Read Iloko Matthew 25 Bible Online

Matthew 25 - Iloko bible

Matthew 25

¹“Inton dumteng dayta nga aldaw, mayarigto ti Pagarian ti Langit iti kastoy: Adda idi sangapulo a babbalasang a nangala kadagiti pagsilawanda tapno mapanda sabten ti nobio.

²Lima ti maag, ket lima met ti masirib.

³Intugot dagiti maag ti pagsilawanda ngem awan reserbada a lana.

⁴Ngem nangitugot dagiti masirib iti reserba a lana, malaksid ti adda kadagiti pagsilawanda.

⁵Gapu ta naladaw ti isasangpet ti nobio, nagtuglep dagiti babbalasang ket nakaturogda.

⁶“Iti tengnga ti rabii, adda nangipukkaw: ‘Adtoyen ti nobio! Umayyo sabtenen!’

⁷“Bimmaringkuas dagiti babbalasang ket insaganada dagiti pagsilawanda.

⁸“‘Ikkandakam man iti lanayo ta maiddepen ti silawmi,’ kinuna dagiti maag kadagiti masirib.

⁹“‘Saan!’ insungbat dagiti masirib. ‘Amangan no awan ti umanay a para kadatayo amin. Inkay la gumatangen iti para kadakayo.’

¹⁰“Napan ngarud gimmatang dagiti maag iti lana. Ngem bayat ti kaawanda, simmangpet ti nobio. Kimmuyog kenkuana dagiti nakasagana a babbalasang a simrek iti pagbodaan ket naserraan ti ridaw.

¹¹“Iti saan a mabayag, simmangpet dagiti maag. ‘Apo, Apo!’ kinunada. ‘Pastrekendaka man.’

¹²“ ‘Ngem saankayo met nga am-ammo!’ insungbat ti nobio.”

¹³Kamaudiananna, kinuna ni Jesus: “Agsaganakayo ngarud ta diyo ammo ti aldaw wenno ti oras.”

¹⁴“Iti dayta a tiempo, mayarigto ti Pagarian ti Langit iti kastoy: Adda idi maysa a tao a mapan agbiahe. Inayabanna dagiti adipenna ket intalekna kadakuada ti sanikuana.

¹⁵Inikkanna ti maysa iti lima a talento, ti maikadua, dua a talento, ket ti maikatlo, maysa a talento, kas mayannatup iti kabaelan ti tunggal maysa. Kalpasanna, nagbiahen.

¹⁶“Ti adipen nga immawat iti lima a talento pinagnegosiona a dagus ti inawatna, ket nakaganansia iti lima.

¹⁷Kasta met ti inaramid ti adipen nga immawat iti dua a talento. Nakaganansia iti dua a talento.

¹⁸Ngem ti adipen nga immawat iti maysa a talento napanna inkali ti kuarta ni amongna.

¹⁹“Kalpasan ti nabayag a tiempo, simmangpet ti among dagiti adipen ket nakikuenta kadakuada.

²⁰Napan kenkuana daydi naikkan iti lima a talento ket inyawatna ti sangapulo a talento. ‘Apo,’ kinunana, ‘inikkannak idi iti lima a talento. Kitaem, lima a talento pay ti naganansiak.’

²¹“‘Nasayaat ti inaramidmo, naimbag ken mapagtalkan nga adipen!’ kinuna ti amongna. ‘Gapu ta napagtalkanka iti bassit a banag, pagaywanenkanto iti adu. Umayka makipagragsak kaniak.’

²²“Napan met daydi adipen a nakaawat iti dua a talento ket kinunana, ‘Apo, inikkannak idi iti dua a talento ket adtoy pay ti dua a naganansiak.’

²³“Kinuna ti amongna, ‘Nasayaat ti inaramidmo, naimbag ken mapagtalkan nga adipen! Gapu ta napagtalkanka iti bassit a banag, pagaywanenkanto iti adu. Sumrekka a makipagragsak kaniak.’

