Read Iloko Matthew 27 Bible Online

Matthew 27 - Iloko bible

Matthew 27

¹Idi bumigaten, nagtutulag dagiti amin a panguloen a papadi ken dagiti panglakayen dagiti Judio a papatayenda ni Jesus.

²Pinungoda sada napan inyawat ken ni Pilato a gobernador.

³Idi naammoan ni Judas a nangliput a naikeddeng a madusa ni Jesus, nagbabawi ket insublina ti tallopulo a bagi ti pirak kadagiti panguloen a papadi ken kadagiti panglakayen.

⁴“Nagbasolak!” kinunana, “ta inyawatko a mapapatay ti maysa a tao nga awan basolna.” “Ania ti bibiangmi?” kinunada kenkuana. “Problemam daytan.”

⁵Impurruak ni Judas dagiti tallopulo a bagi ti pirak iti uneg ti Templo. Kalpasanna, napanna pinatay ti bagina babaen iti panagbitayna.

⁶Pinidut dagiti panguloen a papadi dagiti pirak. “Daytoy a kuarta ti bayad ti biag ti maysa a tao,” kinunada. “Iparit ti Lintegtayo a maikabil iti kaha ti Templo.”

⁷Kalpasan ti panagtutulagda, inggatangda ti kuarta iti “Daga ti Agdamdamili” nga agpaay a kamposanto dagiti ganggannaet.

⁸Isut' gapuna a maaw-awagan pay laeng dayta a talon iti “Daga ti Dara” agpapan kadagitoy nga aldaw.

⁹Natungpal ti sinao ni profeta Jeremias, “Innalada dagiti 30 a bagi ti pirak, ti gatad a nagnunumoan dagiti Israelita a pateg ti biagna,

¹⁰ket inggatangda iti daga ti agdamdamili, kas imbilin kaniak ti Apo.”

¹¹Nagtakder ni Jesus iti sangoanan ti gobernador a nangusisa kenkuana. “Sika kadi ti Ari dagiti Judio?” sinaludsodna. “Nasaomon,” insungbat ni Jesus.

¹²Ngem idi pagsaludsodan dagiti panguloen a papadi ken dagiti panglakayen, dina sinungbatan dagiti pammabasolda kenkuana.

¹³Isut' gapuna a kinuna ni Pilato kenkuana, “Dimo aya mangngeg dagiti ipabpabasolda kenka?”

¹⁴Ngem pulos nga awan insungbat ni Jesus ket kasta unay ti siddaaw ti gobernador.

¹⁵Tunggal Fiesta ti Paskua, kadawyan ti gobernador a wayawayaan ti uray siasinoman a balud a dawaten dagiti tattao.

¹⁶Iti dayta a tiempo, adda maysa nga agdindinamag a balud nga agnagan iti Jesus Barrabas.

¹⁷Idi naguurnong dagiti tattao, sinaludsod kadakuada ni Pilato: “Siasino ti kayatyo a wayawayaak? Ni Jesus Barrabas wenno ni Jesus a maaw-awagan iti Cristo?”

¹⁸Ammo ngamin ni Pilato nga inyawatda kenkuana ni Jesus gapu iti apalda.

¹⁹Maysa pay, idi agtugtugaw ni Pilato iti pangukoman, pinaibaga ti asawana daytoy: “Dimo pakibiangan dayta nalinteg a tao, ta natagtagainepko idi rabii a nagsagabaak iti kasta unay gapu kenkuana.”

²⁰Dinurogan dagiti panguloen a papadi ken dagiti panglakayen dagiti tattao tapno dawatenda ken ni Pilato a wayawayaanna ni Barrabas ket papapatayna ni Jesus.

²¹Ngem sinaludsod manen kadakuada ti gobernador: “Siasino kadagiti dua ti kayatyo a wayawayaak?” “Ni Barrabas!” insungbatda.

²²“Ania ngarud ti aramidek ken ni Jesus a maaw-awagan iti Cristo?” sinaludsod ni Pilato. “Ilansam iti krus,” kinunada amin.

²³Nagsaludsod manen ni Pilato kadakuada: “Ania kadi ti basolna?” “Ilansam iti krus,” inyad-addada ketdi nga impukkaw.

²⁴Agsipud ta awanen ti maaramid ni Pilato, ket madlawna nga adda rumsua a riribuk, nangala iti danum sana binuggoan dagiti imana iti sangoanan dagiti tattao. “Awan ti pakaibiangak iti pannakapapatay daytoy a tao,” kinunana. “Makaammokayo ditan.”

²⁵“Bay-am ta dakami ken dagiti annakmi ti mangsungbat iti pannakapapatayna,” kinuna dagiti tattao.

²⁶Kalpasanna, winayawayaanna ni Barrabas. Pinasaplitna ni Jesus sana inyawat kadagiti soldado tapno ilansada iti krus.

²⁷Innala dagiti soldado ti gobernador ket inserrekda ni Jesus iti Pretorio. Inaribungbongan ti amin a soldado ti kompania.

²⁸Inuksobda ti pagan-anayna sada kinagayan iti nalabaga a lupot.

²⁹Nagaramidda iti korona a sisiitan ket imbalangatda kenkuana. Impaiggemda ti maysa a runo iti makannawan nga imana. Nagparintumengda iti sangoananna sada nagang-angawan. “Agbiag ti Ari dagiti Judio!” kinunkunada.

³⁰Tinupratupraanda. Innalada ti runo kenkuana ket imbautda iti ulona.

³¹Idi nalpasdan a nagang-angawan, inikkatda ti kagay, ket imbadoda met laeng kenkuana ti pagan-anayna. Kalpasanna, inruarda tapno ilansada iti krus.

