayadanna ti amin nga utangna.”

³⁵Kalpasanna, kinuna ni Jesus, “Kastanto ti aramiden ni Amak sadi langit iti tunggal maysa kadakayo no iti pusoyo, diyo pakawanen ti kabsatyo.”