Read Iloko Matthew 28 Bible Online

Matthew 28 - Iloko bible

Matthew 28

¹Kalpasan ti Aldaw a Panaginana, idi pumarbangon iti umuna nga aldaw ti lawas, napan kinita ni Maria Magdalena ken ti sabali a Maria ti nakaitaneman ni Jesus.

²Pagammoan, nagginggined iti napigsa. Bimmaba ti maysa nga anghel ti Apo manipud langit. Tinulidna ti bato a naiserra iti tanem sana nagtugawan.

³Makapurar a kasla kimat ti langana ken nakapudpudaw ti pagan-anayna.

⁴Nagtigerger dagiti guardia gapu iti butengda ket kasla natay ti langada.

⁵Nagsao ti anghel kadagiti babbai. “Dikay agbuteng,” kinunana. “Ammok a sapsapulenyo ni Jesus a nailansa iti krus.

⁶Awan ditoyen; nagungaren kas iti kinunana. Umayyo kitaen ti lugar a nagiddaanna.

⁷Kalpasanna, inkay ipakaammo a dagus kadagiti adalanna a nagungaren. Umun-unanto ngem dakayo a mapan idiay Galilea. Makitayonto sadiay! Tandaananyo daytoy imbagak kadakayo.”

⁸Nagdardarasda a pimmanaw iti tanem. Nupay sibubutengda, napnoanda iti rag-o. Ket nagtartarayda a napan nangipakaammo iti damag kadagiti adalanna.

⁹Pagammoan, sinabat ida ni Jesus ket kinablaawanna ida. Immasidegda kenkuana ket inarakupda dagiti sakana sada nagdaydayaw kenkuana.

¹⁰“Dikay agbuteng,” kinuna ni Jesus. “Inkay ibaga kadagiti kakabsatko a mapanda idiay Galilea ket makitadakto sadiay.”

¹¹Kabayatanna, idi nakapanawen dagiti babbai, napan iti siudad ti sumagmamano kadagiti soldado a nagguardia iti tanem, ket impadamagda kadagiti panguloen a papadi ti amin a napasamak.

¹²Nakiuman dagiti panguloen a papadi kadagiti panglakayen. Kalpasan ti panagtutulagda, inikkanda dagiti soldado iti adu a kuarta

¹³sada imbilin, “Ibagayo kadagiti tattao nga immay dagiti adalanna iti rabii ket tinakawda ti bangkayna idi matmaturogkayo.

¹⁴No maammoan daytoy ti gobernador, dakamto ti makisarita kenkuana tapno awan ti pakaan-anoanyo.”

¹⁵Iti kasta, innala dagiti guardia ti kuarta ket inaramidda ti naibaga nga aramidenda. Daytoy ti damag a nagwaras kadagiti Judio agpapan kadagitoy nga aldaw.

¹⁶Napan dagiti sangapulo ket maysa nga adalan iti bantay idiay Galilea nga imbaga ni Jesus a papananda.

¹⁷Idi makitada ni Jesus, nagdaydayawda kenkuana, numan pay nagduadua ti sumagmamano kadakuada.

¹⁸Immasideg ni Jesus ket kinunana, “Naited kaniak ti amin a pannakabalin idiay langit ken ditoy daga.

¹⁹Inkay ngarud kadagiti amin a tattao iti amin a lugar, ket pagbalinenyo ida nga adalak: buniaganyo ida iti nagan ti Ama, ti Anak ken ti Espiritu Santo,

²⁰ken isuroyo ida nga agtungpal kadagiti amin nga imbilinko kadakayo. Laglagipenyo nga addaakto nga agnanayon kadakayo agingga iti panungpalan ti lubong.”