Read Iloko Matthew 20 Bible Online

Matthew 20 - Iloko bible

Matthew 20

¹“Mayarig ti Pagarian ti Langit iti kastoy: Adda idi maysa a tao a nasapa a napan nagbirok iti tangdananna nga agtrabaho iti kaubasanna.

²Nakitulag kadagiti tattao a tangdananna ti tunggal maysa iti maysa a bagi ti pirak sana imbaon ida iti kaubasanna.

³“Napan manen iti tiendaan iti alas nuebe, ket nakitana ti sumagmamano a lallaki nga agtatakder.

⁴Kinunana kadakuada, ‘Inkayo met agtrabaho idiay kaubasan ta itedkonto ti rumbeng a tangdanyo.’

⁵“Iti kasta, napanda. Rimmuar manen daydi lalaki iti alas dose, ken iti alas tres.

⁶Idi dandani alas singko, napan iti tiendaan ket nakitana ti sumagmamano a lallaki nga agtatakder. Kinunana kadakuada, ‘Apay a daddadaelenyo ti tiempoyo nga agmalmalem ditoy?’

⁷“ ‘Awan ngamin pagtrabahoanmi,’ insungbatda. “Imbagana kadakuada, ‘Inkayo met agtrabaho iti kaubasan.’

⁸“Idi sumipngeten, kinuna ti akinkukua iti kaubasan iti katalekna, ‘Ayabam dagiti mangmangged ta tangdanam ida. Irugim kadagiti naudi a simrek.’

⁹“Natangdanan iti gagangay a sueldo iti agmalem ti tunggal maysa kadagiti nangrugi a nagtrabaho iti alas singko.

¹⁰Idi napan dagiti immun-una a naayaban, impagarupda nga ad-adu ti awatenda. Ngem naipada met ti tangdanda kadagiti naud-udi.

¹¹Inawatda ti tangdanda ngem dinayamudomanda ti nagpatrabaho.

¹²Kinunada, ‘Maysa laeng nga oras ti panagtrabaho dagitoy naudi a simrek. Ngem dakami a nagmalmalem a nagkapkapudotan, impadam ti tangdanmi.’

¹³“ ‘Gayyem,’ kinuna ti akinkukua iti kaubasan iti maysa kadakuada, ‘saanka a sinaur. Immanamongka a matangdanan iti gagangay a sueldo iti agmalem.

¹⁴Alaem ti tangdanmo ket pumanawkan. Kayatko nga ipada ti tangdanmo iti intangdanko iti naudi.

¹⁵Awan aya ti kalintegak a manggasto iti kuartak kas iti pagayatak? Wenno, umapalka kadi agsipud ta naparaburak?’ ”

¹⁶Inggibus ni Jesus: “Ngarud, umunanto dagiti maudi, ket maudinto dagiti umuna.”

¹⁷Idi sumangsang-at ni Jesus idiay Jerusalem, inyadayona dagiti sangapulo ket dua nga adalan ket kinasaritana ida bayat ti pannagnada. Kinunana kadakuada,

¹⁸“Denggenyo, sumang-attayo idiay Jerusalem ket mayawatto sadiay ti Anak ti Tao kadagiti panguloen a papadi ken kadagiti mamaestro iti Linteg. Ikeddengdanto a mapapatay

¹⁹sadanto yawat kadagiti Hentil a mangang-angaw, mangsapsaplit ken mangilansa kenkuana iti krus. Ngem mapagungarto iti maikatlo nga aldaw.”

²⁰Immasideg ken ni Jesus ti asawa ni Zebedeo agraman dagiti annakna a lallaki. Nagparintumeng iti sangoananna, ket nagdawat kenkuana.

²¹“Ania ti kayatmo?” sinaludsod ni Jesus. Simmungbat ti ina, “Ipalubosmo koma nga inton agarika, makitugawto kenka dagitoy dua nga annakko, ti maysa iti makannawanmo, ket ti sabali iti makannigidmo.”

²²“Diyo ammo ti dawdawatenyo,” kinuna ni Jesus kadagiti agkabsat. “Kabaelanyo kadi ti uminum iti kopa a paginumak?” “Wen, kabaelanmi,” insungbatda.

²³“Agpayso nga uminumkayto iti kopa a paginumak,” kinuna ni Jesus, “ngem awan ti karbengak a mangpili no siasinonto ti agtugaw iti makannawan ken makannigidko. Maited dagitoy a pagsaadan kadagiti nangisaganaan ni Amak.”

²⁴Idi mangngeg daytoy dagiti sangapulo a kaduada nga adalan, nakapungtotda kadagiti agkabsat.

²⁵Iti kasta, inayaban amin ida ni Jesus ket kinunana, “Pagaammoyo a kadagiti Hentil, dagiti agturay addaanda iti dakkel a pannakabalin kadagiti tattaoda.

²⁶Saanto koma a kasta ti aramidenyo. Ti agtarigagay nga agpangulo, masapul nga agserbi kadakayo amin.

²⁷Ket ti agtarigagay nga isu ti kangrunaan, masapul nga isu ti adipenyo,

²⁸a kas iti Anak ti Tao a saan nga immay a paserbian no di ket tapno agserbi ken yawatna ti biagna a pangsubbot kadagiti adu a tattao.”

²⁹Idi pumanaw ni Jesus ken dagiti adalanna idiay Jerico, nakaad-adu a tattao ti simmurot.

³⁰Adda dua a bulsek a lallaki nga agtutugaw iti igid ti dalan. Apaman a nangngegda a lumabas ni Jesus, impukkawda, “Anak ni David! Kaasiannakami!”

³¹Inungtan ida dagiti tattao ket imbagada nga agulimekda. Ngem impigpigsada ketdi nga impukkaw, “Anak ni David, kaasiannakami, Apo!”

³²Nagsardeng ni Jesus. Inayabanna ida ket sinaludsodna, “Ania ti kayatyo nga aramidek kadakayo?”

³³“Apo,” kinunada, “makakitakami koma.”

³⁴Naasian ni Jesus kadakuada ket sinagidna dagiti matada. Dagus a nakakitada, ket simmurotda kenkuana.