Read Iloko Matthew 24 Bible Online

Matthew 24 - Iloko bible

Matthew 24

¹Rimmuar ni Jesus iti Templo. Nakaadayo bassiten idi immasideg kenkuana dagiti adalan ket intudoda kenkuana dagiti pasdek ti Templo.

²Kinunana kadakuada, “Wen, makitayo amin dagitoy ita. Ngem ibagak kadakayo nga awanto ti uray maysa a bato ditoy a mabati iti yanna. Marbadanto amin.”

³Agtugtugaw ni Jesus idiay Bantay Olivo idi umasideg kenkuana dagiti adalan. “Ibagam man kadakami no kaanonto a mapasamak dagitoy?” sinaludsodda. “Anianto ti mapasamak a mangipakita iti yaaymo ken iti panungpalan ti lubong?”

⁴Insungbat ni Jesus, “Agannadkayo, ket dikayo paallilaw.

⁵Adunto ti umay ket aramatendanto ti naganko a kunkunada, ‘Siak ti Cristo,’ ket adunto ti allilawenda.

⁶Mangngegyonto ti arimbangaw dagiti agdadangadang ken damdamag maipapan kadagiti dadduma pay a gubgubat. Ngem dikay agdanag. Masapul a mapasamak dagitoy ngem dina kayat a sawen a dimtengen ti panungpalan.

⁷Aggugubatto dagiti nasion; agririnnautto dagiti pagarian. Addanto bisin ken ginggined iti amin a lugar.

⁸Pangrugian laeng amin dagitoy ti panagsagaba a kas iti panangrugi ti panagsagaba ti agpasngay.

⁹“Matiliw ken mayawatkayto a madusa. Mapapataykayto. Guraendakayto dagiti amin a tattao gapu kaniak.

¹⁰Iti dayta a tiempo, adunto dagiti mangtallikud iti pammatida. Aglilinniput ken aggiginnuradanto.

¹¹Tumaudto dagiti adu a sinan-profeta a mangyaw-awan kadagiti adu a tattao.

¹²Kastanto ti panagsaknap ti kinadakes, ket ti ayat dagiti adu a tattao lumamiisto.

¹³Ngem maisalakanto ti siasinoman a makaibtur agingga iti panungpalan.

¹⁴Maikaskasabanto iti entero a lubong daytoy Naimbag a Damag maipapan iti Pagarian kas pammaneknek iti sangkataoan. Kalpasanna, umayton ti panungpalan.”

¹⁵“Iti kasta, inton makitayo ‘Ti Nakabutbuteng a Mangdadael’ nga agtakder iti nasantoan a lugar a kas insao ni profeta Daniel (maawatan koma ti agbasa ti kaipapanan daytoy),

¹⁶masapul a kumamang dagiti adda idiay Judea kadagiti bambantay.

¹⁷Umulog a dagus ti adda iti tuktok ti balay ket saanen a sumrek iti balayna tapno mangala iti uray ania a mabalinna nga itugot.

¹⁸Ti adda iti taltalon saanen nga agawid a mangala iti kagayna.

¹⁹Kadagita nga aldaw, kakaasinto dagiti masikog ken dagiti inna a di pay napusot dagiti annakda.

²⁰Dawatenyo iti Dios a saan koma nga iti tiempo ti nepnep wenno Aldaw a Panaginana ti panagpakniyo!

²¹Ta kadagita nga aldaw, nakarkaronto nga adayo ti rigat ngem iti aniaman a napasamak manipud pannakaparsua ti lubong agingga kadagitoy nga aldaw. Ket uray kaano awanton ti kastoy a mapasamak.

²²Ngem kinissayan ti Dios ti bilang dagita nga al-aldaw, ta no saan, awan ti makalasat. Ngem gapu kadagiti pinilina a tattao, kissayanna ti bilang dagita nga al-aldaw.

²³“Daytoy ti gapuna a no adda agkuna, ‘Kitaenyo, adda ditoy ti Cristo!’ wenno ‘Adda sadiay!’ diyo patpatien.

²⁴Ta agparangto dagiti sinan-Cristo ken dagiti sinan-profeta, ket agipakitadanto kadagiti datdatlag ken nakaskasdaaw a banag tapno, no mabalin, yaw-awanda uray dagiti pinili ti Dios.

²⁵Denggenyo, impakaammokon kadakayo dagitoy sakbay a mapasamakda.

