Read Iloko Matthew 22 Bible Online

Matthew 22 - Iloko bible

Matthew 22

¹Nagaramat manen ni Jesus kadagiti pangngarig iti pannakisaona kadagiti tattao. Kinunana,

²“Mayarig ti Pagarian ti Langit iti kastoy: Adda idi maysa nga ari a nagpadaya gapu iti panagkasar ti anakna a lalaki.

³Imbaonna dagiti adipenna a mangayab kadagiti naimbitaran, ngem dida kayat ti umay.

⁴Nangibaon manen kadagiti sabali nga adipen ket kinunana: ‘Ibagayo kadagiti naawis a naisaganan ti padayak. Napartin dagiti kalakian a baka ken dagiti napalukmeg nga urbon a baka ket naisagana aminen a masapul. Ibagayo nga umaydan.’

⁵“Ngem saan a nangikaskaso dagiti naimbitaran: napan ti maysa iti talonna, ti sabali iti negosiona;

⁶ket dagiti dadduma tiniliwda dagiti adipen sada pinarparigat ken pinatay ida.

⁷“Gapu iti napalalo a pungtot ti ari, imbaonna dagiti soldadona ket pinatayda dagiti nangpapatay kadagiti adipen sada pinuoran ti siudadda.

⁸“Kalpasanna, inayaban ti ari dagiti adipenna ket kinunana, ‘Naisaganan ti padaya, ngem saan a maikari dagiti inimbitarak.

⁹Inkayo ngarud kadagiti kalkalsada ket awisenyo nga umay makidaya dagiti amin a makitayo.’

¹⁰“Napan ngarud dagiti adipen kadagiti kalkalsada. Inawisda amin a tao a nasarakanda, naimbag man wenno dakes, ket napno ti pagbodaan kadagiti makidaya.

¹¹“Idi sumrek ti ari a mangkita kadagiti sangaili, nakitana ti maysa a tao a saan a nagkawes iti pakidaya.

¹²Sinaludsod ti ari, ‘Gayyem, saanka a nagkawes iti pakidaya. Kasano a nakastrekka?’ “Ngem nagulimek ti lalaki.

¹³“Kinuna ngarud ti ari kadagiti agserserbi, ‘Rimpongenyo daytoy a tao ket ipurruakyo iti kasipngetan. Sadiay, agsangit ken agngaretngetto.’ ”

¹⁴Kamaudiananna, kinuna ni Jesus, “Adu dagiti maayaban ngem bassit dagiti mapili.”

¹⁵Pimmanaw dagiti Fariseo ket nagtutulagda no kasano ti panangtiliwda ken ni Jesus gapu kadagiti saona.

¹⁶Imbaonda ngarud kenkuana dagiti pasurotda ken sumagmamano a kameng ti partido Herodiano. Kinuna dagiti naibaon, “Maestro, ammomi a saanka nga agul-ulbod. Isursurom ti pudno maipapan iti pagayatan ti Dios. Dimo pakaringgoran no ania ti kuna ti tao agsipud ta awan idumdumam.

¹⁷Ibagam man ngarud kadakami no ania ti kapanunotam iti daytoy? Maisalungasing kadi iti Linteg wenno saan ti panagbayad iti buis iti Emperador?”

¹⁸Ngem nadlaw ni Jesus ti dakes a panggepda, ket kinunana, “Dakayo nga aginsisingpet! Apay a suotendak?

¹⁹Ipakitayo man kaniak ti kuarta a pagbuis!” Intedda kenkuana ti kuarta.

²⁰“Siasino ti akinladawan ken akinnagan iti daytoy?” sinaludsodna.

²¹“Ti Emperador,” insungbatda. Iti kasta, kinuna ni Jesus, “Itedyo ngarud iti Emperador ti kukua ti Emperador, ket itedyo met iti Dios ti kukua ti Dios.”

²²Nasdaawda idi mangngegda daytoy, ket pinanawanda ni Jesus.

²³Iti dayta met la nga aldaw, napan ken ni Jesus ti sumagmamano a Saduceo. (Kunkuna dagiti Saduceo a saan nga agungar dagiti natay.)

²⁴Kinunada, “Maestro, insuro ni Moises a no matay ti maysa a lalaki nga awan anakna, asawaen ti kabsatna ti balo tapno maaddaanda iti pannakaanak ti natay.

²⁵Adda idi pito a lallaki nga agkakabsat ditoy lugarmi. Nangasawa ti inauna ngem natay nga awan putotna. Iti kasta, nabati ti asawana iti adienna.

²⁶Kasta met ti napasamak iti maikadua, iti maikatlo ken kadagiti sumarsaruno a kakabsatna agingga iti maikapito.

²⁷Kamaudiananna, natay ti babai.

²⁸“Ngarud,” sinaludsodda, “inton aldaw ti panagungar, siasinonto ti akin-asawa kenkuana? Ta nakikallaysada met amin kenkuana!”

²⁹“Agbiddutkayo!” insungbat ni Jesus. “Diyo ngamin maawatan dagiti Nasantoan a Sursurat wenno ti pannakabalin ti Dios.

³⁰Inton agungar dagiti natay, mayarigdanto kadagiti angheles sadi langit, ket didanto mangasawa wenno makiasawa.

³¹No, maipapan iti panagungar dagiti natay, diyo pay aya nabasa ti sinao kadakayo ti Dios? Kinunana,

³²‘Siak ti Dios ni Abraham, ti Dios ni Isaac ken ti Dios ni Jacob.’ Kayatna a sawen nga isu ti Dios dagiti sibibiag, saan a Dios dagiti natay.”

³³Idi mangngeg daytoy dagiti tattao, nasdaawda iti pannursurona.

³⁴Naguummong dagiti Fariseo idi nadamagda a pinagulimek ni Jesus dagiti Saduceo.

³⁵Maysa a maestro iti Linteg a kaduada ti nagsaludsod ken ni Jesus tapno ipalab-ogda.

³⁶“Maestro,” kinunana, “ania ti kangrunaan a bilin iti Linteg?”

³⁷Insungbat ni Jesus, “ ‘Ayatem ti Apo a Diosmo iti amin a pusom, iti amin a kararuam, ken iti amin a panunotmo.’

³⁸Daytoy ti umuna ken kangrunaan a bilin.

³⁹Ti maikadua a kangrunaan a bilin umasping iti umuna, ‘Ayatem ti padam a tao a kas iti bagim.’

⁴⁰Dagitoy dua a bilin ti pagbatayan ti entero a Linteg ni Moises ken ti pannursuro dagiti profeta.”

⁴¹Idi naguummong dagiti sumagmamano a Fariseo, sinaludsod ni Jesus kadakuada,

⁴²“Ania ti makunayo maipapan iti Cristo? Ania a kaputotan ti nagtaudanna?” “Nagtaud iti kaputotan ni David,” insungbatda.

⁴³Sinaludsod manen ni Jesus, “Apay ngarud a ti Espiritu pinaltiinganna ni David nga awaganna ti Cristo iti ‘Apo’? Kinuna ni David,

⁴⁴‘Kinuna ti Apo iti Apok: Agtugawka ditoy makannawanko, Agingga a maparmekko dagiti kabusormo ket addada iti babaem.’

⁴⁵No ‘Apo’ ti kuna ni David kenkuana, kasano ngarud a nagtaud ti Cristo iti kaputotan ni David?”

⁴⁶Awan a pulos ti naisungbatda ken ni Jesus, ket manipud iti dayta nga aldaw, awanen ti makaitured nga agsaludsod kenkuana.