Read Iloko Matthew 23 Bible Online

Matthew 23 - Iloko bible

Matthew 23

¹Kinuna ni Jesus kadagiti tattao agraman kadagiti adalanna,

²“Adda kalintegan dagiti mamaestro iti Linteg ken dagiti Fariseo a mangilawlawag iti Linteg ni Moises.

³Isut' gapuna a tungpalen ken surotenyo amin nga ibagada nga aramidenyo. Nupay kasta, diyo tultuladen dagiti aramidda, ta dida ar-aramiden dagiti isursuroda.

⁴Pabaklayanda dagiti tattao iti nadagsen a karga ngem dida met tumulong nga agawit.

⁵Aramidenda amin tapno madlaw dagiti tattao a relihiosoda. Kitaenyo ti kaakaba ti nakaisuratan dagiti paset ti Nasantoan a Surat nga adda kadagiti muging ken takiagda! Kitaenyo ti kagayad ti baruyboy dagiti kawesda!

⁶Magustoanda dagiti katan-okan a lugar kadagiti fiestaan ken kangrunaan a tugaw kadagiti sinagoga.

⁷Magustoanda ti makablaawan iti publiko ken maawagan iti ‘Maestro.’

⁸Dikayo paawagan iti ‘Maestro’ agsipud ta agkakabsatkay amin ket maymaysa laeng ti Maestroyo.

⁹Diyo awagan iti ‘Ama’ ti siasinoman ditoy daga agsipud ta maymaysa ti Amayo sadi langit.

¹⁰Dikayo met a paawagan iti ‘Pangulo,’ ta ti Cristo laeng ti panguloyo.

¹¹Ti kangrunaan kadakayo masapul nga isu ti adipenyo.

¹²Ti siasinoman a mangitan-ok iti bagina, maipababanto. Ngem ti siasinoman nga agpakumbaba, maitan-okto.”

¹³“Asikayo pay, dakayo a mamaestro iti Linteg ken dakayo a Fariseo! Aginsisingpetkayo! Serraanyo ti ruangan ti Pagarian ti Langit kadagiti tattao ngem dikay met sumrek ket paritanyo pay dagiti mayat a sumrek.

¹⁵“Asikayo pay, dakayo a mamaestro iti Linteg ken dakayo a Fariseo! Aginsisingpetkayo! Ballasiwenyo dagiti taaw ken sursorenyo dagiti dagdaga tapno makaawiskayo iti maysa a pasurot; ket no adda mapasurotyon pagbalinenyo nga ad-adda ti pannakaikarina iti infierno ngem dakayo.

¹⁶“Asikayo pay, dakayo a bulsek a mangidaldalan! Ta isursuroyo a no pagsapata ti maysa a tao ti Templo, saan a masapul a tungpalenna ti karina; ngem no pagsapatana ti balitok iti Templo, masapul a tungpalenna ti karina.

¹⁷Maag a bulsek! Ania aya ti napatpateg? Ti balitok wenno ti Templo a mamagbalin a nasantoan ti balitok?

¹⁸Isursuroyo pay a no pagsapatana ti altar, saan a masapul a tungpalenna ti karina; ngem no pagsapatana ti daton iti altar, masapul a tungpalenna ti karina.

¹⁹Anian a kinabulsekyo! Ania aya ti napatpateg? Ti daton wenno ti altar a mamagbalin a nasantoan ti daton?

²⁰Ngarud, no agsapata ti tao iti sango ti altar, isapatana ti altar agraman ti amin a daton iti rabawna;

²¹ket no agsapata ti maysa a tao iti Templo, agsapata met iti Templo ken iti Dios nga agnaed sadiay;

²²ket no agsapata ti tao iti langit, agsapata met iti trono ti Dios ken iti situtugaw sadiay.

²³“Asikayo pay, dakayo a mamaestro iti Linteg ken dakayo a Fariseo! Aginsisingpetkayo! Itedyo ti apagkapullo dagiti rekrekado a mulayo kas iti yerbabuena, anis ken kumino, ngem diyo met tungpalen dagiti nasken a pannursuro ti Linteg a kas iti kinalinteg, kinamanangngaasi ken kinapudno. Dagitoy ti rebbengyo a tungpalen ket diyo liwayan dagiti dadduma.

²⁴Bulsek a mangidaldalan! Sagatenyo ti lamok iti inumenyo, ngem alun-onenyo ti kamelio.

²⁵“Asikayo pay, dakayo a mamaestro iti Linteg ken dakayo a Fariseo! Aginsisingpetkayo! Ta dalusanyo ti ruar ti tasa ken pingganyo, ngem iti uneg, napnoda iti sinamsamyo.

²⁶Bulsek a Fariseo! Dalusam pay nga umuna ti uneg ti tasa, tapno nadalusto met ti ruarna.

²⁷“Asikayo pay, dakay a mamaestro iti Linteg ken dakay a Fariseo! Aginsisingpetkayo! Ta kaskayla napapudaw a tantanem a napintas ti buyada iti ruar, ngem iti uneg napnoda iti tultulang ken agruprupsa a bangkay dagiti natay.

²⁸Kasta met nga agpamarangkayo a kas naimbag kadagiti amin a tao, ngem napno ti unegyo iti kinamanaginsisingpet ken kinadakes.”

²⁹“Asikayo pay, dakayo a mamaestro iti Linteg ken dakay a Fariseo! Aginsisingpetkayo! Yaramidanyo dagiti profeta kadagiti napipintas a tantanem ken arkosanyo dagiti monumento dagiti nagbiag a nalinteg.

³⁰Kunayo pay, ‘No addakam la koma idi tiempo dagiti ammami dimi koma tinulongan ida a nagpapatay kadagiti profeta.’

³¹No kasta, annugotenyo a nagtaudkayo iti kaputotan dagiti nangpapatay kadagiti profeta!

³²Ala ngarud, leppasenyo ti inrugi dagiti ammayo.

³³Karasaen! Annak dagiti uleg! Kasano ti pananglisiyo iti dusa idiay infierno?

³⁴Isut' gapuna nga ibagak kadakayo: Ibaonkonto kadakayo dagiti profeta ken mamasirib ken mamaestro iti Linteg. Ngem papatayenyonto ida wenno ilansayonto ida iti krus. Addanto dagiti saplitenyo kadagiti sinagogayo ket addanto met dagiti kamaten ken idadanesyo iti inilin-ili.

³⁵Iti kasta, madusakayto gapu iti pannakapapatay dagiti nalinteg a tattao manipud ken ni Abel agingga ken ni Zacarias nga anak ni Barakias a pinatayyo iti nagbaetan ti Templo ken ti altar.

³⁶Ibagak kadakayo ti pudno: Sagabaento daytoy a kaputotan ti dusa gapu kadagitoy a kinadakes!”

³⁷“Jerusalem, Jerusalem a mangpapatay kadagiti profeta ken mangubor kadagiti imbaon kenka ti Dios! Namin-anon a kayatko nga arakupen dagiti annakmo a kas iti panangsallukob ti maysa nga upa kadagiti piekna, ngem dimo met kayat.

³⁸Ita, mabaybay-an ken aglangalangton ti Temployo.

³⁹Ibagak kadakayo a didakton makita agingga a kunayo, ‘Bendisionan koma ti Dios ti umay iti nagan ti Apo!’ ”