³²Idi rummuarda iti siudad, nasabatda ti maysa a lalaki nga agnagan Simon a taga-Cirene. Pinilitda a mangawit iti krus ni Jesus.

³³Dimtengda iti maysa a disso a managan Golgota, kayatna a sawen “Lugar ti Bangabanga.”

³⁴Inikkanda ni Jesus iti arak a nalaokan iti apro, ngem idi naramananna, dina ininum.

³⁵Inlansada ni Jesus iti krus. Nagbibingayanda ti pagan-anayna babaen iti panagbibinnunotda

³⁶sada nagtugaw a mangbantay kenkuana.

³⁷Iti ngatoen ti ulona, naisurat ti naipabasol kenkuana: “Daytoy ni Jesus nga Ari dagiti Judio.”

³⁸Inlansada met ti dua a tulisan kadagiti krusda: maysa iti makannawan ni Jesus ket ti sabali iti makannigidna.

³⁹Winingwingiwingan dagiti aglabas ken linalaisda ni Jesus:

⁴⁰“Kinunkunam a rebbaem ti Templo samo bangonen met laeng iti uneg ti tallo nga aldaw. No Anaknaka ti Dios, isalakanmo man ta bagim ket bumabaka iti krus!”

⁴¹Nakipagang-angaw met dagiti panguloen a papadi, dagiti mamaestro iti Linteg ken dagiti panglakayen.

⁴²“Insalakanna dagiti dadduma ngem dina maisalakan ti bagina!” kinunkunada. “Di met aya isu ti Ari ti Israel? No bumaba ita iti krus, mamatitayo kenkuana.

⁴³Agtalek iti Dios ken kunana nga isu Anak ti Dios. Kitaentayo man ngarud no kayat ti Dios nga isalakan ita!”

⁴⁴Kasta met ti pananglalais kenkuana dagiti tulisan a kinagiddanna a nailansa iti krus.

⁴⁵Iti tengnga ti aldaw, nagsipnget iti entero a daga ket nagpaut iti tallo nga oras.

⁴⁶Idi dandani alas tres iti malem, impukkaw ni Jesus iti napigsa a timek: “Eli, Eli, lema sabaktani?” kayatna a sawen: “Diosko, Diosko, apay a binaybay-annak?”

⁴⁷Nangngeg daytoy ti sumagmamano nga adda sadiay ket kinunada: “Denggenyo, ay-ayabanna ni Elias!”

⁴⁸Nagtaray a dagus ti maysa kadakuada a napan nangala iti espongha. Impasagepsepna iti naalsem nga arak sana inkabil iti sukdal tapno ipasepsepna ken ni Jesus.

⁴⁹Ngem kinuna ti dadduma: “Bay-am, kitaentayo man no umay isalakan ni Elias.”

⁵⁰Nagpukkaw manen ni Jesus iti napigsa ket nauyosen ti biagna.

⁵¹Napigis ti kurtina a naibengbeng iti Templo: naggudua manipud iti ngato agingga iti baba. Nagginggined, naburburak dagiti bato,

⁵²naglukat dagiti tanem, ket napagungar dagiti adu a nasantoan a tattao.

⁵³Rimmuarda kadagiti tanem ket kalpasan ti panagungar ni Jesus, napanda iti Nasantoan a Siudad a nakakitaan kadakuada dagiti adu a tattao.

⁵⁴Nagbuteng ti kapitan ken dagiti soldadona a mangbambantay ken ni Jesus idi mariknada ti ginggined ken makitada ti amin a napasamak. Kinunada, “Pudno gayam nga Anak ti Dios daytoy!”

⁵⁵Iti pangadaywen bassit, kumitkita dagiti adu a babbai. Isuda dagiti simmursurot ken nagserserbi ken ni Jesus manipud Galilea.

⁵⁶Adda kadagitoy da Maria Magdalena, Maria nga ina da Santiago ken Jose ken ti asawa ni Zebedeo.

⁵⁷Idi sumipngeten, simmangpet ti maysa a baknang nga agnagan iti Jose a taga-Arimatea ken adalan met ni Jesus.

⁵⁸Napan ken ni Pilato ket dinawatna ti bangkay ni Jesus. Imbilin ni Pilato a maited ti bangkay ken ni Jose.

⁵⁹Innala ngarud ni Jose ti bangkay, binungonna iti baro a linen a lupot,

⁶⁰ket inkabilna iti tanem a naikungkong iti bato nga agpaay koma kenkuana. Kalpasanna, nangitulid iti dakkel a bato a pinangserrana iti tanem sa pimmanaw.

⁶¹Adda sadiay da Maria Magdalena ken sabali pay a Maria a nakatugaw iti sangoanan ti tanem.

⁶²Iti sumuno nga aldaw, kayatna a sawen, kalpasan ti Aldaw a Panagsagana, nakiuman ken ni Pilato dagiti panguloen a papadi ken dagiti Fariseo.

⁶³“Apo,” kinunada, “malagipmi nga idi sibibiag pay dayta a mangal-allilaw, kinunana a mapagungarto kalpasan ti tallo nga aldaw.

⁶⁴Ibilinmo ngarud a maguardiaan a naimbag ti tanem agingga iti maikatlo nga aldaw amangan no mapan takawen dagiti adalanna ti bangkay sadanto ibaga kadagiti tattao a napagungar ni Jesus. Ta no kasta ti mapasamak, dakdakesto ti maudi a panangallilaw ngem ti immuna.”

⁶⁵“Mangalakayo iti guardia,” kinuna ni Pilato, “ket pabantayanyo a naimbag ti tanem.”

⁶⁶Iti kasta, pimmanawda ket napanda sinerraan a naimbag ti tanem babaen iti panangmarkada iti bato a rikepna, ket nangibatida kadagiti soldado a mangguardia.