²⁴“Kalpasanna, napan met daydi adipen a naikkan iti maysa a talento. ‘Apo, ammok a naingetka,’ kinunana. ‘Agburaska iti dimo minulaan ket aganika iti dimo rinaepan.

²⁵Nagbutengak isu nga inkalik ti kuarta nga intedmo. Ne, isublikon ti kukuam.’

²⁶“Kinuna ti amongna, ‘Dakeska nga adipen! Sadut! Ammom la ngaruden nga agburasak iti diak minulaan ken aganiak iti diak rinaepan.

²⁷Indepositom koma iti bangko ti intedko tapno ita ta simmangpetakon, isublim agraman ti interesna.’

²⁸Kinunana kadagiti dadduma, ‘Alaenyo ngarud ti kuarta nga adda kenkuana ket itedyo iti adipen nga addaan iti sangapulo a talento.

²⁹Ta ad-adunto ti maited iti addaan ket agsobsobraanto; ngem iti awanan, uray pay ti bassit nga adda kenkuana, maikkatto.

³⁰Ket daytoy awan serserbina nga adipen, ipurruakyo iti kasipngetan. Sadiay, agsangit ken agngaretngetto.’ ”

³¹“Inton umay ti Anak ti Tao a kas Ari a kuyogen dagiti amin nga angheles, agtugawto iti nadayag a tronona.

³²Matipontiponto amin a nasion iti sangoananna. Paglasinennanto ida iti dua a grupo a kas iti panamaglalasin ti agay-aywan kadagiti karnero ken kalding.

³³Ikabilnanto dagiti naimbag iti makannawanna, ket dagiti dakes iti makannigidna.

³⁴Kalpasanna, kunanto ti Ari kadagiti tattao iti makannawanna: ‘Umaykayo, dakayo a binendisionan ni Amak! Awatenyo ti pagarian a naisagana para kadakayo manipud pannakaparsua ti lubong.

³⁵Ta nabisinanak ket pinakandak; nawawak ket pinainumdak; immayak a kas ganggannaet ket pinadagusdak.

³⁶Idi lamolamoak, binadoandak; nagsakitak ket inaywanandak; naibaludak ket binisitadak.’

³⁷Isungbatto kenkuana dagiti nalinteg: ‘Kaano, Apo, ti pannakakitami kenka a mabisin ket pinakandaka wenno mawaw ket pinainumdaka?

³⁸Kaano ti pannakakitami kenka a ganggannaet ket pinadagusdaka wenno lamolamo ket binadoandaka?

³⁹Kaano ti pannakakitami kenka a masakit wenno balud ket binisitadaka?’

⁴⁰Kunanto ti Ari, ‘Ibagak kadakayo: no inaramidyo daytoy iti kanunumoan kadagitoy a kakabsatko, inaramidyo met kaniak!’

⁴¹“Kunananto kadagiti adda iti makannigidna: ‘Umadayokayo kaniak, dakayo nga inlunod ti Dios! Inkayo iti agnanayon nga apuy a naisagana iti Diablo ken kadagiti anghelesna.

⁴²Nabisinanak ngem didak pinakan; nawawak ngem didak pinainum;

⁴³maysaak idi a ganggannaet ngem didak pinadagus; lamolamoak ngem didak binadoan; nagsakit ken naibaludak ngem didak sinarungkaran.’

⁴⁴Isungbatdanto: ‘Kaano, Apo, ti pannakakitami kenka a mabisin wenno mawaw, a ganggannaet wenno lamolamo, a masakit wenno balud ket didaka tinulongan?’

⁴⁵Isungbatto ti Ari, ‘Ibagak kadakayo: No diyo tinulongan ti maysa kadagitoy kanunumoan a kakabsatko, didak met tinulongan.’

⁴⁶Ngarud, dagitoyto ti mapan iti agnanayon a pannakadusa. Ngem mapanto dagiti nalinteg iti agnanayon a biag.”