Read Iloko Matthew 2 Bible Online

Matthew 2 - Iloko bible

Matthew 2

¹Nayanak ni Jesus iti ili a Betlehem idiay Judea, idi ni Herodes ti agdama nga ari. Saan a nabayag kalpasan ti pannakayanakna, adda mamasirib a lallaki a taga-daya a napan idiay Jerusalem.

²“Sadino ti ayan ti ubing a nayanak nga ari dagiti Judio?” sinaludsodda. “Nakitami ti bituenna a nagparang idiay daya ket immaykami agdaydayaw kenkuana.”

³Idi madamag daytoy ni Ari Herodes, napalalo ti pannakariribukna, kasta met ti tunggal maysa a taga-Jerusalem.

⁴Pinaayabanna ngarud dagiti panguloen a papadi ken mamaestro iti Linteg ket sinaludsodna kadakuada no sadino ti pakayanakan ti Cristo.

⁵“Iti ili a Betlehem idiay Judea,” insungbatda, “ta daytoy ti insurat ti profeta:

⁶‘Sika, Betlehem, iti daga ti Juda, Saanka a maudi kadagiti ili iti Juda; Ta tumaudto kenka ti maysa a pangulo A mangaywan iti ilik nga Israel.’”

⁷Inayaban ngarud ni Herodes dagiti sangaili ket kinasaritana ida iti nalimed. Sinaludsodna kadakuada no kaano ti panagparang ti bituen.

⁸Iti kasta, imbaonna ida idiay Betlehem ket imbilinna kadakuada, “Inkay sapulen a naimbag ti ubing; no masapulanyo, ipakaammoyonto kaniak tapno innak met agdaydayaw kenkuana.”

⁹Pimmanawda ket idi addada iti dalan, nakitada manen daydi bituen a nagparang idiay daya. Idi makitada, anian a ragsakda, anian a rag-oda! Indaldalanna ida agingga a nagsardeng iti ngatoen ti balay a yan ti ubing.

¹¹Simrekda iti balay ket nakitada ti ubing ken ni Maria nga inana. Nagparintumengda a nagrukbab kenkuana. Kalpasanna, inruarda dagiti sagsagutda a balitok, insenso ken mirra ket indatonda kenkuana.

¹²Idi agawidda iti ilida, sabalin a dalan ti nagnaanda ta iti tagtagainep, pinakdaaran ida ti Dios a didan agsubli ken ni Herodes.

¹³Kalpasan ti ipapanaw dagiti mamasirib, nagparang ken ni Jose ti maysa nga anghel ti Apo, iti maysa a tagtagainep. Kinunana, “Bumangonka; inka ipakni dagiti agina idiay Egipto. Agyankayo sadiay agingga't ibagak a pumanawkayo. Ta sapulento ni Herodes ti ubing tapno papapatayna.”

¹⁴Bimmangon ni Jose, innalana dagiti agina ket nagrubbuatda iti dayta a rabii a napan idiay Egipto.

¹⁵Nagyanda sadiay agingga't ipapatay ni Herodes. Naaramid daytoy tapno matungpal ti insao ti Apo babaen iti profeta, “Manipud Egipto inayabak ti anakko.”

¹⁶Napalalo a pungtot ni Herodes idi madlawna a sinikapan dagiti mamasirib. Iti kasta, imbilinna a mapapatay amin nga ubbing a lallaki nga agtawen iti dua wenno nababbaba iti ili a Betlehem ken kadagiti kabangibangna. Naibatay daytoy nga aramid iti kinuna dagiti sangaili maipapan iti panagparang ti bituen.

¹⁷Natungpal ngarud ti impadto ni profeta Jeremias:

¹⁸“Idiay Rama, nangngeg ti panagikkis, Dungdung-aw ken nasaem a sangsangit; Dungdung-awan ni Raquel dagiti annakna, Agsangsangit ket dina kayat ti maliwliwa, Ta natayda amin a padapada.”

¹⁹Kalpasan a natay ni Herodes, nagparang iti tagtagainep ti maysa nga anghel ti Apo ken ni Jose idiay Egipto.

²⁰“Bumangonka,” kinuna ti anghel. “Yawidmon dagiti agina iti daga ti Israel. Natayen dagiti nagpanggep a mangpapatay iti ubing.”

²¹Bimmangon ngarud ni Jose. Innalana dagiti agina ket nagsublida idiay Israel.

²²Ngem idi nadamag ni Jose a ni Arkelao nga anak ni Herodes ti simmukat nga ari ti Judea, nagbuteng a mapan sadiay. Babaen iti tagtagainep, napakdaaran manen ni Jose ket napan iti probinsia ti Galilea.

²³Nagtaeng iti ili a maawagan iti Nazaret. Iti kasta, natungpal ti kinuna dagiti profeta, “Maawaganto iti Nazareno.”