²⁶“Wenno, no kunada, ‘Kitaenyo, adda iti let-ang!’ dikay mapmapan sadiay. Ket no kunada, ‘Kitaenyo, adda nga aglemlemmeng ditoy!’ diyo patpatien.

²⁷Ta umayto ti Anak ti Tao a kas iti kapardas ti kimat nga aggilap iti daya nga agpa-laud.

²⁸“Sadinoman a yan ti bangkay, sadiayto ti paguurnongan dagiti agila.”

²⁹“Apaman a malpas dagita a rigrigat, agsipngetto ti init, dinto agraniag ti bulan, agtinnagto dagiti bituen, ket mawarawaranto dagiti pannakabalin iti tangatang.

³⁰Agparangto idiay langit ti pagilasinan iti yaay ti Anak ti Tao. Ket agdung-awto dagiti amin a tattao ditoy daga inton makitada ti Anak ti Tao iti rabaw dagiti ulep ti langit nga umay a napnoan pannakabalin ken naindaklan a dayag.

³¹Aguninto ti dakkel a trumpeta, ket ibaonto ti Anak ti Tao dagiti anghelesna kadagiti uppat a suli ti lubong sadanto urnongen dagiti tattao a pinili ti Dios, manipud iti maysa a pungto ti daga agingga iti sabali.”

³²“Adalenyo ti sursuro a maadaw iti kayo nga igos: no aguggot ket agrusingen dagiti bulongna, ammoyo nga agbaliwen ti panawen.

³³Kasta met nga inton makitayo amin dagitoy, ammoyo nga asidegen ti tiempo ket dandanin mangrugi.

³⁴Laglagipenyo a mapasamakto amin dagitoy sakbay a matay amin a tattao iti daytoy a kaputotan.

³⁵Mapukawto ti langit ken ti daga, ngem pulos a dinto mapukaw dagiti saok.”

³⁶“Ngem no maipapan iti idadateng dayta nga aldaw ken oras, awan ti makaammo—uray dagiti angheles sadi langit wenno ti Anak. Ti laeng Ama ti makaammo.

³⁷Kas iti napasamak idi tiempo ni Noe, kastanto met ti mapasamak inton umay ti Anak ti Tao.

³⁸Kas kadagidi aldaw sakbay ti Layus, nangnangan, nagiinum ken nagaassawa dagiti tattao, agingga iti iseserrek ni Noe iti daong.

³⁹Dida ammo ti mapaspasamak agingga idi umay ti Layus a nangyanud kadakuada amin. Kastanto met ti mapasamak inton umay ti Anak ti Tao.

⁴⁰Iti dayta a tiempo, addanto dua a lallaki nga agtartrabaho iti talon: maalanto ti maysa ket mabatinto ti kaduana.

⁴¹Addanto dua a babbai nga aggilgiling: maalanto ti maysa ket mabatinto ti kaduana.

⁴²Agsaganakayo ngarud ta saanyo nga ammo ti aldaw a yaay ti Apoyo.

⁴³Laglagipenyo a no ammo koma ti ama ti familia no kaano ti yaay ti mannanakaw, siririing koma tapno saan a serken ti mannanakaw ti balayna.

⁴⁴Daytoy ti gapuna a masapul a kanayon a sisasaganakayo, ta umayto ti Anak ti Tao iti tiempo a diyo ipagpagarup.”

⁴⁵“Siasino ngarud ti mapagtalkan ken masirib nga adipen? Isu ti insaad ti apona a mangimaton kadagiti dadduma nga adipen tapno ikkanna ida iti kanen iti umisu a tiempo.

⁴⁶Nagasat dayta nga adipen no masangpetan ti apona a kasta ti ar-aramidenna.

⁴⁷Wen, ibagak kadakayo, isaadto ti apo daytoy nga adipen a mangaywan iti amin a sanikuana.

⁴⁸Ngem no isu ket dakes nga adipen, kunananto iti bagina: ‘Mabayag pay ti isasangpet ti apok.’

⁴⁹Pangpang-orenna dagiti padana nga adipen sa makipangan ken makiinum kadagiti mammartek.

⁵⁰Sumangpetto ti apona iti aldaw a dina ipagpagarup ken iti oras a dina ammo.

⁵¹Dusaento ti apona iti nadagsen ket mairamanto iti kinadaksanggasat dagiti aginsisingpet. Sadiay, agsangit ken agngaretngetto.”